بیست ءُ یکمی کرن ؛اے آئی ءُ ٹیکنالوجی ءِ تینزگامیں
اھد
گونڈ گری
بیست ءُ یکمی کرن ءَ دنیا
بلائیں مٹی ءِ نیمگ ءَ روان اِنت ءُ اے
مٹی ءِ مستریں سوب آرٹیفشل انٹیلیجنس ءُ ٹیکنالوجی اِنت۔اے آئی ءُ ٹیکنالوجی ءَ
سرجمیں دنیا وتی چیردست کُتگ کہ یک استانے اگاں اے پڑاں پَشت کپتگ گُڑا ھچ رنگ ءَ
دیمروی کُت نہ کنت۔منی اے پٹ ءُ پولی نبشتانک اے دورءِ تاکت
بزاں اے آئی ءُ ٹیکنالوجی ءِ بابت ءَ زانگ ءِ کسانیں جُھدے۔اے
نبشتانک اے آئی ءِ بندپتر ءُ ٹیکنالوجی، نوکیں دور ءِ جنگ ءُ اے آئی، بلوچ ءُ
ٹیکنالوجی ءَ کسانیں ھدے ءَ داں گیشینگ ءِ جہدءَ کنت۔اے آئی ءُ ٹیکنالوجی ءِ بندات
چہ بیستمی کرن ءَ دومی جھانی جنگ ءِ دوراں بوتگ بلے آ وھد ءَ ھاسیں مُھکمی یے نہ
دیستگ۔ 1935 ءَ الان ٹیورنگ اولی کمپیوٹر
جوڑ کنگ ءِ بندات ءَ کنت بلے دومی جہانی جنگ ءِ سوب ءَ کار پیلو بوت نہ کنت ءُ جنگ
ءَ چہ پد آ کمپیوٹر جوڑ کنت کہ پہ ٹیکنالوجی ءَ بلائیں گامے زانگ بیت۔آئی ءَ چہ پد
ٹیکنالوجی دیمروی کنان بیت ءُ 1956 ءَ ٹیکنالوجی ءَ اے آئی دروشم دیگ ءِ بندات بیت
کہ مشین ءُ ڈیجیٹل ٹولزاں فیک انٹلیجنس دیگ بہ بیت۔ھمے جہد جُنزان بیت ءُ بیست ءُ
یکمی کرن ءِ بندات ءَ اے آئی ءُ ٹیکنالوجی نوکیں آشوبے کارایت ءُ دگنیا ساریگیں ٹول ءُ ٹیکٹکساں چہ درکپیت، ٹیکینیکل
ٹولزانی نیمگ ءَ کیت۔ دنیا ءِ مٹی ءِ بندات ھمے وھد ءَ بوتگ ءُ
پدا جنگی پالیسی، اندسٹریل پالیسی، اکانومیکل پالیسی، وانگجاہ ءُ نادراہجاہ ھر چیز
اے آئی ءُ ٹیکنالوجی ءَ گوں بدل کنگ بوتگ۔ بیست ءُ یکمی کرن ءِ جنگ گوست ءَ چہ گیش
مُھکم ءُ ھترناک اَنت ءُ آئی ءِ مستریں سوب اے آئی ءُ ٹیکنالوجی اِنت۔اے آئی ءُ
ٹیکنالوجی ءِ دیمروی ءُ مُھکمی ھمد ءَ پدر
بیت کہ مروچی یک راجے ءَ پہ اے دنیا ءِ راجانی تہ ءَ وت ءَ رکینگ ءُ وتی پجار ءِ دارگ
ءِ ھاترا ٹیکنالوجی ءُ اے آئی زانگ ءُ
کارمرز کنگ المی اِنت۔درور ءَ ما بلوچ راج
ءَ بچار ایں گُڑا مارا سما بیت کہ بلوچ مروچی ٹیکنالوجیءِ درگت ءَ سک باز نزور
اِنت۔ ھمے نزوری باندا مئے دژمن ءِ تاکت جوڑ بوت کنت ءُ مئے راجی پجار ءَ پہ تاوان
بوت کنت۔
گچینی
لبز: اے آئی ءُ ٹیکنالوجی ،اے آئی ءِ بندپتر،نوکیں
دور ءِ جنگ،سائبر وار ،ڈرون وار ،اے آئی،بلوچ
پجار
اے آئی ! اے لبز وَ ھر کس
ءَ اُش کُتگ پرچا کہ ما مروچی بیست ءُ
یکمی کرن ءَ زندگ ایں ءُ بیست ءُ یکمی کرن ٹیکنالوجی ءِ دور منّگ بیت۔ اے آئی چی
یے؟ مروچی پرچا دْرائیں جہان اے آئی ءَ
مُھکم بوئگ لوٹگ ءَ اِنت؟ اے آئی ءِ چی
ارزشت اِنت ءُ بلوچ چوں اے آئی
کارمرز کُت کنت ءُ بلوچ ءَ پرچا اے آئی ءَ مُھکم بوئگ لوٹ ایت؟۔ اے درست انچیں
جُست اَنت کہ ھمک ورنا ءِ زہن ءِ توک
ءَ کاینت ءُ ما ایشاناں ڈالچار کن ایں۔ اے آئی ءُ ٹیکنالوجی بیست ءُ یکمی کرن
ءِ مستریں سوبمندی اَنت ۔ٹیکنالوجی ءِ بزانت ایش اِنت کہ مشین ءُ ڈیجیٹل ٹولز جوڑ کنگ
ءُ اے آئی ھما مشین ءُ ٹولزاناں آئی کیو (IQ)بزاں فیکیں انٹیلیجنس دنت ءُ ھمے انٹیلیجنس مشیناں انسان ءِ دروشم ءَ پہمگ
ءِ بودناکی دنت۔
اے آئی یک پراہ ءُ
شاھگانیں علمے ءُ اشی ءِ وانگ مروچی ئیں دور ءِ مستریں زلورت ءُ لوٹ اِنت ۔ھمک نیمگ ءَ بچار ئے اے آئی ءِ گپ ءُ باوست ا ِنت۔آ جھانی رھشون بہ
بنت یا کاروباری مردم ۔اے آئی زند ءُ چاگرد ءِ ھمک پڑ ءَ مارا
گندگ ءَ کیت ۔آ وانگجاہ بہ بنت
،سیاست بہ بیت،جنگ بہ بیت ،نادراہجاہ بہ بنت یا کاروبار بہ بیت۔ اے آئی بزاں آرٹیفشل انٹیلیجنس
کمپوٹر ءُ مشین روبوٹانی ھما بودناکی ءِ
نام اِنت کہ آ اشاں گوں بنی آدم ءِ IQ ءَ ھم شکشست دات کنت۔ وھد ءِ ھمرائی ءَ اے آئی ءَ گیش
دیمروی کُتگ کہ مروچی بنی آدم وتی
ھمک کار ءَ گوں ھمے نوکیں دور ءِ کمپوٹر، مشین ءُ اے دگہ سافٹ وئیرز انی کمک ءَ سرجم
کنت۔اے آئی ءِ کمک ءَ یک کمپوٹرے انسان ءِ پیم ءَ جیڑگ ءُ وتی ھیالانی
درشان کنگ ءَ جُھد کنت ۔
سائنس ءُ ٹیکنالوجی زانت
ھمک سال ءَ اے آئی ءَ مُھکم تر کنگ ءَ اَنت۔اے آئی ءِ مُھکمی مارا چو گندگ ءَ کیت
کہ مروچی ھر انسان آنلائن ءُ ڈیجیٹل دگنیا ءِ نیمگ ءَ روگ ءَ اِنت ءُ ھر کار ءَ چہ ھمیشی ءِ کمک ءَ لوٹگ ءَ اِنت ۔بزاں انسان وتی ھیال ،
لیکہ ءُ وِل پاورءَ اے آئی ءَ دیگ ءَ اِنت۔اے آئی ءِ لہتیں ٹولزکہ مارا وتی زند ءِ ھمک پڑ ءَ گندگ ءَ کاینت ۔ آیانی توک ءَ( Siri ,Alexa،Gemini , ) اَنت کہ اے آئی ءِ ٹولز اَنت۔ مروچی ھمُک موبائل فون ءِ
تہ ءَ ھست اَنت ءُ پہ بنی آدم ءِ کاراں ارزان تر کنگ ءَ جوڑ بوتگ اَنت۔جِمنی،سِریءُ
الیکسہ ءَ چہ ھرچیز کہ تو زانگ ءُ
چارگ لوٹ ئے، پیشدار اَنت۔ ہمے رنگ
ءَ دیم پجاری''
Facial Recognition'' گوں موبائل فونانی لاک ءِ پچ کنگ،توار بند، تامُر
ءُ اکساں شریں وڈے ءَ ایڈٹ کنگ ءُ یک زبانے ءَ چہ دومی زُبان ءَ گپانی رجانک کنگ ،اے
آئی ءِ کسان کسانیں ٹولزاں چہ بوت کن اَنت۔آنلائن کارانی کُمک ءَ گوں مروچی بنی آدم زر کمائینگ
ءَ اِنت۔مئے وٹساپ،پیسبک،انسٹاگرام ءُ ایکس(ٹویٹر) ءُ دگہ سوشل میڈیا پلیٹ فارمانی
سرا مارا Giro ءُ Meta
AI ءِ کمکیٹول گندگ ءَ
کاینت کہ ما ھرچیز جُست بکن ایں یا زانت
ءُ سرپدی یے بہ لوٹ ایں گُڑا اے آئی
مارا دنت ایش ۔
اے آئی ءِ بندپتر
وھدے کہ ما اے آئی ءُ
ٹیکنالوجی ءِ سرا گپ ءُ تران کن ایں یا جیڑ ایں گُڑا مئے زہن ءَ یک جُستے چست بیت ۔اے آئی کہ مروچی چو مُھکم
اِنت، ایشی ءِ بندپتر چی اِنت؟ ۔اے آئی ءِ
گال کدی دیم ءَ آرگ بوتگ ءُ پرچا آرگ بوتگ
یا ٹیکنالوجی ءِ بندات کدی بوتگ ؟ ۔ٹیکنالوجی ءِ سرا کار ءِ بندات بیستمی کرن ءَ بوتگ۔ وھدے کہ
سائنس ءُ ٹیکنالوجی ءِ زانتکار ءُ کواساں
اے گپ پھم اِت کہ جھان چہ روایتی جیڑہ ءُ جنگاں کشّگ ءُ نوکیں نیمگے ءَ برگ لوٹ ایت
گُڑا ٹیکنالوجی ءِ سرا کار بندات کنگ بوتگ ءُ ٹیکنالوجی ءِ یک بلائیں ءُ ارزشت
داروکیں بھر اے آئی ھم دیمروی کنان بیت۔
ٹیکنالوجی سرا کار ءِ بندات دومی جھانی جنگ
ءِ وھد ءَ بوتگ کہ جرمن نازی یک کوڈ اینکرپٹڈ مشینے ''The
Enigma Machine''ءِ نامءَ جوڑ کن اَنت۔ اے مشین ٹیکنالوجی ءِ اولی
کارانی توک ءَ کیت ءُ اے مشین ءِ وسیلہ ءَ
جرمن سپائیگاں یک ءُ دومی ءَ گوں کوڈ لبزانی توک ءَ رھوتداری کُتگ بلے ھمے یکیں وھد ءَ برتانیہ ءِ زانتکار
الان ٹورِنگ جرمنMachine Enigmaءِ
کوڈاں پروش ایت ۔
چوناھا ٹیکنالوجی ھمے وھداں بندات بیت بلے
چہ اشی ءَ ساری 1930 ءَ الان ٹورِنگ یک پیپرے ڈیجیٹل کمپیوٹر کنسپٹ ءِ سرا نبشتہ
کنت ءُ پدا وت کمپیوٹر جوڑینگ ءِ سرا کار بندات کنت بلے دومی جھانی جنگ ءِ سوب ءَ
آئیءِ کار اوشت ءِ آماچ بوتگ۔
1945
الان میتھسن ٹورِنگ 1945 ءَوتی کار یک رندے پدا بندا ت کُت انت ءُ ھمے
پریڈکشن داتگ اَت کہ دیمی پنجاہ سال ءِ
توک ءَ کمپیوٹر چیس (شطرنج)لیب ھم کُت کنت۔ ھمے داب ءَ 1997 ءَ'' Deep
Blue Chess Computer '
ءِ نام ءِ سرا
انٹرنیشنل بزنس مشین (IBM)
نیمگ ءَ چہ یک کمپوٹرے جوڑ بوتگ کہ انسان
ءِ زہن ءَ گوں مکابلہ داتگ ءُ ایشی ءَ چہ یک مستریں چیسءِ نامی گرامی ئیں لیبی ءَ
چیس لیب ءَ ھار داتگ۔
اے آئی ءِ بندات
1950 ءَ الان ٹورنگ 1950 ءَ یک دگہنبشتانکے? Can
Machine Think سرھال ءَ دیم ءَ کار ایت ءُ اے کنسپٹ اے آئی ءِ بنیات جوڑ بیت ءُ
چہ آئی ءَ پد اے آئی ءِ سرا کار بندات بیت ءُ ھمے وھد ءَ ''Turing
Test'' نامیں یک کمپیوٹر چکاسے جوڑینگ بیت کہ یک
کمپیوٹرے بیت ءُ انسان آئی ءَ انفارمیشن دنت ءُ
جواب ءَ کمپیوٹر وتی نیمگ ءَ چہ ھما انفارمیشن ءَ چہ out
put یے دنت ءُ ھمے چیز اے آئی ءِ بنیاد
جوڑ بیت۔
اے آئی ءِ مُھکمیں بندات ھما وھد ءَ
بوتگ کہ 1956 ءَ ڈارت ماؤت نامیں کواسے ءَ'' Artificial
Intelligence '' ءِ نام ءِ سرا یک سرجمیں
نبشتانکے شنگ کُتگ ءُ کانفرنسے اڈ
دیگ بوتگ ءُ ھمے دیوان ءَ اے آئی ءِ سرا باوست کنگ بوتگ کہ چوں مشینانی توک ءَ اے آئی کارمرز بوت کنت ءُ چوں مشینانی وت
جیڑگی ءِ بودناکی ودی کنگ بہ بیت۔
ھمے پیم ءَ 1958 ءَ نیو یارک ءِ فرانک روزن بلیٹ نامیں سائکالوجسٹ ءُ کمپیوٹر زانتکارے Perceptron’’ ‘’نام
ءِ سرا یک نیورل نٹورک کمپیوٹرے
جوڑ کنت کہ آ پہ پیٹرن ریکگنائزیشن ءَ کار کنت ۔نیورل نیٹورک ءَ چہ بزانت اِیش
اِنت کہ تو چیزے ءَ input دہ ئے ءُ ترا آئی نیمگ ءَچہ out
put یے رس ایت۔
کمپیوٹر ءِ تہ ءَ ھم نیورل نیٹورک ھمے داب
ءَ کار کنت کہ کمپیوٹر ءَ اِن پوٹ دیگ بیت کمپیوٹر ھما اِن پوٹ ءِسرا کار کنت ءُ مارا یک آؤٹ پوٹے شوکیں دابے ءَ
دنت ۔ Perceptron
کمپیوٹر ءِ کار
ھمے داب ءَ بوتگ کہ مردم اگاں جُستے کنت گُڑا آ کمپیوٹر ءَ آ جُست ءِ سرا کار کُت
ءُ آئی ءِ انچیں پسہ داتگ اَت کہ
مردم دلجم بوتگ اَنت۔
1966ءَ وھداں اے آئی ءِ یک نوکیں پروگرامے'' ELIZA ''نام ءِ سرا دیم ءَ کیت ءُ آئی ءِ
جوڑ کنوک جوسف وزنبام بوتگءُ اے پروگرام
چیٹ بوٹے (Chat Bot)بوتگ
بزاں یک کمپیوٹرے گوں انسان ءَ انسانے ءِ
وڈ ءَ گپ کنت ءُ آئی ءِ گپاناں سمجگ ءُ انسان ءَ یک شوکیں وڈے ءَ پوئگ ءِ کوشش
کنت۔ اے آئی ءِ مُھکمی ءَ یک بلائیں گامے
بوتگ۔
ھمے میان ءَ یک دگہ فیزیکل روبوٹے(Physical
Robot) 1966 ءَ جوڑ کنگ بوتگ کہ اے آئی ءُ
ٹیکنالوجی ءِ بلائیں مسالے ءُ آئی ءِ
جوڑینوک ایس آر آئی((Stanford Research Institution بوتگ ءُ ایشی ءِ زرّ ءِ فنڈ نگ چہ ڈیفنس ایڈوانسڈ ریسرچ پروجکٹ ایجنسی (DARPA) یوایس ءِ نیمگ ءَ بوتگ
اَنت۔
اے روبوٹ ءِ نام شیکی(Shakey) ایر کنگ بوتگ ءُ اشی
ءِ ارزشت ماں اے آئی بندپتر ءَ سک باز اِنت کہ اشی ءَ اے آئی چہ کمپیوٹر ءُ سافٹ وئیراں کش اِتگ ءُ
دنیا ءِ میدان ءَ آؤرتگ۔
شیکی یک بلائیں پروجکٹے بوتگ کہ ایشی ءَ ھمُک کارے ءِ کمانڈ دیگ بوتگ آئی ءَ
کُتگ اگاں ایشی ءَ کمانڈ دیگ بوتیں کہ آپے بیار آئی ءَ ھمے کمانڈ ءِ سرا
کار کُت ءُ آپ زُرت ءُ دات۔
ھمے میان ءَ اے آئی یک وھدے پدا نزور بوتگ۔
اے آئی ءَ ھچ دیمروی نہ کُتگءُ اے وھد ءَ اے آئی ونٹر گُشگ بیت ءُ اوشت ءِ آماچ بوتگ۔
1980 ءَ چہ پد اے آئی یکرندے پدا وتی مُھکمی
ءِ جھد ءَبندات کنت ۔ھمے وھداں 1986 ءَ یک دگہ کمپیوٹر زانتکار ءُ سائکالوجسٹ
جیوفری ھنٹن کہ اے آئی ءِ بُنھشت ایر کنوک
گوشگ بیت، نیورل نیٹورک ءِسرا کار کنگ بندات کنت۔نیورل نیٹورک ءِ بزانت ایش اِنت
کہ مشین ءِ توک ءَ اے آئی کمک ءَ گوں انچیں بودناکی یے ِودی کنگ اِنت کہ مشین وتی تجربہ ءُ ردیاں چہ
ھیل کنت ءُ شرتری ءِ نیمگ ءَ رؤت۔جیوفری
ھنٹن ءِ نیورل نیٹورک تھیوری ھمے بوتگ کہ اگاں کمپیوٹر ءَ راستیں ءُ شریں اسٹرکچرے
دیگ بہ بیت گُڑا کمپیوٹر انسانی زہن ءِ پیم ءَ زانت ءُ ھیل کُت کنت ۔
2006 ءَ ھمے تھیوری سرا کار کنان ءَ جیوفری
ھنٹن ڈیپ بیلیف نیٹورک ءِ نام ءَ یک سافٹ
وئیر ٹولے دیم ءَ کار ایت۔ڈیپ لرننگ یک اے آئی ٹرمے بوتگ کہ پہ بنی آدم ءَ سک
کارآمد بوتگ ءُ چریشی ءَ پد اے آئی مسلسل دیمروی ءِ نیمگ ءَ شُتگ۔اکس ءُ تامُر ،
وانگ ءُ زانگ، رجانکاری ءُ نبشتہ کاری پہ ھمُک کار ءَ اے آئی ءِ کُمک ھست اِنت۔ھمے
کنسپٹ ءِ سرا مروچی گوگل لینز ءُ دومی ٹیکنیکل ٹولز کار کنگ ءَ اَنت۔
2011 ءَ یکبرے پدا اے آئی ءِ مُھکمیں پروجکٹے''
IBM Watson
'' نامیں کمپیوٹرے ءِدروشم ءَ دیم ءَ اَتکگ۔
اے کمپیوٹر یک کوئز کمپیوٹرے بوتگ ءُ فروری 2011 ءَ یک کوئز کمپیٹشنے کنگ بیت کہ
آئی ءَ دو بچک کین ءُ بریڈ یک نیمگے بنت ءُ دومی نیمگ ءَاے آئی ہمے کمپیوٹر بیت ءُ
کوئز کمپیٹیشن ءَ کمپیوٹر کٹ ایت۔ اے واکیہ ءَچہ اے گپ پدر بوتگ کہ اے آئی ءَ گوں
وھد ءَ وت ءَ مُھکم کُتگ ءُ گوں انسانی زہن ءَ سکتیں مکابلے ئے دیگ ءَ تیار اِنت۔
2020ھما دور اِنت کہ اے آئی ءِ کار ءُ
ٹولزانی تہ ءَ بلائیں آشوبے کیت ءُ اے آشوب انچوش مُھکم بیت کہ ھمُک استان ءُ راج
اے آئی ءِنیمگ ءَ دلگوش گْور کن اَنت ءُ
چہ ایشی ءَ پد اے آئی مئے زند ءِ ھمُک پڑ ءَ وتی کردے وڈے نہ وڈے ءَ پیلو کنگ ءَ
اِنت۔
اے
آئی ءِ سافٹ وئیرز
2020ءَ چہ پد اے آئی ءَ دنیا ءِ تہ ءَ بلائیں
مٹی ءُ بدلی یے آؤرتگ ۔ھمے میان ءَ اے آئی زانتکار ءُ سافٹ وئیر ڈیویلپر ءُ کمپیوٹر زانتکاراں جُھد کُتگ کہ اے آئی سافٹ
وئیر بزاں اپلیکیشن جوڑ کنگ بہ بنت کہ مھلوک آیاناں کارمرز کُت بہ کنت ءُ پہ وت ءَ
آسانی یے ودی بہ کنت۔اے ٹولز بیست ءُ یکمی کرن ءِ مُھکم تریں ٹولز اَنت ءُ ھمُک
انسان ءَ پہ ایشانی کارمرز ءُ ھیل کنگ ءَ بلائیں مانایے داراَنت۔
(1۔GPT-3 (Open Ai
GPT-3
یک اے آئی سافٹ وئیرے کہ Open AI (آرگنائزیشنے ءُ آئی سروک
ایلن مسک اِنت) ءِ نیمگ ءَ چہ 2020 ءَ جوڑ
کنگ بوتگ۔ دو ھزار بیست ءِ وھداں اے سافٹ وئیر مھکمتریں ءُ تاکتوریں اے آئی ٹول
بوتگ ءُ ایشی ءِ مُھکمیءِ سوب اے بوتگ کہ آ وھدءِ اولی سافٹ وئیر اَت کہ
زبان رجانکاری، نبشتہ کاری، جُست ءُپسو ، کوڈ نبیسگ ءُ اکس
ایڈینٹگ ئے کُت کُت
۔بس ایشی ءَ یک پرامپٹ (Prompt) یے دروشم
ءَ وتی گپ نبیسگی ءُ دیمددیگی اَت۔
(2۔Chat GPT (Open AI
چیٹ جی پی ٹی وَ ھرکس ءَ ایش کُتگ ءُ
جاھے نہ جاھے ءَ کارمرز ھم کُتگ ۔اے ایلن
مسک ءِ کمپنی ءِ مستریں پروجکٹ اِنت کہ مروچی سک باز کارمرز بوئگ ءَ اِنت۔ آ وانگ
ءُ زانگ بہ بیت، نیوز بہ بنت ، نبشتانک ءُ پٹ ءُ پولی نبشتانک بہ بنت، یک زبانے چہ
دومی زبانے ءَ رجانک بہ بیت، وتی داب ءِ آرٹیفیشل اکسے جوڑینگی بہ بیت ، نبشتہی
دروشم ءَ چہ چیزے پی ڈی ایپ کنگی بہ بیت۔ ھمُک کار ءِ ھاترا Chat
GPT ءَ چہ کمُک زورگ بیت۔ اے سافٹ وئیر 2022 ءَ
جوڑ کنگ بوتگ ءُ ایشی بنیاد ایلن مسک ءِ اولی سافٹ وئیر GPT-3 بوتگ۔ گُشگ بیت کہ اولی سافٹ وئیر اِنت کہ انسان ءَ گوں انسان
ءِ پیم ءَ گپ کنت بزاں ایشی ءِ پروگرام انچیں وڑے ءَ جوڑ کنگ بوتگ وھدے کہ کسے ایشی ءَ میسجے راہ دنت، آ اَنچیں پسو یے دنت ئے کہ پُورا یک انسانے گپءَ اِنت نہ گُش ئے زاناں یک آرٹیفیشل بوٹے۔
3۔GEMINI
چیٹ جی پی ٹی ءَ چہ پد یک نوکیں اے آئی ٹول سافٹ وئیرے مئے
دیم ءَ کیت ءُ آئی ءِ مستریں مول ءُ مرادچیٹ جی پی ٹی Chat
GPT ءَ گوں مکابلہ کنگ
اِنت۔ یک نیمگے ما گند ایں کہ اے اکانومک ءُ ٹیکنیکل جنگے کہ دو کمپنی ءِ تہ ءَ جُنزگ ءَ اِنت ءُ ھُمک کمپنی اے جھد ءَ اِنت کہ ٹیکنالوجی
ءَ چہ دومی کمپنی ءَ وتارا مُھکم بہ کنت۔جِمنی 2023 ءَ جوڑ کنگ بوتگ ءُ ایشی ءِ گیش فیچرز ھما
اَنت کہ چیٹ جی پی ٹی ئیگ اَنت بلے ستمبر 2025 ءَ مارا گِندگءَ اَتکگ کہ مھلوک
جِمنی ءِ نیمگ ءَ شُتگ ءُ اِیشی ءَ گیشاں گیش کارمرز کنگ ءَ اِنت کہ اے
پہ گوگل کمپنی ءَ بلائیں سوبمندی یے
بوتگ۔
Redcloud.com
اے یک
اے آئی ٹولے کہ توار بند ءَ نبشتانکے تہ ءَ بدل کنت ۔ ھرچ وڑیں توارے کہ تو ایشی۔
ءَ راہ دہ ئے آئی ءَ نبشتانکے دروشم ترا جوڑ کنت دات۔
Synthesia.ai
اے ٹول پہ آرٹیفیشل تامرانی
جوڑ کنگ ءَ کارمرز بیت کہ مرچی مارا سک باز چارگ ءَ کاینت۔ اے دو پیم تامر جوڑ کنت
یکے تو ایشی ءَ ومنبشتانکی دروشم ءَ وتی تامرے ڈیمانڈ دہ ئے دومی تو ایشی ءَ اکس
چیز راہ دہ ئے ءُ گُشے کہ اے اکس ءَ چونیں
وڑے ءَ تامرے دروشم ءَ بیار آ ترا جوڑ کنت دات۔
Picwish.co
اے پہ اکسانی
ایڈینٹگ ءَ کارمرز بیت۔
Adobe AI Photoshop
چوناھا اے ساپٹوئیر اے آئی ساپٹوئیرے نہ اِنت بلے
مرچیگیں لوٹ ءُ گزراں چہ پد اے ساپٹوئیر ھم اے آئی ٹولز کارمرز کنت۔ اے ساپٹوئیر
ھیل کنگ پہ ھمُک نودربر ، ورنا ءَ زلوری اِنت۔ مرچیگیں دور ءَ Adobe بلائیں ارزشتے داریت کہ
گرافک دیزائنگ انفوگرافکس، پوسٹرز، اکس ایڈینٹگ،ءُ ایدگہ کاراں پہ کارمرز بیت۔
Capcut
اے یک انچیں سافٹ وئیرے ءُ مروچی بلائیں کچےءَ داں
مھلوک ایشی ءَ کارمرز کنگ ءَ اِنت۔ گیشتر ءَ پہ تامر
ءُ ڈاکیومنٹری ایڈیٹگ ءَ کارمرز بیت۔ ایشی تہ ءَ اے آئی وائس اوور بزاں تو اے آئی
جوڑ کُتگیں توار پہ وتی نبشتگیں لوزاں کارمرز کُت کن ئے۔
کیپ کٹ ھم ھمُک نودربر ءُ ورنا ءَ ھیل کنگ زلوری اِنت۔
نوکیں دورءِ جنگ ءُ آرٹیفیشل
انٹیلیجنس
جنگ ھم گوں وھد ءِ لوٹاں
وتی دروشماں مٹ کنان اِنت۔ زمانگی دوراں جنگ گوں کمان،زھم ءُ اِسپراں بوتگ اَنت ۔پدا
اے جنگی سازءُ سامانانی دروشم مٹ بوان
بوتگ اَنت ۔مھلوک ءَ توپک ءُ توپ جوڑ کُتگ اَنت۔
اے تاکت ءِ چکاسنگ ءَ استانی اکانومی ھم جنگی دروشمے جوڑ بوتگ کہ آئی روزیگی جنگ گُشگ بوتگ۔ ھمے پیم ءَ انڈسٹریز جوڑ بوتگ اَنت
ءُ ھمے انڈسٹریزاں ھم جنگی دروشمے گپتگ ءُ انڈسٹریئل وار ءِ بندات بوتگ۔بلے بیست
ءُ یکمی کرن ءَ جنگی دروشم چٹ ءَ مٹ بوئگ ءَ اَنت ۔اے دروشم انچیں نیمگے روگ ءَ
اَنت کہ یا جنگ ھلاس بیت یا گڑا جنگ
درستاناں ھلاس کُت کنت۔
بیست ءُ یکمی کرن ٹیکنالوجی ءُ اے آئیءِ دور گُشگ بیت ءُ اے دور ءَ اے آئی ءُ ٹیکنالوجی
بس پہ مھلوک ءَ کار ءَ نہ اِنت بلکیں راج ھم آے آئی ءُ ٹیکنالوجی ءَ وتی استانانی
رکینگ ءَ پہ کارمرز کنگ ءَ اَنت۔ اے آئی ءُ ٹیکنالوجی ءِکمُک ءَ گوں ھمُک
استانی انٹیلیجنس اَنچیں مشین جوڑ کنگ ءَ
اَنت کہ دومی استان ءَ چہ مُھکمتر بہ بنت ءُ ھمے ٹیکنالوجی ءُ اے آئی ءِ تاکت ءِ
ریس ھم جھان ءَ یک ٹیکنیکل جنگے ءِ نیمگ
ءَ برگ ءَ اِنت ۔ اے ٹیکنیکل جنگ ءَ ھما استان ءُ راج مُھکم بوت کن اَنت کہ آ اے
آئی ءُ ٹیکنالوجی ءَ دستے دیم ءَ اَنت۔
نوکیں دور ءَ نوکیں ٹیکنیکل وارفئیر ءِ
بندات کُتگ ءُ اے وارفئیر مارا سائبر ءُ ڈرون وارفئیر ءِ دروشم ءَ یک مھکمیں وڈے ءَ
گندگ ءَ کیت۔
سائیبر وارفئیر
سائیبر جنگ ءَ نوکیں دورءِ ٹیکنیکل جنگ ءَرا یک نوکیں دروشمے داتگ ءُ اے جنگ چہ ساری ءِ جنگاں تیوگءَ جتا اَنت ۔ایشی ءِ لوٹ ءُ مول ءُ
مراد ھما اَنت بلے ایشیءِ رنگ ءُ ترزداب دِگر اَنت۔ سائیبر وارفئیر ءِ بزانت اِیش اِنت
کہ ٹیکنیکل ٹول بزاں کوڈنگ ، ھیکنگ پروگرامنگ ءُ ڈیجیٹل مشین کمپیوٹرانی کمُک ءَ
گوں یک استانے دومی استان ءِ ھلاپ ءَ ڈیجیٹل جنگے کنت ءُ وتی پائدگاں کش ایت ۔ سائبر اُرش ھمے جنگ ءِ یک
بھرے کہ پہ انفارمیشن ( جنگی، اکانومیکل، انڈسٹریل)ءُ ایدگہ چیریں ڈیٹایانی کشّگ ءَ پہ یک مھکمیں ڈولےءَ کارمرز بوئگ
ءَ اَنت ۔
سائیبر جنگانی ما بندپترءَ بچار ایں گُڑا اے جنگانی بندات کساس بیست ءُ
یکمی کرن بزاں دو ھزار ءَ چہ پد بیت وھدےکہ ٹیکنالوجی ءِ یک نوکیں آشوبے اے آئیءِ دروشم ءَ ودی بیت بلے اولی
سائیبر جنگاں اے آئی مُھکمیں ڈولے ءَ کارمرز نہ بوتگ پمیشکہ اے جنگ یک ھدے ءَداں
مُھکم بوتگ اَنت ءُ ھمے جنگانی نسبت ءَ مروچی ئیں جنگ کہ اے آئی ءِ زور ءُ کمک ءَ بوئگ ءَ اَنت،گیشتر
تورناک اَنت۔
زمانگی ئیں سائیبر اُرشانی درور
سائبر جنگ چہ بُن ءُ بیھہ ءَ یک ھترناکیں جنگے گُشگ بیت کہ اے جنگ چہ گوست ءِ ھمُک ڈولیں جنگاں
گیش تاوان دنت بلے اے جنگ ٹیکینیل جنگے ءُ اے جنگ ءَ انسانی جان ءِ تاوان نہ بیت
بلکیں تچکی ءَ استانی ادارہاں تاوان بیت۔ گوست ءَ چوشیں باز
جنگ گِندگ ءَ نئیت بلے بیستمی کرن ءِ آسر ءُ بیست ءُ یکمی کرن ءِ بندات ءَ اے جنگ
ءَ دیمروی پیداک بوان بوتگ۔سائبر
جنگ ءِ لہتیں دور اَنت کہ آ دا مورس وارم-1988 ،دا
روم لیبارٹری ھیک-1994،مون لائیٹ میز -1998-1999 ءِ کسانیں سائیبر اُرش بوتگ اَنت کہ ایشاناں یک
نوکیں جنگے دیم ءَ آؤرتگ کہ سائیبر جنگ ءِ
دروشم ءَ زانگ بیت بلے اے اُرشانی تاوان پہ ھچ استان ءُ راج ءَ نہ بوتگ۔ بس یک
کسانیں ھدےءَ داں اداراہ ءُ مھلوک سانمند
بوتگ اَنت۔
Titan
Rain(2003)
اے جھا نی بُندپتر ءِ اولی مستریں سائیبر
اُرش اِنت کہ یک استانے ءَ دومی استان ءِ ھلاپ ءَ پہ آئی تاوان دیگ ءِ ھاتر ءَ کُتگ۔ اے اُرش چین ءِ ھیکنگ
گروپ ءَ آمریکہ ءِ سیٹلائیٹ ، ناسا ءُ میلیٹری انفارمیشن کشگ ءِ ھاتر ءَ کُتگ ۔ اے
اُرش ءِ مستریں مول ءُ مراد ہمے پدر کنگ
بوتگ کہ سائیبر وار ءُ سائیبراُرش پہ راجاں وتی پائدگانی ھاترا ھم کارمرز بوت کنت۔
STUX.net(2010)
آامریکہ Stux.net آمریکہ ءُ اسرائیل ءِ نیمگ ءَ چہ
ایران ءِ نیوکلئیر پاور ءِ سرا بوتگیں یک
سائبر اُرشے کہ 2010 ءَ پدّر بیت۔ اے
سائیبر جنگانی تاریخ ءَ مستریں جنگ اِنت کہ آئی ءَ یک استانے ءَ جسدی سان ھم داتگ اَنت ۔ اے اُرش ءَ ایران ءَ
نیوکلئیر پروجکٹ ءَ بلائیں تاوانے داتگ ءُ سائبر اُرشاناں یک مھکمیں رنگے داتگ۔
یوکرین( 2015)
یوکرین ءُ روس ءِ جنگ ءَ بلائیں مُدتے گوستگ کہ بوئگ ءَ اِنت۔ ھمے جنگ ءِ تہ ءَ مارا سائیبر
ءُ ڈرون اُرش بلائیں ھدے ءَ گِندگءَ کاینت کہ یوکرین ءُ روس وتی تاوانباری ءَ پہ
یک ءُ دومی ءِ ھلاپ ءَ کارمرز کنگ ءَ اَنت۔ ھمے سائبر اُرشانی تہ ءَ یک اُرشے روس
ءِ نیمگ ءَ چہ 2015 ءَ کنگ بیت ءُ اے
سائبر اُرش یوکرین ءِ بجلی مینجینگ کمپیوٹراں سانمند کنت ءُ ھمے سوب ءَ سرجمیں
یوکرین ءَ بلیک آؤٹ بیت ءُ اے اولی بلیک
آؤٹ اَت کہ سائیبر اُرشے ءِکمُک ءَ کنگ
بوتگ۔
SOLAR
WINDS(2020)
سولر ونڈز آمریکہ ءِ کمپنی یے کہ آ
سرجمیں آمریکہ ءِ کمپیوٹراں وتی چیردستی
ءَ جُنزین ایتءُ ھر چی کہ ڈیٹا یا انفارمیشن
آ کمپیوٹرانی ھست ،آ دُرست ھمے کمپنیءِ
دار ءُ مدار ءِ تہ ءَ اَنت۔ ھمے انفارمیشن ءُ ڈیٹا ءِ دُزگ ءُآمریکہ ءَ تاوان دیگ
ءِ ھاتر ا 2020 ءَ روس ءِ ریاستی ھیکر اے کمپنی ءِ کمپیوٹراں ھیک کن اَنت ءُ سائبر
اُرشے بندات کن اَنت ۔ اے اُرش ءَ آمریکہ ءِ کمپیوٹر دُرست وتی کنٹرولءَ چہ در
کاینتءُ آمریکہ ءِ ھساسیں انفارمیشن دُزگ بنت۔
ھمے پیمیں بازیں سائبر اُرش مارا نوکیں دور
ءَ گِندگءَ کاینت ءُ ھمے اُرش اے آئی ءِ دور ءَ سک دیمروی کنگ ءَ اَنت کہ ھمُک
مُلک ءُ ھمک راج پہ وتی رکینگ ءَ ءُ پہ دژمن ءَ تاوان دیگ ءَ اے اُرشاں کارمرز کنگ
ءَ اِنت۔
اے آئی ءُ سائیبر وار
گوست ءَ سائیبر اُرش چو
مُھکم نہ بوتگ اَنت۔ آئی ءِ مستریں سوب انسان ءِ کوڈنگ ءِ تہ ءَ ردی بوتگ اَنت ءُ
کمپیوٹر سسٹم ءِ ناکامی بوتگ۔پہ سائیبر اُرشےءِ ھاتر ا یک راجے ءَ بلائیں وھدے ءَ
چہ پیسر وتی کوڈنگ ءُ پروگرامنگ کنگی اِنت ءُ ایشی ءَ بلائیں وھدے ءِ درکاربیت بلے
میزان میزان ءَ کہ اے آئی ءَ دیمروی کُتگ۔ سائیبر اُرشاں ھم ترندی یے سما
کنگ بوتگ ۔اے آئی ءِ کمُک ءَ یک ریاستے وتی کمپیوٹر ءُ ڈیجیٹل ٹولزاں انچوش تیار
کنت کہ اگاں انسان وتی ھیکنگ پروگرام کوڈنگ ءِ تہ ءَ ردی ھم کنت گُڑا ھما اے آئی کمکیں
کمپیوٹر
آ ردی ءَ شر کنت ءُ چہ ایشی
ءَ یک مُھکمیں اُرشے بوت کنت۔ بزانت اِیش اِنت کہ
اے آئی ءِ مُھکمی نا بس پہ انسان ءِ جیڑھانی ارزانی ءَ کارمرز بوئگ ءَ اِنت بلکیں
اے نوکیں دورءِ جنگ ءُ ریاستی پالیسیاں ھم
نوک ءُ توانائیں دروشمے دیگ ءَاِنت۔ھمے جنگ کہ گوست ءَ کسانیں تاوانے ءَ گوں آس
بوتگ اَنت بلے نوں یک استانے بس وتی کمپیوٹر
ءِکمُک ءَ مزنیں تبائی یے آؤرت کُت کنت۔
ڈرون وارفئیر
مروچی ئیں اھد بیست ءُ
یکمی کرن ءَ ڈرون ءِ ارزشت پہ یک استانے
ءَ ھما پیم ءَ اِنت کہ بیستمی کرن ءِ جنگاں توپ ءُ جنگی جھازانی بوتگ۔ ڈرون ھما جھازانی
ٹیکینیکل دروشمے کہ چہ آیاں گیش تاکتور ءُ گیش ترند اِنت ءُ ھمے ڈرونانی جنگ ءَ
بیست ءُ یکمی کرن ءَ ڈرون وارفئیر گُش اَنت۔
نوکیں کرن ءَ ڈروناں ھمُک استان پہ وتی رکینگ ءُ وتی دژمن ءَ
تاوان دیگ ءَ کارمرز کنگ ءَ اَنت۔ ڈرون ءُ سائبر جنگ یک ءُ دومی ءَ چہ جتا اَنت پرچاکہ سائبر ھیکنگ ءُ کوڈنگ ءِ جنگ اِنت ءُ ڈرون نشانگ ءُ کُشگءِ جنگ اِنت بزاں ڈروناں ھمے بودناکی
گون اِنت کہ آ دژمنءَ یکبرے ٹارگٹ کن اَنت ءُپدا آئی ءَ ڈرون اُرش ءِ رنگ ءَ کُش اَنت ۔
ڈرون ءِ گیشتریں کار ہمیش اَنت کہ آ دژمن
ءِ بُنجالاں پَٹ ایت، دُژمن ءِ سرا آزمانی
اُرش کنت ، دژمن ءِ جنگی پوزیشنءُ موؤمنٹ
ءَ پد جَنت ءُ کیمراھانی
کمک ءَ یا میسج پارم ءَ وتی ملٹری ءَ سر کنت۔
ڈرون وارفئیر مروچی ئیں جنگی لوٹ اِنت پرچا
کہ ایوک ءَ یکیں ملک اگاں ڈرون جنگ ءَ
مھکم بیت گُڑا دومیءُ سیمی ملک بلائیں
تاوانے وارت کن اَنت ءُ ھمے استانانی یک ءُ دومی ھلاپ ءَ پہ ڈروناں مھکم بوئگ ھم
یک مکابلہ یے ودی کنگ ءَ اِنت۔
گوست ءَ ڈرون وارفئیر چو ترند ءُ مھکم نہ
بوتگ بلے مروچی ئیں اھدءَ ڈرون ءِ ارزشتءَ
ھمک راج ءُ ھمک استان مارگ ءَ اِنت۔ گوست
ءِ ڈرون جنگانی سرا کسانیں چمشانکے بہ دے اِیں گُڑا مارا گِمدگءَ کیت کہ گوست ءِ جنگ چو مُھکم نہ بوتگ
اَنت ءُ اِیشی ءِ مستریں سوب اے آئی ءُ ٹیکنالوجی ءِ نزور بوئگ اَت۔آ وھد ءَ بزاں
اے آئی ءُ ٹیکنالوجی نہ بوتگ گُڑا ڈرون بس یک ھدے ءَ داں کار اَتکگ اَنت پرچا کہ
آیانی کرا وتی جیڑگی بودناکی نہ بوتگ ءُ نئیکہ آیانی کر ا چوشیں بلائیں انفارمیشنے
ھست اَت۔
ویتنام ءُ آمریکہ ءِ جنگ
وھدے کہ 1960ءُ 1970ءِ زمانگ ءَ ویتنام ءُآمریکہ
ءِ میان ءَ جنگے بندات بیت ءُ اے جنگ ءِ مول ءُ مراد ویتنام ءِ آجوئی ءِ گرگ بیت گُڑا آمریکہ وتی جنگی بودناکیاں ویتنامءِ جنگول ءُ مھلوک ءِ ھلاپ ءَ کارمرز کنت۔ ھمے جنگی سلِاہانی
توک ءَ ڈرون ھم ھوار بوتگ اَنت کہ آمریکہ ءَ پہ ویتنام ءِ تاوان دیگ ءَ کمک ئے
کُتگ اَنت ۔اے ڈروناں بلائیں ھدے ءَ داں آمریکہ ءَ کمک داتگ بزاں ھمے ڈرونانی کمک ءَ
گوں آمریکہ ویتنام ءِ جنگولانی جاگہءُ دوارجاہ ٹریس کُتگ اَنت ءُ پدا دڑون اُرش
کُتگ اَنت ءُ اے ڈروناں ریان فائربی نام دیگ بوتگ۔
اسرائیل ءُ آمریکہ ءِ سیادی
1980 ءِ زمانگ ءَ اسرائیل وتی گواتی سلِاھانی جوڑینگ ءَ پہ دگنیا
ءِ تہ ءَ بلائیں نامے بوتگ ءُ بازیں ڈرونانی جوڑینگ ھم بندات ئے کُتگ گُڑا آمریکہ وتی نپانی ھاترا گوں اسرائیل ءَ سیادی جوان کُرتگ اَنت ءُ ھواری ءَ نوک نوکیں ڈرونانی جوڑینگ بندات کُتگ۔ ھمے ڈرونانی توک ءَ ایشانی یکجائیں یک ڈرونے RQ-2
Pioneer اِنت کہ 1980ءِ میان ءَ جوڑینگ بوتگ ءُ پدا 1991 ءِ گلف جنگ ءَ ایراق ءِ ھلاپ ءَ کارمرز کنگ
بوتگ۔
آمریکہ ءِ وار آن ٹیرر
آمریکہ 2001 ءِ میان ءَ القائدہ ءُ سدام
ھسین ءِ ھلاپ ءَ جنگءِ بندات ءَکنت گُڑا آمریکہ بازیں پروپیگنڈا ءُ بیانیہ دیم ءَ کارایت
کہ سدام ھسین ءُ القائدہ انچیں سلاہ جوڑ کنگ ءَ اَنت کہ لس مھلوک ءَ تاوان دینت ءُ
تبائی کاراَنت ۔ ھمے پروپیگنڈانی بُنیاد ءَ وار آن ٹیرر ءِ نام ءَ جنگے بندات کنت۔ اے جنگ
ءِ تہ ءَ آمریکہ اوگانستان ءُ ایراق ءِ
الاکہانی سرا اُرشانی دْرچے جُنزین ایت ۔ادءَ آمریکہ گیشتری
وتی نوکیں جنگی سلِاھانی کارمرز ءَ
کنت بزاں ٹیکینکل سلاہاں کہ آیانی تہ ءَ ڈرون ھم
ھواراَنت۔ھمے جنگ ءَ آمریکہ وتی MQ-1
predator ءُ MQ-9
reaper وڈیں ڈرون کہ مھکم تریں ڈرون اَنت ، ہمیشاں کار بند ایت۔
اے آئی ءُ ڈرون وارفئیر
نوکیں جہان ءِ مٹی ءَ اے
آئی ءِ بلائیں دستے مان اِنت ءُ ھمے اے آئی مروچی جنگ ءِ اَبرم ءَ ھم مٹ کنگ ءَ اِنت ۔ ڈرون وارفئیر کہ مروچی ئیں جنگی لوٹ اِنت ۔اے آئی ءِ کمک ءَ گیش مھکم تر کنگ بوئگ ءَ اِنت۔ پیسرا ڈرون تہنا
کسانیں پروگرامڈیں انفارمیشنے ءَ کار کنگ
ءَ بوتگ اَنت ءُ تہنا ٹریکنگ ءُ کسانیں ھدے ءَ داں اسٹرائیک ءَ پہ کارمرز بوتگ اَنت
بلے 2014 ءَ چہ رند ڈرون وارفئیر ءِ تہ ءَ اے آئی ءَ مٹی آؤرتگ ءُ ڈرون نوں وتی
ھیال ءُ وتی سوچ ءَ گوں کار کُت کن اَنت۔ آیانی تہ ءَ یک جیڑگ ءِ ھاٹیگے ودی کنگ بوتگ کہ کُجام جاگہءَ چی کنگی اِنت ءُ چوں اسٹرائیک کنگی اِنت۔اے آئی
اسسٹد ڈرونز مروچی ھمُک استان ءِ کرا ھست اَنت ءُ ایشانی کار چہ ساری ئیں زمانگ ءِ ڈروناں مُھکم ءُ ترند تر اَنت۔ اے آئی اسٹٹد
ڈرون مروچی ھمُک جنگ ءَ کامررز بوئگ ءَ اَنت ۔آ روس یوکرین جنگ بہ بیت، اسرائیل
پلستین جنگ بہ بیت یاکہ دومی سیمی جنگ بہ بنت۔اے ڈرونانی کار وائی باز مانا دار
اَنت پرچا کہ اے ڈرون وت وتی مستر اَنت۔ ایشاں کسی کنٹرول ءِ زلورت نہ بیت ۔آ زان
اَنت کہ کُجام جاگہءَ چوں کنگی اِنت ءُ چی
وڈ کنگی اِنت۔
اے آئی ءُ جھان ءِ باندات
بیست ءُ یکمی کرن ءَ اے
آئی ءَ جھان ءِ ھمُک رنگ مٹ کنگ بندات کُتگ ءُ آؤکیں باندات ءَ اے ٹیکنالوجی دنیا ءَ نوکیں نیمگے ءَ برگ ءَ اِنت۔ وانگ ءَ بگر داں
انڈسٹریزاں اے آئی ءُ کمپیٹر سسٹم کارمرز بوئگ ءَ اَنت۔ آؤکیں وھد ءَ ھمے اے
آئی مھلوک ءِ کاراں انچوش ھلاس کنت کہ درستیں
دنیا گوں مشین ءُ کمپیوٹراں جنزایت ءُ انسان ءِ کار بس یک کمانڈے دیگءَ سر کیت۔ اے آئی ءُ ٹیکنالوجی ءَ مروچی ئیں لوٹ ءُ گُزر ھم مٹ کُتگ اَنت۔ مروچی یک استانے ءِ مستریں لوٹ آئی پوج نہ اِنت،
آئی ءِ معاش نہ اِنت بلکیں اے آئی ءُ ٹیکنالوجی اِنت۔
روس ءِ سروزیر وتی یک گُشتانکےءِ تہ ءَ گُش ایت کہ آؤکیں وھد ءَ ھما ملک ءُ لیڈر کہ اے آئی ءَ مُھکم بوتگ اَنت آ جھان ءَ
کنٹرول کن اَنت۔
اے آئی ءِ مھکمی ءُ ارزشت مارا ھمے چیزانی
توک ءَ گندگ ءَ کیت کہ مروچی جھان ءِ تاکتانی جھل ءُ بُرزی ھمے یکیں ٹیکنالوجی ءِ سرا اِنت۔
ھما راج ءُ استان انفارمیشن ٹیکنالوجی ،
ڈیٹا سائنس ءُ اے آئی ءَ مُھکم بنت گُڑاآ راج باندات ءِ ورلڈ پاور ءِ رنگ ءَ دیم
ءَ کاینت ۔
آؤکیں وھد ءَ وانگ ءُ زانگ، انڈسٹریز، وانگجاہ، نادراہجاہ، بینک
بزاں کہ ھمُک چیز اے آئی ءِ دست ء چیر ءَ کاینت ءُ اے آئی اشاناں کنٹرول کنت ۔
اے آئی ءَ نوکیں دورءِ جنگاناں نوکیں دروشمے داتگ ۔ زیکیں جنگ کہ بس
گوں تیر ءُ توپاں بوتگ اَنتءُ مروچی گوں
کمپیوٹر ءُ مشیناں بوئگ ءَ اَنت ءُ ھمے جنگ باندا گوں اے آئی اسسٹد روبوٹاں کنگ
بنت۔جنگ ءِ ٹیکٹس مٹ بوان اَنت ۔اے آئی سائیبر وار ءَ بگرداں ڈرون وار ءَ دُرستاں وتی کنٹرولءَ آرگ ءَ اِنت۔
اے آئی ءِ باندات سک باز مُھکم اِنت بلے
ھماں ملک یا راج کہ اے آئی ءُ ٹیکنالوجی ءَ پشت کپت اَنت، آبیست ءُ یکمی کرن
ءَ وتی پجار ءَ داشت نہ کن اَنت۔ہمے رنگ
ءَ استانءِ مال ءُ مڈی، پوج ءُ ھند ہچ مانا نہ دارانت دانکہ آ ٹیکنالوجی ءَ
مُھکم مہ بیت۔
بلوچ ، بیست ءُ یکمی کرن ءُ ٹیکنالوجی
بلوچ گُلامیں راجے ءُ گُلامی ءِ سانکلاں بندیگ اِنت۔ھمُک کبزہ گیر
ءِ وڈ ءَ پاکستان ءَ ھم بلوچ ءِ ھلاپ ءَ
ٹیکٹس ءُ پالیسی کارمرز کُتگ اَنت۔ آ بھر ءُ بانگی ءِ پالیسی بہ بیت، کُشگءُ دور دیگ بہ بیت یاکہ سرداری نزام بہ بیت۔بلوچ ھمک رنگیں شوربندیانی آماچ اِنت۔بلوچ اے پالیسیاں چہ مزنیں ھدے ءَ داں
سانمند ھم بوتگ ءُ ھما سوب اِنت کہ بلوچ داں روچء مروچی گُلام اِنت۔ بلے ابید چہ
اے پالیسی ءُ ٹیکٹساں بلوچ ءَ وانگ ءُ زانگ ءِ ربیت نیستی ءِ برابرءَ اِنت۔ ریاست ءَ بلوچ ہماھد ءَ
داں ایردست کُتگ کہ بلوچ مروچی ٹیکنالوجی ءِ تہنا نام ءَ سرپد اِنت۔بلوچ ءِ لس
مھلوک انچوش ایرماد کنگ بوئگ ءَ اِنت کہ آ
نوکیں دورءِ لوٹاں چہ نا آشنا اِنت۔ھمے سوب اِنت کہ بلوچ مروچی ئیں دور ءَ ھم بزگ ءُ لاچار اِنت۔
اے
اھد اے آئی ءُ ٹیکنالوجی دور اِنت ءُ مروچی ئیں زلورت ہمیش اَنت بلےبلوچ راج ءِ
ٹیکنیکل دور ءَ اے آئی ءُ ٹیکنالوجی ءِ ارزشت ءِ پہمگ ءَ نزوری پیشدارگ ءَ اِنت ۔ھمے
سوب اِنت کہ مئے دژمن مارا چہ گیش مُھکمی ءَ گوں اے آئی ٹولزاں مئے ھلاپ ءَ کارمرز
کنگ ءَ اِنت ۔اے دور آؤکیں راجی وجود ءُ آکبت ءَ گیشین ایت کہ کُجام راج باندا وترا رکینت کنت ءُ
کجام ٹیکنالوجی ءُ اے آئیءَ نزور بوئگ ءِ سوب ءَ نزور ءُ گار بیت۔ بلوچ یک گنجیں زمینے ءِ وارث اِنت ءُ بلوچ ءَ مال ءُ
مڈی ءُ زر ھم ھست بلے بلوچ ءِ مستریں لوٹ مروچی ٹیکنالوجی ءُ اے آئی اِنت دانکہ
بلوچ اے پڑءَ وت ءَ مُھکم مہ کنت بلوچ آؤکیں دور ءِ جنگاں وت ءَ ھچ رنگ ءَ رکینت نہ کنت۔
آؤکیں دور ٹیکنالوجی ءِ مُھکم تریں دور اِنت ءُ
ھرچیز ٹیکنالوجی چیردستی ءَ کیت کہ
آ جنگ بہ بیت، وانگ ءُ زانگ بہ بیت، انڈسٹریز بہ بنت یا دومی سیمی چیز گُڑا اے وھد ءَ بلوچ ءَ
چارگی اِنت کہ کُجام چیز پہ بلوچ ءَ پائدگ مند اِنت۔
بلوچ اگاں مروچی راجے ءِ بستار ءَ وت ءَ
دنیا ءِ دیم ءَ منارینگ لوٹ ایت ، وتی نام ءُ پجارءَ دنیا ءَ دارگ لوٹ ایت گُڑا
بلوچ ءَ را اے دور ءَ و ترارکینگ ءَ پہ اے آئی ءُ ٹیکنالوجی ءِ اصولاں سرپد بوئگ المی
اِنت۔بلوچ ءَ زانگ لوٹ ایت کہ اے وھد ءَ کُجام چیز پہ بلوچ ءَ پائدگ مند اِنت ءُ
کُجام چیز ءَ چہ بلوچ ءَ درکپگ لوٹ ایت ءُ کُجام ٹیکنیکل سکلز زانگ لوٹ اَنت کہ آ
بلوچ ءَ چہ بلوچ ءِ دژمن ءَ گیش مُھکم ءُ گیش ٹیکنیکل بہ کن اَنت۔
دومی نیمگ ءَ بیست ءُ یکمی کرن ءَ جنگی تررزداب مٹ بوئگ ءَ اَنت ءُ بلوچ چوشکہ وتی دفاع ءِ جنگ ءَ اِنت گُڑا الم اِنت کہ بلوچ ھمے ٹیکینکل ٹولزاں وتی جنگ
ءَ کامرز بہ کنت۔ بلوچ اے آئی ءَ پہ وتی دُژمن ءِ ھلاپ ءَ بازیں ٹولزانی وسیلہ ءَ گوں کارمرز کُت کنت۔
بلوچ وتی جنگی انٹیلیجنس ونگاں اے آئی الگارتھم ءَ گوں گیش مُھکم کُت کنت۔ بلوچ
سائبر ڈیفینس ءُ ڈرون وارفئیر وسیلہ ءَ
گوں وتی جنگ ءَ مُھکم کُت کنت۔ چوشکہ اے آئی ءَ سائبر وار ءُ ڈرون وار گیش مُھکم کُتگ گڑا مروچی بلوچ
ءَ ھمے چیز پھمگ ءُ زانگ لوٹ اَنت ءُ ھمے چیزانی سرا کار کنگ لوٹ ایت ءُ پہ وتی
رکینگ ءَ نوکیں دورءِ تکنیکی سلاہ کامرز کنگ لوٹ اَنت۔کسانیں گالردے ءِ توک ءَ
بلوچ ءَ اے آئی ءَ زبر بوئگ لوٹ ایت پرچا کہ مروچی دنیا ءَ ھاکم اے آئی اِنت ءُ ھر
چیز اے آئیءِ گردارءِ
تہ ءَ اِنت۔
آسر
بُن اسل ءَٹیکنالوجی ءِ بندات
چہ نوزدہ سدءِ وھد ءَ بوتگ ءُ دنیا مروچی وتی درستیں کاراں ڈیجیٹل ٹولزانی وسیلہ گوں پیلو کنگ ءَ
اِنت۔سرجمیں استان ءُ راج وتی ھر پڑ ءَ وانگ ءَ بگرداں گس ءِ کاراں اے آئی ءِ کمُک
زورگ ءَ اَنت۔ استانانی روزیگ ،جنگ، وانگ
ءُ زانگ ءِ سسٹم، سیاست، نادراہجاہ دُرست پِڑ اے آئی ءُ ٹیکنالوجی ءَ گوں بندوک
اَنت۔ بیست ءُ یکمی کرن ءِ بندات اِنت بلے اے آئی وتی وھد ءَ چہ پیش انچوش مُھکم
بوتگ کہ مروچی دبئی استونیا وڈیں ملک وتی ھکومت ءَ ڈیجیٹل ٹولزانی وسیلہءَ گوں
جنزینگ ءَ اِنت۔ ھمے پیم ءَ نیپال ءَ ما بچارایں گُڑا مارا سما بیت کہ نیپال ءِ
نوکیں ورنا (Genz)
وھدے ھکومت ءِ ھلاپ ءَ زھرشانی کنت ءُ یک بلائیں آشوبے کارایت گُڑا آیانی پیسری
ئیں سروزیر کشگ بیت ءُ نوکیں سروزیرے ءِ درچنگ
ءَ جِن زی پدریچ آنلائن ایپ ( Discord) ءِ سرا باوست کن اَنت ءُ
گچین اَنت۔ اے درور ءِ مول ءُ مراد اے گپ ءِ سرپد کنائینگ اِنت کہ مروچی ٹیکنالوجی
ءُ اے آئی چوںمُھکم اِنت ءُ چوں دنیا چہ ایشی ءَ پائدگ چست کنگ ءَ اِنت۔
دومی
نیمگ ءَ بلوچ اِنت کہ مروچی ئیں اھد ءَ انگت گُلام اِنت ءُ آئی ءِ زمین ءِ سرا درآمدانی
کبزہ اِنت ۔اے وھد ءَ بلوچ اے آئی ءُ ٹیکنالوجی ءَ تہنا نام ءَ زانت۔اے سک ءَ
تکانسریں گپے کہ یک نیمگے دنیا اِنت کہ
مشین ءُ روبوٹاں گوں کار ءَ اِنت دومی نیمگ ءَ بلوچ اِنت کہ اے ہم نہ زانت کہ روبوٹ چی یے ءُ اے آئی ءُ ٹیکنالوجی چوں کار کنت۔جھان گوں ٹیکنالوجی ءَ دیمروی کنان اِنت ءُ ھچ رنگ ءَ اے آئی ءِ ترندیں آشوب
دارگ نہ بیت۔ اگاں بلوچ وت ءَ گوں مروچی ئیں جھانی لوٹاں بندوک مہ کنت گُڑا بلوچ ءَ پہ اے مُھکمیں دور ءَ وترارکینگ
گران کپ ایت۔ بلوچ ءَ لوٹ ایت کہ اے وھد ءِ لوٹ ءُ گزراں بہ پہم ایت ءُ ٹیکنالوجی ءِ
نیمگ ءَ دلگوش گْور بہ کنت۔اے آئی مروچی ھر کار ءِ ھاترا کارمرز بوئگ ءَ اِنت۔ آ
زبان ءُ راج ءِ رکینگ بہ بیت، جانسلامتی بہ بیت، جنگ بہ بیت، معاش ءُ انڈسٹریز بہ بنت ،سیاست ءُ وانگ ءُ زانگ بہ بیت۔ باید اِنت کہ بلوچ اے دور ءِ لوٹاں چہ پَشت مہ کپ ایت ءُٹیکنالوجی
ءَ پہ وتی ھر پڑ ءِ نپاں کارمرز بہ کنت۔اگاں بلوچ مروچی ئیں دور ءَ پَشت کپت گُڑا باندا بلوچ ءِ دژمن بلوچ ءَ ٹیکنیکل جنگ ءَ
پروش دات کن اَنت ءُ بلوچ وتی پجار، زبان ءُ دودربیگاں ھچ رنگ ءَ رکینت کُت نہ
کنت۔ پہ وتی راجی پجار ءِ رکینگ ءَ الم اِنت کہ ما بلوچ ءِ بستار ءَ
وتی بند ءُ بست ءَ ٹیکنالوجیءُ اے آئی ءِ درگت ءَ پیسر ءَ چہ جریدگ بہ کن
ایں ۔
ریفرینسز:
1: History of
Artificial intelligence |Dates,Advances,Alan Turing,Eliza
&Facts|Britannica By B.J Copeland
2:Ai History :Key
Milestones Thats Shaped Artificial intelligence |Grammarly ,Updated March
26,2025
3:A Breif History
of Ai :how to prevent another winter(a critical review)
AmirHosein Toosi
,Andrea Bottino,Babak Saboury,Eliot seigal,Arman Rahmim | Arxiv, Published
september 2021,Updated december 2022.
4:The Brief
History of AI: the world has changed fast —what might be next? |By Max Roser
,Published December 6,2022
5:Transcript:
Feature Weapon bettle feild AI | John Thrill Talks To Nadim Nashif,Hamutal
Meridor and Elke Schwarz | Published April 29,2025
6:How Drones are
Transforming what warfare looks like—whats coming next |By The Week Uk |Published June 29 2025
7:Military Ai
Revolution Heightens competition for defence tech contracts |Peter Apps|
Reuters| Updated september 5,2025
8:From Operators
to Ai’s Control :Assessing the killer drones future role in warfare | Insight
Turkey | Updated Thursday,July 24,2025
9:Agentic Ai and
the Cyber Arms Race | By Sean Oesch, Jack Hutchins, Philip Austria, Amul
Chaulagaun | Published on 10 Feb 2025
10: Artificial
Intelligence and Arms Control | By Paul Scharre and Megan Lamberth | October
2022
11:اے
آئی ءِ جنگ، بلوچ کُجا اوشتاتگ؟ |ھارون بلوچ |بی ایس او آزاد| شنگ 17 مارچ 2025
12: اے
آئی : ھستیں وھد ءِ جنگی سیاسی ءُ تاکت ءِ سلاہ | دوستین بلوچ| سگار تاک 26|بی ایس
او آزاد|چھاپ نومبر 2025
