سیاسی گہگیری
ءُ بلوچ اُلس
پجار ءُ بندپتر:
دگنیا
ءِ گوستانک ھزاراں سال کُہن اِنت ءُ اے میان ءَ دگنیا ءِ تہ ءَ بازیں چیز دیم ءَ
اتکگ اَنت، سنگانی زمانگ ءَ بگرداں روچء مروچی اے آئی ءُ ٹیکنالوجی ءِ زمانگ ءَ،
لہتیں انچیں چیز ھست اَنت کہ ھما پیم ءَ جُنزان اَنت۔ ما گُشت کن اِیں کہ اے
انچیں ابرمی راستی اَنت کہ ھچبر مٹ نہ بنت، جنگ ءُ جدل، نپ ءُ تاوان، زر ءُ مال ءُ
ایدگہ جیڑہ کہ گوں وھد ءَ گیش ءُ نوکیں دروشمے ءَ ودی بوتگ اَنت۔ بلے اے دراھیں
جیڑھانی بگیری ءَ مُدام کسے نہ کسے دیم ءَ دراتکگ ءُ گہگیری ءِ راہ ئِے گچین
کُتگ۔گہگیری ءِ بزانت وتی نپ ءُ سیت، پجار، لیکہ ءُ دودمان ءِ رکینگ ءِ ھاتر ءَ
زورگیر ءِ بگیری ءَ جُہد اِنت، ھمے کاریچ دیمتر ءَ گیش مہکم بوان ءَ سیاسی،
ربیدگی، روزیگی ءُ سلاہ بندیں گہگیری ءِ دروشم ءَ دیم ءَ اتکگ۔ مروچی ما ھما سرھال
ءَ گیشینیں آ سیاسی گہگیری بزاں کہ
Political Resistance اِنت۔ انگریزی
گالبند
“Political Resistance” جتائیں
زبانانی گالاں گوں جوڑ بوتگیں یک گالبندے کہ وتی تہ ءَ پراہ ءُ شاھگانیں بزانتے
داریت۔ گال پولیٹیکل کُہنیں یونانی گال “پولِس” ءَ چہ در اتکگ کہ آئی ءِ بزانت
“وتواکیں شہر، دمگ یا استان” اِنت۔ اے گال ارستو ءَ وتی کتاب پولیٹکس ءِ تہ ءَ ھم
گیشینتگ۔ گال “ریزسٹینس “ لاتینی زبان ءِ لبز “ریزسٹر” ءَ چہ دراتکگ کہ آئی ءِ
بزانت وتی “کار ءُ لیکہ ءِ ھاتر ءَ جہد
کنگ“ اِنت۔ اے
دوئیں گال وھدیکہ یکجاہ بنت گُڑا یک بلاھیں بزانتے دار اَنت۔ پولیٹیکل ریزسٹینس
بزاں سیاسی گہگیری ءِ بزانت وتی لیکہ، کار ءُ نپانی ھاتر ءَ منظمیں ءُ ایمنیں دابے
ءَ جُہد کنگ اِنت۔
ایردستیں راجے ءِ ھاتر ءَ سیاسی گہگیری
ءِ بزانت، پہ وتی راجی پجار، زمین، راجدپتر ءُ
دود ءُ ربیدگ ءِ رکینگ ءِ ھاتر ءَ دری زوراکانی بگیری ءَ منظم، مُچانکی ءُ ادارہی
دروشم ءَ جہد کنگ اِنت۔
“پہ راجی پجار، زمین مال ءُ مَڈیانی پھازگ ءِ
ھاتر ءَ درآمد ءِ بگیری ءَ مُچانکی، لیکہی، ادارہی دروشم ءَ گہگیری ءَ سیاسی
گہگیری ءِ نام دئیگ بیت”۔ سیاسی گہگیری انچیں بلاھیں کاریچے کہ یکیں وھد ءَ
گیشینگ نہ بیت ءُ وھد ءِ ھمرائی ءَ اے کاریچ مُدام دیم ءَ رؤان بوتگ ءُ نوکیں
دابے ءَ جنزیتگ۔ سیاسی گہگیری ءِ بنہشت چہ ارستو ءِ زمانگ ءَ بیت، اردیں ارستو وتی
ھیال ءُ جیڑھانی تہ ءَ تاکت، لس مہلوک ءُ آیانی وتواکی ءُ زورآور ءِ بارو ءَ
باوستاں ودی کنت۔ دیمتر ءَ ھمے کاریچ سیزدھُمی کرن ءَ میگنا کارٹا ءِ عملانی تہ ءَ
گندگ ءَ کئیت وھدیکہ آ وتی اھد ءِ بادشاہ ءِ بگیری ءَ توار چست کنت ءُ اے ھبر ءَ
پدر کنت کہ تاکت ھم پروش دیگ بیت، ھمے کاریچ مُدام گوں اھدی لوٹاں وتی دروشم ءُ
داباں مٹ کنان کنت ءُ ھبدھُمی کرن ءَ سیاسی گہگیری ءِ سر ءَ باوست کنان ءَ جان
لاک یک نوکیں دیدانکے دیم ءَ کاریت ءُ گُشیت کہ لس مہلوک ءَ مُدام اے ھک ھست کہ آ
زورگیر ءِ ھلاپ ءَ توار چست کُت کنت۔ ھمے دیدانک ءَ چہ سیاسی گہگیری ءِ یک تچکیں
ءُ پدریں بزانتے دیم ءَ کئیت ءُ مہلوک اِشی ءَ پہ وتی نپانی رکینگ ءِ ھاتر ءَ
کارمرز کنت۔
ھژدھُمی
کرن ءَ وھدیکہ دگنیا ءَ زورگیر ءُ تاکتورانی ھلاپ ءَ زرمبشت چست بنت گُڑا اے زرمبشتانی
تہ ءَ سیاسی گہگیری بلاھیں کردے پیلو کنت۔ آئی درور مارا امریکہ ءُ فرانس ءِ آشوب
ءِ دروشم ءَ گندگ ءَ کئیت۔ نوزدھُمی ءُ بیستُمی کرن ھما وھد انت کہ دگنیا بلاھیں
مٹی یے ءِ نیمگ ءَ رؤان کنت، جنگانی بندات، تاکت ءُ نوکیں شوربندیانی تہ ءَ گیشی،
ایردستی ءِ بندات، انڈسٹریل آشوب، پوریاگر گلانی مُہکمی، ٹیکنالوجی ءِ بندات، اے
دگنیا ءَ نوکیں نیمگے ءَ رھادگ کن انت، ھمے میان ءَ سیاسی گہگیری راجانی ھاتر ءَ
سلاہے ءِ پیم ءَ کار کنت ءُ آیانی پجار ءَ بگر داں زمین ءِ پھازگ ءَ سوبین بیت۔ بیستُمی
کرن ءِ لہتیں راجانی سیاسی گہگیری ءِ پرریسگ ءِ جُہد ءَ کن ایں کہ چون آہاں سیاسی
گہگیری ءِ وسیلہ ءَ وتی زمین ءُ پجار ءِ رکینگ ءِ جُہد کُتگ۔
بیستمی کرن ءِ راجانی سیاسی گہگیری:
بیستُمی کرن ءَ بازیں راج پہ وتی راجی
پجار ءُ ایدگہ نپانی ھاتر ءَ جنگ ءَ بنت کہ آیانی لہتیں درور مئے دیم ءَ اَنت۔
فلسطین:
فلسطین
مِڈل ایسٹ ءِ تہ ءَ یک انچیں زمین یے کہ چہ کرناں پہ وتی پجار ءِ جُہد ءَ اِنت ءُ
اے جہد سیاسی، سلاہ بند، روزیگی ءُ درملکی گہگیری ءِ کُمک ءَ مُہکمیں رنگے ءَ
جُنزان اِنت۔ فلسطین ءِ راجدپتر ءَ ما کسانیں چمشانکے دئیں گڑا مارا سما کپیت کہ
بیستُمی کرن ءَ وھدے کہ اولی جھانی جنگ 1914 ءَ بندات بیت گُڑا اے میان ءَ فلستطن
سُلطنت عثمانیہ ءِ بہرِ بیت ءُ یک آجوئیں زمین یے بیت کہ اود ءَ مسلمان، عیسائی،
یہودی یکجاہ زند گوازینگ ءَ بنت بلے وھدے کہ اولی جھانی جنگ بیت گُڑا سلطنت
عثمانیہ جرمنی ءَ کُمک کنت ءُ جنگ ءَ برطانیہ باج بارت ءُ آئی چہ پد سلطنت
عثمانیہ پرُشت ءُ پروش ءِ آماچ بیت ءُ فلسطین ءِ زمین برطانیہ ءِ ایردست بیت۔ ھمد
ءَ چہ فلسطین ءِ جیڑہ بندات بیت، برطانیہ وتی نپانی ھاتر ءَ یہودی ءُ مسلمانانی
میان ءَ جیڑھاں ودی کنت ءُ ڈنی مُلکاں چہ یہودی مہلوک ءَ کاریت ءُ فلسطین ءَ جاہ
دنت۔1919-1926 اے میان ءَ کساس 3 لکھ یہودی چہ دگنیا ءِ جتا جتائیں ملکاں، ھانک
کانگ، جرمنی، زمباوے, انگلینڈ ءُ ایدگہ جاگھاں فلسطین ءَ آرگ بنت۔۔۔برطانیہ ءِ
ھمے شوربندیانی سبب ءَ فلسطین ءِ نندوکیں مہلوک ءِ سر ءَ بلاھیں سانے کپیت ءُ دومی
نیمگ ءَ برطانیہ ءُ یہودی راج ءِ میان ءَ بلاھیں نزینکی یے ودی بیت، ھمے جیڑہ جُنزان
ءَ 1936 ءَ یک زرمبشت یے برطانیہ ءِ ھلاپ ءَ ماں فلسطین ءَ چست بیت ءُ اے زرمبشت
سئے سال ءَ داں جنزیت ءُ پدا ھلاسی ءِ نیمگ ءَ رؤت، اِشی ءِ مستریں سبب ھمیش بیت
کہ فلسطینی (مسلمان) مہلوک ءِ کرا مُہکمیں ادارہ ءُ جنزے نہ بوتگ کہ چرائی ءِ کمک
ءَ آیاں وتی پجار ءُ زمین ءِ رکینگ ءِ یکشلیں جہد برجاہ داشت بہ کُتیں ءُ سیاسی
گہگیری یے بِنا بہ کُتیں۔
وھدیکہ
دومی جہانی جنگ بنا بیت گُڑا برطانیہ روزیگی ھساب ءَ سک نزور بیت ءُ 1947 ءِ میان
ءَ فلسطین ءَ UN ءِ دست ءَ دنت ءُ چہ فلسطین ءَ درکئیت۔۔برطانیہ
ءَ مِڈل ایسٹ ءِ تہ ءَ وتی زوراکی ءِ مُہکم کنگ ءِ ھاتر ءَ اے زمین ءِ سر ءَ
یہودی ءُ مسلمانانی میان ءَ بلاھیں تضاد یے ودی کُتگ اَت ءُ ھمے تضاد دیمتر ءَ گیش
ودان ءَ شُت ءُ یہودیاں وتی ھاتر ءَ نوکیں ءُ جتائیں سرزمین یے ءِ لوٹ دیم ءَ
ایرکُت۔ UN فلسطین ءِ یہودی ءُ مسلمانانی جیڑہ ءِ سر ءَ یک
کانفرنسے ایر کنت ءُ یک پارٹیشن پلین یے جوڑ کنت کہ آئی ءِ رد ءَ فلسطین زمین ءِ
55% یہودیانی بیت کہ آئی ءِ سر ءَ یہودیاں وتی وتواکیں ملکے اسٹیٹ آف اسرائیل ءِ
نام ءَ جوڑ کن اَنت ءُ 45% زمین مسلمان ءُ ایدگہ مزہبی مہلوک ءِ بیت کہ آ فلسطین
بیت۔ اے میان ءَ فلسطین ءِ مہلوک ءَ بچاریں گُڑا 67% مسلمان اِت اَنت ءُ 30 %
یہودی اِت اَنت ءُ زمین ءِ بہر ءُ بانگ دگہ وڑے بوتگ اَت، اے پلین وھدیکہ فلسطین
ءِ مہلوک ءِ دیم ءَ ایر کنگ بیت گُڑا عرب ءُ ایدگہ مزہبانی مہلوک اِشی ءِ بگیری
ءَ پاد کاینت بلے یہودی اے پلین ءَ چہ گل بنت۔ ھمے پلین ءِ رد ءَ 11 مئی 1948 ءَ
یہودی وتی جتائیں استانے اسٹیٹ آف اسرائیل ءِ جار ءَ جن اَنت ءُ فلسطین زمین ءِ
55% وتی نام ءَ کن اَنت۔ فلسطین ءُ اسرائیل ءِ جیڑہ ودان بیت کہ چریشی ءِ سبب ءَ
فلسطین ءِ ھمسائگیں عرب استان اسرائیل ءِ سر ءَ اُرش کن انت بلے نوک جوڑ بوتگیں
اسرائیل اے جنگ ءَ باج بارت ءُ اسرائیل ءِ جنگ ءَ باج برگ ءِ سبب ءَ فلسطین ءِ
زمین ءِ کساس 67 درسد ءَ اسرائیل ایردست کنت۔ ھما وھد ءَ بگرداں روچء مروچی فلسطین
ءِ جیڑہ جُنزان اِنت۔
فلسطین ءِ تہ ءَ سیاسی ءُ سلاہ بندیں
گہگیری:
چوشکہ
ما بُرز ءَ باوست کُتگ کہ 1948 ءِ عرب اسرائیل جنگ ءَ اسرائیل باج بارت گُڑا چہ
آئی ءَ پد فلسطینی مہلوک چہ وتی زمین ءَ درانڈیھ کنگ بیت ءُ فلسطین ءِ مہلوک
ھمسائگیں مُلکاں باھوٹی بنت ءُ لہتیں وتی زمین ءِ سر ءَ باھوٹی بنت۔ ھزاراں مردم
چہ وتی زمین ءَ درانڈیھ کنگ بنت، فلسطینی اے روچ ءَ نکبہ ءِ روچ بزاں آکبت ءِ روچ
ءِ نام ءَ دینت، ھمے جیڑہ ءُ جنجال فلسطینی مہلوک ءَ گہگیری ءِ نیمگ ءَ بر اَنت کہ
آ پہ وت ءَ یک مُہکمیں ءُ منظمیں جُہدے بندات کن اَنت۔ فلسطین ءِ جُہد چوناھا سک
مزن اِنت کہ یکیں نبشتانک ءَ گیشینگ نہ بیت بلے ما اِشی ءَ کم کم ءَ چاریں کہ چون
فلسطین ءِ مردماں پہ وتی ڈیھ ءُ راج ءَ گہگیری ءِ راہ گچین کُتگ ءُ مہکمیں گلانی
کمُک ءَ وتی سیاسی لیکہ دیم ءَ بُرتگ۔
فلسطین ءِ جُہد ءَ ما چار بہر ءِ تہ ءَ
چاریں:
1948_1960’s
فلسطینی
جُہد ءِ بندات 1948 ءَ چہ پد بیت وھدیکہ آ عرب استانانی کمک ءَ ابید وتی ادارہانی
جوڑ کنگ ءَ بندات کن اَنت، ھمے درگت ءَ فلسطین ءِ مہلوک ءُ رہشون وتی سیاسی جُہد
ءُ مہلوک ءِ یکجاہی ءِ ھاتر ءَ اولی گل ءِ بُنہشت ءَ "الفتح" ءِ نام ءِ
سر ءَ 1959 ءِ میان ءَ ایر کن انت کہ آئی ءِ سروکی ءَ یاسر عرفات کنت، یاسر عرفات
فلسطین ءِ نامداریں رہشوناں چہ یکے کہ آئی ءَ فلسطین ءِ سیاسی گہگیری ءِ نوکیں
دابے دیم ءَ آؤرتگ، ھمے میان ءَ فلسطینی نودربر ھم وتی نیمگ ءَ چہ وتی راجی پجار
ءُ زمین ءِ رکینگ ءَ پہ ادارہانی جوڑینگ بندات کن انت کہ آ فلسطین ءِ ھمسائگیں
مُلکاں بگر داں یورپ، فرانس ءُ جرمنی ءَ کار کن اَنت ءُ وتی توار ءَ داں دگنیا ءَ
سر کن اَنت، فلسطینی راج ءِ اولی نودربر ادارہ جنرل سٹوڈنٹس یونین آ ف فلسطین ءِ
نام ءَ دیم ءَ کئیت کہ آ مُہکمیں دابے ءَ واتی راجی لیکہ ءَ دیم ءَ بارت ءُ وتی
راجی نودربراں راجی پجار ءِ رکینگ ءِ سکین ءَ دنت، فلسطین ءِ سیاسی گہگیری ءِ تہ
اے گل ءِ مزنیں کردے کہ آ ھچبر پراموش کنگ نہ بیت، اے میان ءَ فلسطین ءِ راجی
ادراہ گیش بوتگ اَنت ءُ مُہکم بوتگ اَنت۔
1960’s_1980’s
فلسطین
ءِ سیاسی گہگیری مُدام گوں نوکیں وھد ءَ نوک بوان بیت ءُ ما بچاریں اے میان ءَ
فلسطین ءِ گہگیری گیش نوکیں دابے ءَ دیم ءَ کئیت کہ آ سیاسی بہ بیت یا سلاہ بندیں
گہگیری۔ فلسطین ءِ مہلوک ءَ وتی پجار ءِ پھازگ ءَ مُدام جُہد کُتگ ءُ گوں ستک ءُ
ایمان ءَ جُہد کُتگ۔ 1964 ءَ فلسطین ءِ راجدوستیں ورنا یک نوکیں گلے جوڑ کن اَنت
کہ آئی نام PLO
بزاں فلسطین لبریشن آرگنائزیشن بیت ءُ اِشی
ءِ مستریں مول ءُ مراد یک انچیں زمینے ءَ پہ جُہد ءُ جنگ اَت کہ آئی ءِ تہ ءَ ھمُک
مردم آجو بیت، ھمُک مردم فلسطین ءِ زمین ءَ گوں فلسطینی پجار ءَ زند بہ گوازینیت،
بلے پی ایل او ءِ اولی رہشون کاملیں رہشونے نہ بوتگ ءُ وھدیکہ 1967 ءَ اسرائیل ءُ
عرب استانانی میان ءَ پدا جنگے بنا بیت ءُ فلسطین ءِ ھما بہر کہ عرب استاناں گون
اِت اَنت آ ھم اسرائیل ءِ ایردست بنت گُڑا اے گل ءِ رہشون چُشیں ھاسیں گامگیجے
زُرت نہ کن اَنت، ھمے میان ءَ گڑا ایدگہ مہلوک ءُ رہشون پہ فلسطین ءِ آجوئی ءَ PLO ءِ راھشونی ءَ یاسر عرفات ءِ دست ءَ دینت، یاسر
عرفات اے گل ءَ شہمیں رنگے ءَ جُنزینیت ءُ ھمے میان ءَ فلسطین ءِ نوکیں گل ھم جوڑ
بنت بزاں
PFLP,DFLP ,Shabiba کہ آیانی
لیکہ فلسطین ءِ آجوئی بیت، اے سجھیں گل یکجاہ بنت ءُ PLO ءِ چیر ءَ
کار کن اَنت، PFLP,Fatah ءُ
DFLP جنگی ادارہ بنت کہ
گوریلا رہبند ءُ جنگی رہبندانی کمک ءَ وتی آجوئی ءَ پہ جُہد کن اَنت ءُ دومی نیمگ
ءَ
GUSP ءُ Shabiba نودربر گل بنت کہ نودربر سیاست ءُ سیاسی گہگیری
ءِ کمک ءَ پہ آجوئی ءَ جُہد ءَ بنت، اے گل ءِ مستریں مول ءُ مراد وتی مہلوک ءَ
یکجاہ کنگ، آیانی سیاسی تربیت کنگ آیاں وتی راجی آجوئی ءِ ھاتر ءَ جنگ ءِ سکین دئیگ ءُ دگنیا را وتی توار ءِ سر
کنگ بیت ءُ ھمے میان ءَ فلسطین ءِ لبزانت ھم دیم ءَ کاینت ءُ وتی ند ءِ وسیلگ ءَ
وتی راج ءَ یکمُشت کن انت ءُ دگنیا ءَ را فلسطین ءِ جاورالاں چہ آژنا کن اَنت آئی
درور مارا لیلیٰ ھالد، گسان کنافانی ءُ محمود درویش ءِ دروشم ءَ گندگ ءَ کاینت۔
1980’s_2000’s
اے
ھما وھد بیت کہ اسرائیل ءِ نیمگ ءَ نوکیں شوربندی دیم ءَ آیان بنت، فلسطینی گہگیری
ءِ سوب ءَ مہلوک یکجاہ بوتگ اَت کہ آئی تُرس ءَ اسرائیل نوں Peace negotiations ءِ
نیمگ ءَ رؤگ لوٹگ ءَ اَت، بلے مہلوک ھچبر چُشیں ایمنی دیوانے ءَ پہ تیار نہ اَت،
ھمے اھد ءَ یک برے پدا فلسطین ءِ زمین ءَ یک نوکیں زرمبشت یے "اولی انتفادہ"
ءِ دروشم ءَ گندگ ءَ کئیت کہ اسرئیلی جنگی ٹینکے یک فلسطینی بچک ءِ چیر ترینیت ءُ
کُشیت۔ مہلوک ءِ تہ ءَ یک نوکیں آسے روک بیت کہ 1987 ءَ آ گزہ ءُ ویسٹ بینک ءِ
دمگاں زہرشانی، شد ہڑتالی اوتاک، سرکاری کارجاھانی ماندارگ بندات کن اَنت، اے میان
ءَ ما چاریں کہ فلسطین ءِ لس مہلوک مزنیں کچے ءَ درکئیت ءُ اسرائیل ءِ ھلاپ ءَ
اوگام جنت، اے ھما سیاسی گہگیری، سیاسی تربیت ءُ سیاسی جُہد ءِ برورد اِنت کہ چہ
سالاں PLO
ءُ ایدگہ ادارہ پہ فلسطین ءَ کنگ ءَ اِت
اَنت، ھمے پیم ءَ وھدیکہ 1996 ءَ اوسلو ءَ یک چیر اندریں ایمنی دیوانے اسرائیل ءُ PLO ءِ میان ءَ بیت گُڑا یاسر عرفات گوں اسرائیل ءَ
ایمنی ءَ پہ تپاک کنت بلے آئی ءِ ھمے لوٹ بیت کہ فلسطین ءِ ھما زمین کہ 1948 ءَ
فلسطین ءِ نام ءَ کنگ بوتگ آ واپس دئیگ بہ بیت، فلسطین ءَ دگنیا ءِ دیم ءَ اسرائیل
اسٹیٹ آف فلسطین ءِ نام ءَ بہ مَنّ ایت ءُ چہ آئی رند فلسطین اتھارٹی ءِ نام ءَ
فلسطین ءَ دگنیا ءِ دیم ءَ ریپریزنٹ کنگ ءِ ھاتر ءَ یک ادارہے جوڑ کنگ بیت کہ آئی
ءِ کارمستر یاسر عرفات بیت۔ اے ایمنی دیوان ءَ پہ PLO ءِ ایدگہ
چیراندریں گل ھچ وڑ ءَ ھک ءَ نہ بوتگ اَنت، آیانی لوٹ یک سرجمیں فلسطین یے اَت کہ
آ چہ 1918 ءَ پیسر بوتگ بلے یاسر عرفات گوں اسرائیل ءَ دیوان کنت ءُ اسرائیل ءَ
گوں ایمنی دیوان ءِ کاگدانی سر ءَ وتی دزرند ءَ کنت۔ ھمے میان ءَ فلسطین ءِ زمین
ءِ سر ءَ یک نوکیں ادارہے ھماس ءِ نام ءَ ھم دیم ءَ کئیت کہ آ دیمتر ءَ سک باز مُہکم
بیت ءُ داں روچء مروچی پہ فلسطین ءِ آجوئی ءَ اسرائیل ءِ بگیریءَ جنگ ءَ اِنت۔
2000 داں مروچی:
بیست
ءُ یکمی کرن وھدیکہ بندات بیت فلسطین ءِ زمین یک نوکیں مٹی یے ءِ نیمگ ءَ رؤت کہ
آئی ءَ چہ پد ما چاریں ھماس یک نوکیں دروشمے ءَ دیم ءَ کئیت ءُ فلسطین ءِ آجوئی ءِ
جنگ ءَ بنا کنت، ھمے میان ءَ فلسطین اتھارٹی ءُ فتح نزور بنت بلے ھماس ءِ سیاسی
ءُ جنگی گہگیری گیش مہکم بوان بیت۔ مروچی ھماس فلسطین ءِ زمین ءِ سر ءَ یک مہکمیں
گلے ءِ پیم ءَ کار ءَ اِنت کہ فلسطین ءِ جنُز ءُ لیکہ ءَ دیم ءَ بران اِنت، ھماس
تہنا اسرائیل ءَ گوں جنگ ءَ نہ اِنت بلکیں دگنیا ءِ لوٹ ءُ نوکیں دور ءَ گوں وت ءَ
انچیں پیمے ءَ ہمدپ کنگ ءَ اِنت کہ آئی ءِ شوربندی ءُ نوکیں پالیسی آئی ءَ گوں
اسرائیل ءَ دیم پہ دیم کنگ ءَ انت، ھماس ءِ سیاسی گہگیری، دگنیا ءَ گوں میل ءُ
رھوت، ایدگہ استاناں گوں شہمیں رھوتکاری، ڈپلومیسی ءِ بنیات ءَ استاناں گوں تجارت
ءُ دومی استاناں گوں ٹریٹی سائن کنگ ھماس ءِ شوربندی اَنت، اِشی ءَ چہ ابید ھماس
ءِ جنگی شوربندیاں بچاریں گُڑا ما گندیں کہ ھماس مروچی ٹنل جنگ، راکٹ ءُ مزائلانی
کارمرز، سائبر جنگ، اے آئی ءُ ٹیکنالوجی ءِ پِڑ ءَ وت ءَ انچو مُہکم کنگ ءَ اِنت
کہ باندا فلسطین ءِ زمین ءِ دروشم ءَ مٹ کُت کنت ءُ یک آجوئیں استانے ءِ دروشم ءَ
وت ءَ را منارینت کُت کنت۔اِشی ءَ چہ ابید ما بچاریں بیست ءُ یکُمی کرن ءَ فلسطین
ءِ مہلوک ءَ وتی درملکی جُہد ءُ سیاست ھم گیش مُہکم کُتگ، یک نیمگے پی ایل او
فلسطین ءِ جہگیری ءَ دگنیا ءِ دیم ءَ کنگ ءَ اِنت ءُ دومی نیمگ ءَ فلسطینی جُہد
کار کہ درانڈیھ اَنت وتی توار ءَ دگنیا ءَ داں سر کنگ ءَ اَنت۔ فلسطین
ءِ کیس اسٹڈی زورگ ءِ مستریں مول ءُ مراد اِش اِنت کہ فلسطین ھم چو بلوچ راج ءَ یک
ایردستیں راجے بلے سلاہ بندیں ءُ سیاسی گہگیری ءُ جتائیں گلانی جُہد ءِ برورد انت
کہ مرچی فلسطین دگنیا ءِ دیم ءَ اتکگ ءُ فلسطین ءَ یک ھدے ءَ داں وتی جند ءِ پجارے
ھست ءُ وتی جُہد ئِے گیش مُہکم کُتگ۔
ھمے پیم ءَ دگہ باز راج ھست انت کہ آیاں
وتی زمین ءُ راج ءِ رکینگ ءَ پہ جنگ ءَ ابید سیاسی گہگیری گچین کُتگ ءُ وتی راج ءُ
زمین آجو کُتگ، اِشانی درور مارا ویتنام، الجزائر ،تلنگانہ، افریکہ ءُ ایدگہ
دروشماں گندگ ءَ کاینت، ھمے دروراں چہ ما یک درورے زوریں ءُ آئی ءِ سر ءَ گیش
باوست کن اِیں کہ چون آیاں گہگیری ءِ کمک ءَ وتی راج آجو کُتگ ءُ مرچی یک آجوئیں
ءُ وتواکیں استانے ءِ واھُند اَنت۔
تلنگانہ ءِ سیاسی گہگیری:
تلنگانہ کہ مرچی ھندوستان ءِ یک بلاھیں
اسٹیٹ یے اِشی ءِ ما بندپتر ءَ بچاریں گُڑا مارا یک بلاھیں گہگیری یے گندگ ءَ کئیت
کہ آئی ءِ برورد ءَ تلنگانہ یک نوکیں اسٹیٹ یے ءِ دروشم ءَ دیم ءَ اتکگ۔
تلنگانہ ءِ بندپتر:
چوناھا
ما بچاریں گوست ءَ تلنگانہ ھیدرآباد ءِ بہرے بوتگ کہ اود ءَ گیشتریں مردم تلگیو
زبان ءَ گپ جنوک اِت اَنت ءُ آیانی وتی دود ءُ ربیدگ، راجدپتر، لبزانک ءُ پجارے
اَت۔ وھدے 1947 ءِ میان ءَ ھندوستان چہ برطانیہ ءِ ایردستی ءَ آجو بیت گڑا آ وتی
تیوگیں اسٹیٹ آں یکجاہ کنگ بندات کنت بلے ھیدرآباد اسٹیٹ کہ آ وھد ءَ سئے بہر ءَ
اَت تلنگانہ،کرناٹکا، مرتھیڈیا وتی یک وتواکیں پجارے دارگ ءِ واھند اَت کہ نہ
ھندوستان ءِ بہر بیت ءُ نئیکہ پاکستان ءِ، بلے 1951 ءِ میان ءَ ھندوستان وتی پوجی
لشکر ءَ ھمے جاگھاں راہ دنت ءُ پہ زوراکی ھیدرآباد ءَ ھندوستان ءِ بہر جوڑ کنت کہ
چہ آئی ءَ پد اے زمین مُدام جنگ ءُ جدل ءِ آماچ بوتگ۔ ھمے میان ءَ مدراس اسٹیٹ ءِ
تہ ءَ ھم جنگے ودی بیت کہ اود ءَ اندھرا (جاگہ ءِ نام ءِ ) ءِ مہلوک پہ یک جتائیں
اسٹیٹ یے ءِ لوٹ ءَ گہگیری کن انت ءُ ھمے گہگیری 1953 ءَ سرجم بیت کہ اندھرا یک
نوکیں اسٹیٹ یے ءِ دروشم ءَ دیم ءَ کیت بلے چو کہ آندھرا ءُ تلنگانہ ءِ مہلوک ءِ
زُبان یکیں تلگیو اَت گُڑا 1956 ءَ ھندوستان ءِ سرکار یک کانودے پاس کنت کہ
آندھرا ءِ زمین ءُ تلنگانہ ءِ زمین یکجاہ کنگ بنت ءُ آندھرا پردیش ءِ دروشم ءَ
ھندوستان وتی یک نوکیں اسٹیٹ یے جوڑ کنت، تلنگانہ ءِ مہلوک اِشی ءِ ھلاپ ءَ بیت ءُ
ھمد ءَ چہ تلنگانہ ءِ پہ یک وتواکیں استانے ءِ جنگ بندات بیت۔
گہگیری ءِ سبب :
تلنگانہ
ءِ گہگیری ءُ جُہد ءِ مستریں سبب آندھرا ءِ مہلوک ءِ وتواکی، تلنگانہ مہلوک ءِ دود
ءُ ربیدگ ءُ گالوار ءَ کمتر پیشدارگ، بزگی ءُ گُژنگی، تلنگانہ ءَ ھچ وڑیں بُنکی
آسراتی نہ دئیگ ءُ تلنگانہ ءِ راجدپتر ءَ ھلاس کنگ ءُ کلاں چہ مستریں سبب آندھرا
ءِ مہلوک ءِ سر ءَ زوراکی بوتگ۔ ھمے گہگیری گوں وھد ءَ گیش بوان بیت ءُ نوکیں
داباں گوں جنزان کنت چُشکہ، لبزانکی گہگیری، دود ءُ ربیدگی گہگیری، لس مہلوک ءِ
گہگیری، نودربرانی گہگیری کہ دیمتر ءَ اے دراہ سیاسی گہگیری ءِ دروشم ءَ زور اَنت
ءُ مہکمیں جُہدے بندات بیت۔
تلنگانہ گہگیری ءِ بندات :
تلنگانہ
گہگیری ءِ بندات 1956 ءِ وھد ءَ بیت بلے ھمے گہگیری 1969 ءَ یک بلاھیں زرمبشت یے
ءِ دروشم ءَ گندگ ءَ کیت وھدیکہ تلنگانہ ءِ مہلوک آندھرا اسٹیٹ ءِ ھلاپ ءَ توار
چست کنت ءُ نوددبراں بگر داں دہکاناں سرجمیں تلنگانہ دگانی سر ءَ درکپیت زھرشانی
کنت، شُد ہڑتالی اوتاک جنت ءُ سرکار ءِ ھلاپ ءَ اوگام جَنگ بیت۔ ھمے وھد ءَ آندھرا
پردیش ءِ پولیس، پوج ءُ سرکار مہلوک ءَ بلاھیں ھدے ءَ داں ھاموش کنگ ءِ جُہد ءَ کن
اَنت، آیانی سر ءَ ارسی گیس دور دئیگ بنت، زہرشانیاں لٹ ءُ کُٹ ءُ تیر گواری کنگ
بیت کہ بازیں مردم نمیران بنت، نودربر ءُ ورنایانی ھلاپ ءَ FIR کنگ بیت ءُ
دروگیں ءُ وتگڑیں کیس جوڑینگ بنت، اے کُلاں چہ ابید تلنگانہ ءِ مہلوک ءِ ھلاپ ءَ
میڈیا ءَ وتگڑیں بیان سازی، پروپگنڈہ ءُ گیشتر وتی سینیما ءِ تہ ءَ تلنگانہ ءِ
مہلوک ءَ کمتر پیش دارگ ءِ وڑیں شوربندی ھوار بوتگ اَنت۔ بلے اے شوربندی تلنگانہ
ءِ مہلوک ءَ گیش یاگی جوڑ کن انت ءُ مہلوک نوکیں گل پہ تلنگانہ ءِ جتائیں استانے
ءُ وتواکی یے ءَ جوڑ کنگ بندات کن انت، اولی گل کہ ھمے میان ءَ جوڑینگ بیت آ
“تلنگانہ پرجّا سمیتھی” بیت کہ آئی ءِ رہشون مری چینا ریڈی بیت ءُ اِشی ءَ 1969
ءِ زرمبشت ءَ یک شہمیں راہے ءُ دروشمے داتگ بلے دیمتر ءَ اے گل نزور تریت ءُ گل ءِ
رہشون گیشتر سرکاری سیاست ءِ نیمگ ءَ رؤنت۔ 1970_1980 ءِ وھد ءَ تلنگانہ ءِ زمین
ءَ سرکار ءِ شوربندیانی سبب ءَ چُشیں زہرشانی ءُ چست ایر گندگ ءَ نئیت بلے اے ھما
وھد بیت کہ مہلوک وتی چیر اندریں گلاں جوڑ کنگ بندات کن انت ءُ گیش نودربر گل وتی
وانگجاھاں نودربرانی سیاسی تربیت، راجدوستی ءُ تلنگانہ ءِ ھاتر ءَ نوکیں دابے ءَ
جُہد ءِ سر ءَ دلگوش بنت۔ اے میان ءَ تلنگانہ ءِ لبزانت، ازمکار شہمیں دابے ءَ وتی
مہلوک ءَ یکجاہ کنگ ءِ ھاتر ءَ نوک نوکیں کتاب، شائری، ساز ءُ زیمر، تامُر دیم ءَ
کار اَنت کہ آ پہ مہلوک ءِ تربیت ءَ مزنیں کردے پیلو کن اَنت۔
1990 ھما وھد
بیت کہ ھیدرآباد ھندوستان ءِ اکانمک ھب جوڑ بیت، گیش ٹیکنالوجی ءُ گیشتر ٹیکنکل
کار چہ ھمے جاہ ءَ کنگ بنت بلے پدا ھم تلنگانہ ءِ مہلوک ءَ ھچ کار ءُ موہ دئیگ نہ
بیت، تلنگانہ اے وھد ءَ ھم پشت کپیت، مہلوک بزگ ءُ گُژنگ بیت، مردمانی کر ءَ ھچ
وڑیں روزگار نہ بیت، ورنایاں ھچ موہ دئیگ نہ بیت، یک مایوسی یے تلنگانہ ءِ مہلوک
ءِ دلاں جاگہ کُتگ اَت ءُ ھمے سبب ءَ اے میان ءَ بازیں ورنا وتکُشی کنگ ءَ مجبور بنت
ءُ ھمے میان ءَ بازیں مہلوکے گہگیری ءِ راہ ءَ پہ وت در چنت ءُ بازیں مہلوکے سرکاری
سیاست ءَ رؤت گُڑا یکرندے پدا تلنگانہ ءِ مہلوک وتی ھک ءُ پجار ءِ رکینگ ءَ یکجاہ
بنت ءُ یک نوکیں جنگے بنا کن انت کہ آئی آسر وتواکیں تلنگانہ یے دروشم ءَ بیت۔
اے
زرمبشت ءَ مستریں بہر سیاسی گہگیری ءُ نودربرانی بوتگ، نودبراں وتی وانگجاھاں نوک
نوکیں گل جوڑینتگ اَنت، نوکیں دابے ءَ گوں ھندوستان ءِ مزن وزیراں نند ءُ نیاد
بندات کُتگ اَت ءُ وتی جتائیں تلنگانہ ءِ لوٹ دیم ءَ ایر کُتگ اَت، بازیں نودبر رہشون
اے میان ءَ بیگواہ کنگ بنت، بازیں جنگ بنت ءُ بازیں بندیگ جاھاں بند کنگ بنت،
بازیں چہ وانگجاھاں کشگ بنت بلے اے جُنز رؤان کنت ءُ ھچبر پشُت کنز نہ بیت۔ اے
جنز کہ آئی ءِ بندات 2000 ءَ بیت نوکیں ادارہ ءُ نوکیں گلانی سروکی ءَ دیم ءَ رؤان
کنت، اے میان ءَ بازیں نودربر سیاسی گل بازیں لس مہلوکی گل، لبزانکی ءُ ازمکارانی
گل، رسانکدری ڈیپارٹمنٹ جوڑ بنت ءُ درستانی لوٹ “وتواکیں تلنگانہ ”بیت۔ اے جُنز چہ
پیسری جنزاں گیش مہکم ءُ گیش سیاسی بوتگ کہ آئی تہ ءَ رسانکدر ءِ ھم بلاھیں کردے
بوتگ۔ اے میان ءِ سیاسی گلانی سر ءَ ما کسانیں چمشانکے
دئیں گُڑا مارا گندگ ءَ کئیت کہ اے گلانی راہ ءُ رہبند، ترز ءُ داب ءُ شوربندی سک
مُہکم ءُ ترند بوتگ اَنت۔
تلنگانہ راشترا
سمیتھی:
اے
گل 2001 ءِ میان ءَ جوڑ بیت کہ اِشی ءِ رہشونی ءَ چندرشیکر راؤ کنت، اِشی ءِ ما
کرد ءَ بچاریں گُڑا تلنگانہ ءِ وتواکی ءَ اے گل ءِ بلاھیں کردے بوتگ، اے گل تلنگانہ
ءِ لوٹ ءَ الیکشن ءِ نیمگ ءَ بارت بزاں پارلیمنٹ ءِ تہ ءَ تلنگانہ ءِ مہلوک ءِ لوٹ
ءَ دیم ءَ بارت ءُ تلنگانہ ءِ مہلوک ءَ یکجاہ کنت، اِشی ءَ چہ ابید اے گل ءِ مستریں
لوٹ تلنگانہ ءِ جیڑہ ءَ ملکی جہتءَ سر کنگ بیت بزاں آندھرا پردیش ءِ اسٹیٹ ءَ چہ
کشگ ءُ ھندوستان ءِ مستریں پارلیمنٹ ءَ برگ، ھندوستان ءِ مہلوک ءَ وتی نیمگ ءَ آرگ
ءُ وتی جتائیں اسٹیٹ یے ءِ ھاتر ءَ آیانی کمک ءَ گِرگ ھم اے گل ءِ شوربندیاں ھوار
بوتگ، تلنگانہ ءِ مہلوک ءَ سیاسی ءُ لیکہی ھساب ءَ یکجاہ کنگ ءِ ھاتر ءَ زہرشانی
ءُ مراگش اڈ دئیگ ءُ ھندوستان ءِ سرکار ءِ دیم ءَ یک پریشرے ودی کنت۔ تلنگانہ
راشترا سمیتھی ءَ تلنگانہ ءِ جُہد ءَ را یک نوکیں دروشمے دات۔ تہنا چہ زہرشانیاں
کش اِت ءُ اسیلیں سیاست ءِ نیمگ ءَ آؤرتگ۔
تلنگانہ جوائنٹ ایکشن کمیٹی:
اے کمیٹی 2009 ءِ وھد ءَ جوڑ بیت ءُ ِشی
ءِ تہ سرجمیں نودربر کونسل، ورکر پارٹیز، لس مہلوکی گل، لبزانکی ءُ رسانکدری ڈیپارٹمنٹ،
زبان ءُ دود ءُ ربیدگی ڈیپارٹمنٹ ھوار بنت۔
اے گل سرجمیں تلنگانہ ءَ یکجاہ کنگ ءُ
وتی توار ءَ تلنگانہ ءَ چہ ابید ھندوستان ءُ دگنیا ءِ ھمُک کنڈ ءَ سر کنگ ءَ سوبین
بیت۔
نودربر یونین :
راجی
پجار ءُ شرپ ءِ رکینگ ءَ پہ نودبرانی بلاھیں کردے بوتگ ءُ نودبراں مُدام زورگیر
ءِ ھلاپ ءَ گوں وتی توامیں تاکت ءَ جنگ داتگ۔ تلنگانہ ءِ جنگ ءَ ھم ما بچاریں گُڑا
مارا گندگ ءَ کئیت کہ اے جنز ءِ تہ مستریں کرد نودربراں پیلو کُتگ۔ 1969 ءَ بگرداں
2014 ءَ نودربر ھمُک پِڑ ءَ ھمُک وڑ ءَ پہ راجی پجار ءُ راجی لوٹانی سرجم کنگ ءَ
دیم ءَ بنت، نودربر کونسلاں پہ نودبرانی سیاسی تربیت، نودربرانی ھاتر ءَ دود ءُ
ربیدگی مراگش، وتی ھکانی ھاتر ءَ زہرشانی ءُ شد ہڑتالی اوتاک، نودبرانی جیڑہ ءُ
جنجالانی ھلاسی ءِ ھاتر ءَ وانگجاھاں کار ءُ پروگرامانی اڈ دئیگ، اِشی ءَ چہ ابید
سیاسی سنچ ءُ راج ءَ یکجاہ کنگ ءِ ھاتر ءَ نودربر تلنگانہ ءِ ھمُک دمگ ءُ میتگ
شُتگ انت ءُ مہلوک ءَ سرپدی داتگ۔ نودربراں رسانکدر ءِ وسیلہ ءَ وتی زمین ءُ وتی
دود ءُ ربیدگانی رکینگ ءَ پہ جتا جتائیں دروشماں کار کُتگ، نوکیں دور ءَ نودربراں
وتی مہلوک ءَ میڈیا، ٹیکنالوجی ءُ چاگردی رسانکدر ءِ ھیل دئیگ ءَ پہ جتا جتائیں
مراگش ءُ سیمینار اڈ داتگ۔ اِشاں ابید لبزانت، کواس، استاد ءُ ایدگہ پِڑ ءِ
مہلوک ءِ ھم تلنگانہ ءِ جُہد ءَ بلاھیں کردے بوتگ کہ آیاں وتی نبشتانک، کتاب، شئیر
ءُ شائری ءِ کمک ءَ وتی مہلوک ءَ آشوب ءِ راہ شون داتگ۔ تلنگانہ ءِ
مہلوک ءِ ھمے سیاسی جُہد ءُ گہگیری ءِ سوب
ءَ 2 جون 2014 ءَ تلنگانہ ھندوستان ءِ بیست ءُ نوہمی وتواکیں اسٹیٹ ءِ دروشم ءَ
دیم ءَ اتکگ، ما بچاریں گُڑا ما سرپد بئیں کہ راج ھما وھد ءَ آجو بنت ءُ وتی لوٹاں
سرجم کن اَنت وھدے کہ آ یکجاہ بنت ءُ گہگیری کن اَنت۔ ھمے پیم ءَ
ما وتی زمین ءُ راج ءِ سر ءَ چمشانکے دئیں گُڑا ما سرپد بئیں کہ بلوچ راج ھما راج
اِنت کہ مُدام گہگیری ءِ راہ ئِے گچین کُتگ ءُ مُدام وتی راجی ءُ زمینی لوٹانی
ھاتر ءَ جُہد ءَ انت ءُ مدام وتی پجار ءِ رکینگ ءِ جُہد ئِے کُتگ ءُ داں روچء
مروچی جُہد کنگ ءَ اِنت۔
بلوچ اُلسءُ سیاسی گہگیری:
گہگیری
گوں مہلوک ءَ بندوک اِنت، ھر ھمک راج ءَ کہ گہگیری ءِ راہ گچین کُتگ الّم ءَ وتی
زمین ءُ پجار ئِے رکینتگ، بلوچ زمین ءُ بلوچ اُلس ءِ سر ءَ ما کسانیں چمشانکے دئیں
گُڑا مارا گندگ ءَ کئیت کہ بلوچ چہ ھما راجاں یکے کہ دُژمن ءِ دیم ءَ ھچبر سر ئِے
جہل نہ کُتگ ءُ مُدام راستی ءُ ھک ءَ پہ گہگیری ءِ راہ ئِے پہ وت گچین کُتگ۔ بلوچ
ءِ پجار ھزاراں سال کُہن اِنت ءُ داں روچء مروچی زندگ اِنت آئی ءِ مستریں سوب
گہگیری اِنت۔
بلوچستان ءِ بندپتر:
بلوچستان
ءِ بندپتر ءَ ما چمشانکے دئیں گُڑا مارا گندگ ءَ کئیت کہ اے زمین ءَ چہ کرناں وتی
پجار رکینتگ، اے زمین ءِ سر ءَ مُدام درآمداں وتی بدیں چم سک داتگ اَنت بلے اے
زمین کدی ھم چہ وتی واجہاں پُلگ نہ بوتگ، آ تُرک بہ بنت یا پرتگالی، انگریز بہ بنت
یا انیگیں اھد ءِ استان بلوچ ءَ مُدام درآمد ءِ ھلاپ ءَ گہگیری کُتگ ءُ وتی پجار
ءُ گلزمین ءِ رکینگ ءَ پہ ساہ ندر کُتگ۔
برتانیہ ءِ ایردستی ءُ بلوچ گہگیری:
وھدیکہ
دگنیا ءَ گریٹ گیم بندات بیت گُڑا اے جنگ ءِ سان مئے گلزمین بلوچستان ءَ ھم کپنت
ءُ 1839 ءِ وھد ءَ بلوچستان ءِ زمین اسپیت پوستانی دست ءَ روت، اے ھما وھد اَت کہ
سیاسی گہگیری ءِ چُشیں ھیال ءُ لیکہے دیم ءَ نہ اتکگ اَت بلے پدا ھم بلوچ راج ءَ
دُژمن ءِ دیم ءَ سر جہل نہ کُتگ ءُ چہ ھما روچ ءَ برطانیہ ءِ بگیری ءَ جنگ ئِے بنا
کُتگ کہ دیمتر ءَ بازیں دروشماں مُہکم بوان بوتگ۔ اے میان ءَ بلوچ ءِ جنگ ءَ بازیں
دروشم زُرتگ اَنت کہ آئی ءِ بندات چہ گوریلا جنگ ءَ بوتگ، دیمتر ءَ لبزانکی
گہگیری ھم بندات بیت۔ بلوچ ءِ لبزانت گوں وتی شئیر ءُ کسھاں مہلوک ءَ یکجاہ کن
اَنت ءُ برطانیہ ءِ ھلاپ ءَ سرپدی دئینت، ھمے جنگ دیمتر ءَ سیاسی گہگیری ءِ دروشم
ءَ کئیت ءُ وتی راجی پجار ءُ بقاء ءِ ھاتر ءَ سیاست ءِ راہ ءَ ھم رھادگ بیت۔
بلوچ ءِ سیاسی گہگیری:
بلوچ
ءِ سیاسی گہگیری ءِ بندات چہ اولی جھانی جنگ ءَ پد بیت وھدیکہ دگنیا ءَ نوکیں آشوب
بزاں روس ءِ آشوب، چین ءِ آشوب ءُ امریکی آشوب گوں سیاسی لیکہاں دیم ءَ کاینت۔
دگنیا ءِ آشوباں چہ بلوچ ھم سان زوریت ءُ وتی پجار ءُ آجوئی ءِ جنگ ءَ سیاسی دروشم
ءَ دیم ءَ رؤان کنت۔ 1920 گُشگ بیت کہ بلوچ ءِ ماڈرن نیشنلزم ءِ بندات اِنت کہ چہ
آئی ءَ پد بلوچ ءَ وتی جُہد گوں نوکیں دور ءُ نوکیں لوٹاں دیم ءَ بُرتگ، اے میان
ءَ بلوچ سیاست ءِ تہ ءَ ادارہی دروشم ءَ جُہد ءِ سر ءَ گیش دلگوشی دیگ بیت ءُ ھمے
میان ءَ انجمن اتحاد بلوچاں ءِ جوڑشت ءُ آئی ءَ رند 1933 ءَ کلات اسٹیٹ نیشنل
پارٹی ءِ جوڑشت گندگ ءَ کئیت۔ پہ راجی ءُ زمینی لوٹاں اے سیاسی گلاں وتی بلاھیں
کردے پیلو کُتگ، مہلوک ءِ سیاسی تربیت ءَ بگر داں ھیدرآباد ءُ جیکب آباد ءِ کانگرس
آں بلوچ ءِ جیڑہ دیم ءَ ایر کنگ بوتگ، ما اگاں وتی راجدپتر ءَ بچاریں گُڑا مئے
مہلوک ءَ مُدام گوں نوکیں دور ءِ لوٹاں دیمروئی کُتگ، ھمے پیم ءَ برطانیہ ءِ ھلاپ
ءَ ھم بلوچ ءَ گوں وھد ءِ لوٹاں جنگ کُتگ کہ آئی ءِ آسر آجوئیں بلوچستان ءِ دروشم
ءَ گندگ بوتگ۔
نوکیں دور ءُ بلوچ سیاسی گہگیری:
وھدیکہ
بلوچستان 1948 ءَ پدا ایردست
کنگ بیت گُڑا بلوچ ءِ یک نوکیں جنگے بندات بیت کہ گوں نوکیں دور ءَ بندوک بیت۔ آئی
ءِ بازیں بہر بنت ءُ ھر بہر چہ پیسری ءَ گیش مُہکم،گیش ترندتر بیت، چہ اے تُرندی
ءَ ما سما کُت کن اِیں کہ بلوچ راج نوکیں دور ءِ لوٹاں پوہ بوگ ءَ اِنت ءُ وتی
راجی پجار ءِ رکینگ ءَ گیش مہکم بوان اِنت۔ آ سیاسی پِڑ ءَ بہ بیت، لبزانکی پِڑ ءَ
بہ بیت، رسانکدر یا ایدگہ پِڑ بہ بنت۔ سیاسی گہگیری ءَ بلوچ مہلوک ءِ تہ ءَ بچاریں
گُڑا بیست ءُ یکُمی کرن ءَ بلوچ راج راجکاری ءَ شہمیں ءُ نوکیں وڑے ءَ جُنزینگ ءَ
اِنت، نودربر سیاست ءَ بگر داں درانڈیہہ ءَ بلوچ ءِ توار سیاسی پِڑ ءَ دیمروئی کنگ
ءَ اِنت اِشی ءِ درور ءَ ما 2024 ءِ لانگ مارچ ءُ راجی مُچی ءِ تہ ءَ دیست کن
اِیں کہ چوں مہلوک یکجاہ ءُ یکمُشت بوتگ ءُ چوں سیاسی گہگیری ءِ کمک ءَ وتی توار
داں دگنیا ءَ سر کُتگ، اِشی ءَ چہ ابید درانڈیہہ ءَ ما بچاریں گُڑا بلوچ سیاسی گل
شہمیں رنگے ءَ کار کنگ ءَ اَنت، اِشی ءِ درور مارا جینیوا میٹنگز، جرمنی، سویڈن ءُ
ایدگہ جاگہاں زہرشانیانی دروشم ءَ گندگ ءَ کئیت، اِشی ءَ چہ ابید بلوچ ءِ درملکاں
نندوکیں اھوالکار، راجدوست، جُہدکار ھر ھما وڑ ءَ جُہد ءَ اَنت کہ وتی گہگیری ءَ
گوں وھد ءِ لوٹاں گیش مُہکم بہ کن اَنت۔ اے راستی یے کہ انگت ءَ بلوچ ءِ گہگیری
کاملیں رانگے ءَ سرجم ءُ مُہکم نہ اِنت بلے بلوچ ءَ وتی جُنز مُدام چہ پیسر ءَ مُہکمتر
کُتگ ءُ انگت کنان اِنت۔
آسر:
سیاسی
گہگیری ءَ مدام پہ راج ءُ استاناں یک نوکیں راہے رستگ کہ آئی ءِ وسیلہ ءَ ھمک راج ءَ
وتی جنگ دیم ءَ برتگ، سیاسی گہگیری انچیں لوٹے کہ ابید آئی ءَ راجے ءِ جُنز ناسرجم
اِنت، اگاں یک راجے پہ وتی پجار ءَ جنگ ءَ اِنت گُڑا آ جنگ ءِ مہکم کنگ ءِ ھاتر
ءَ سیاسی گہگیری الّمی اِنت پرچا کہ اے ھما یکیں راہ اِنت کہ تئی توار ءُ تئی لیکہ
ءَ نہ تہنا تئی راج ءَ سر کنت بلکیں سرجمیں دگنیا ءَ سر کنت، سیاسی گہگیری بازیں
دروشماں بازیں جاگھاں گندگ ءَ اتکگ، راجے پہ وتی پجار ءِ رکینگ ءَ سیاسی گہگیری ءِ
راہ ءَ گچین کنت، راجے پہ وتی نپانی رکینگ ءَ سیاسی گہگیری ءِ راہ ءَ گچین کنت یا راجے
نوکیں دور ءَ دگنیا ءِ تہ پہ وت ھاسیں جاہے جوڑ کنگ ءَ سیاسی گہگیری ءَ گچین کنت،
اے ھر ھما راج ءِ سر ءَ اِنت۔ بلوچ راج ھم مرچیگیں دور ءَ وتی پجار ءِ رکینگ ءِ
جُہد ءَ اِنت گُڑا اے وھداں سیاسی گہگیری پہ بلوچ ءَ نہ تہنا الّمی اِنت بلکیں
ابید سیاسی گہگیری ءَ بلوچ ءِ جُنز نا سرجم اِنت پرچا کہ ھمے سیاسی گہگیری ترا
دگنیا ءَ سر کنت ترا دگنیا ءِ چماں کاریت ءُ درستاں چہ گیش سیاسی گہگیری اِنت کہ
تئی راج ءَ سیاسی سنچ ءُ سما ءِ نیمگ ءَ کاریت گُڑا اے وھد ءَ سیاسی گہگیری ھر
ھما راج ءَ پہ الّمی اِنت کہ آ دگنیا ءِ تہ ءَ وت ءَ رکینگ لوٹگ ءَ اِنت۔
