رد و بند تروک و مچ کروک : قاضی داد محمد ریحان
(یاتی)
شہید بالاچ مری نا دا انٹرویو ءِ اونا شہادت آن منہ تو مُست اسہ ڈھکوک ءُ جاگہ سے آ منہ بندغ مش تیٹی مزاحمت نا وخت آ ہلکر ہرادے ویڈیو نا دروشم ئٹ وڑ وڑ ئنا پریس کلب و ایلو جاگہ غاتیا سر کریر، اينو بالاچ مری نا شہادت آن پد بلوچ ورنا تا است آک اسہ خاص ءُ ڈول ئسے ئٹ شہید نا زند و کڑد نا بابت ئٹ چاہنگ خواہرہ، داڑکِن گڑا نن شہید نا اسہ گھنٹہ نا ویڈیو انٹرویو ءِ نوشتئی دروشم ئٹ نما مونا تخنہ ہرا ٹی شہید راجی تحریک نا کُل پاناد آتا بابت ئٹ ہیت كننگ تون اوار اوار سانحہ تراتانی نا بابت ئٹ ہم شابیتی ئٹ ننے سرپند کرینے۔
سوج :_ 27 اگست 2006ء نا اصل تدینی تا بابت ئٹ پہہ کر ننے کہ ہراٹی نواب اکبر بگٹی شہید مس و نی بچاس ؟
ورندی :
23 آن ہلیس 27 اگست 2006ء اسکان ہرا جیڑہ مس او 23 اگست آن بنا
اف بلکہ دانا روتہ غاک ہمو وخت تون لگرہ کہ ہرا وخت نواب اکبر ڈیرہ بگٹی ءِ ہِلّاسُس
و مش تیکن مون کريسُس ہمو وخت اوڑے جڑپ آتا بناء مسک و مدام برجاء اس، دا جڑپ آتیان
مُست ہندنو تدینی گدرينگانے ہرا جوان وڑ ئٹ خننگانو، مخلوق و میڈیا نا پاننگ
دا اس کہ دا جیڑہ غاک ہڑدے نا کاریم جوڑ مسسر
گدرینگوکا ہشت و نو(8,9) تو ٹی نواب صاحب ہرانگ
ہناکہ ہمونگ مُر خلوک آ گولہ باری یا گن شپ
ہیلی کاپٹر آتے ئٹ سمکاری مسکہ یا بمباری یاکہ جیٹ طیارہ آتے ئٹ اوفتا جاگہ
غاتے آ جلہو مسکہ ہندا سوب آن نواب صاحب ءِ نن بھاز وخت مہر ئٹ یا کوڈ پن ئٹ "ڈاڈا " نا پن ئٹ توار کرينہ دا سوب
آن کہ نن اونا اندر انگا جاگہ یا ہمپنگ نا بارَو ئٹ حال حوال تِخِنگ کین، نواب صاحب
بھاز وخت تہارمئی نا وخت آ تینا جاگہ ءِ مٹ کریکہ و تينا سنگت آتون توسکہ، و اوفتے
اوفتا زمواری و کاریم تا بابت ئٹ رغاماکہ داڑان پد ہم او تینا جاگہ ءِ بدل کریکہ،
پدا ایلو دے یا اسہ دے ئس ہلّاسہ تو اونا جاگہ غا گوله بارود ئٹ جلہو مسکہ و جیٹ طیارہ
غاک سر مسرہ، کنا خیال ئٹ دا خلق و مش تیٹی
مدام جاسوس طیارہ غاک بال ئٹ مسرہ کہ
ہرا دا جاگہ غاتے پٹارہ _
نواب صاحب تینا نزوری و ناجوڑی ہرا کہ اونا نت آتیٹی اس آن بیدس ہم مدام
سر پر ئٹ مسکہ و سنگت آتا و تینا رکھ ئنا بست و بند ءِ کرفیکہ، نواب اکبر بگٹی تون
ہرا 23 آن 27اگست اسکان مس دادے ناگمان ءُ
جیڑہ ئسے نا اگہ پن تننگے تو دا ریاست نا کنڈ آن پنجاپی کن کاریم کروکا تا کنڈ آن ہرا ریاست کن کاریم کیرہ دا ہیت
ءِ ڈھکنگ و اونا گواچن ءِ ڈھکنگ و اونا مون ءِ ہڑسنگ نا چم کیرہ ہرا گند ءِ او
تالان کرینو کہ امر پیر مڑد انگا بلوچ ءِ او پیرانسری ٹی ٹک کریر اوڑے اونا بندغ آتیا
بمباری کریر دا کل ءِ ڈھکنگ کن او چم کریر۔ ہرادے دا جواز ہیترہ پارہ کہ دا ناگمان
ءُ تڈینی ئس مسنے، نی تينٹ سوچ خل دا جلہوک اسٹ ارٹ افس دا بے حساب ءُ، اگہ نی
دافتا ٹوٹل ءِ خل داخس جلہو تیان پد ہم ریاست نا کنڈ آن دا پاننگے کہ دا ناگمان ءُ
تدینی ئس اسک تو دا بھاز بھلو دروغ ئسے و بندغ آتا خن تیٹی مِش شاغنگ نا ہیت ئسے انتئے
کہ نواب صاحب تون دا تدینی مس اوکان پد بلوچ آتیٹی ریاست نا برخلاف ہرا خار و اُست
ئنا لار ودی مس دا کل ءِ پدین كننگ کن دا کل
چم آتے کریر دا تو اسہ بھلو داستان ئسے ہراڑا ای خواہو تو مچ آ دے ہیت كننگ کیوہ کہ
انت انت مس ولے نما ہرا سوج اس ہراٹی نم ہرّفیرے
کہ 23 آن 27 اگست اسکان انت مس ای ہمو نا کڑمبی ئٹ ہننگ خواہوہ۔
کل آن مست ای دا پاو کہ 23 اگست بلکہ اسہ اِرا دے مست بھاز بھلو کچ ئسے
ٹی فورسس واک آن مونی اسہ جاگہ ئسے ہراڑے اسہ وہوکو دیر ئسے، ہموکان فوجیک دا جاگہ
ءِ تینا گیرہ ٹی ہلکر و ہموکان دا معاملہ مدان مدان چلینگسا کرے مچ آ خلق ئٹی فوجیک
چرینگ اسر و تینا مسختی کاریم تے کننگ ئٹی اسر ہندا سوب آن ننے جوان وڑ ئٹ اوفتا کاریم تا سما تماکہ ولے 23 اگست نا
دے سہب ئنا دے ٹک تون اوار دا جاگہ نا خلق ءِ فورس آک تراتانی کنڈ آن ہم مچ آ گھیرہ
ٹی ہلکسر و بند کریسر، پدا سہب ئنا ہفت بجہ نا وخت آ مُرآن توپ آتے ئٹ دا خلق آ بھاز گوله باری کریر دا بھاز
بھلو و گٹ ءُ جاگہ ئسے ولے داکان بیدس لاری (جاگہ نا پن ئٹ و ادا کننگ ئٹ ردی مننگ
کیک ) ہم مرو و بھاز شار آک و جاگہ غاک ہرافتا ای پن تے جوان تِپّرہ ولے بھاز آ جاگہ غاتیان گوله بارود آک بسرہ
تمارہ گڑا ہفت بجہ غان نو بجہ اسکان گولہ باری برجاء اس اوکان پد نو بجہ نا وخت آ مَنہ
گن شپ ہیلی کاپٹر بسر و ہمو جاگہ غا سر مسر ہرا کہ نواب صاحب نا ہند اس ہموڑے بمباری
نا بناء ءِ کریر۔ او ہندا نشان تننگ خواہسنو و پارینو و خبر تیٹی خننگا وگڑاس ای تینت
بنگُنٹ کہ نواب صاحب نا ہرا ڈھکوکا جاگہ اس ہموکان ہیلی کاپٹر آتے منہ گولہ خلکنو گڑا
دا تو بلوچ قوم ءِ اسہ وڑ ئسے ٹی ریفنگ نا چم ئسے، ہرا بندغ ءِ مُچ آ راج ڈھکنگ و باہوٹ
تننگ خواہک او جاگہ غان ہیلی تے امر گوله خليره او مگہ داخہ بے سُد ءُ ؟
منّیوہ کہ ننا وسائل و کم تربیت نا سوب آن نن ریاست آتا اسٹینڈرڈ آ
پورو دڑنگ افن ولے بلوچ راج امر کہ تینا گوریلا
جنگ ءِ كننگ ئٹی ءِ گدرینگوکا شست ( 60 ) سال آن نن گوریلا جنگ ءِ تینا بلوچی زبان
ٹی پراری جنگ پانہ، پراری جنگ ہرادے نن كننگ ئٹی اُن دادے نن جوان چانہ بلوچ قوم چائک
کہ دا جنگ ءِ ننے امر کروئی ءِ داٹی اسہ ریاست ئسے آنبار اسہ جاگہ ئسے آ جاگہ جوڑ كننگ
آن پد ہموکان گوله بارود خلسپہ بلکہ تینا خاص انگا کسرشون آتے امر رکھوک آ جاگہ غا
تیٹی ڈھکرہ ہراڑے دنو ردی نا امکان ہم مفک۔
انتس کہ مس ای اونا کڑمبی ٹی ہننگ خواہوه کہ داڑے سہب ئنا نو 9 گن شپ
ہیلی کاپٹر آک گوله خلنگ نا بناء ءِ کریر ہموتم منہ ہيلی كاپٹر پین اوفتے آزمانی کُمک
تسرہ و رکھارہ، خلق ءِ بھاز کچ ئٹی بشخار و گیرہ کریر نو یا یانزدہ بجہ نا وخت آ کنا
خیال ئٹ تلی دامن نا كنڈ آ اسہ جاگہ ئس ارے ہندا کنڈ آ ہم ہیلی کاپٹر آک فوجی کمانڈو دڑیفنگ
نا بناء ءِ کریر ہندا وخت آ دا پاننگا کہ نواب صاحب نا خبر تمانے اوفتے و اودے گھیرہ
كننگ نا کوشست مننگ ءِ تو ہمو وخت آ سنگت آتا ہمو جاگہ ٹی رياستی دلال آتون و پنجابی
فوجی تیتون جنگ بناء مس، مرسا مرسا جنگ ترند ءُ دروشم ئسے ٹی بس پدا ہر کنڈ آن
گولہ باری و توفک آتا توار بننگ ئٹ بس، دا لڑ جوان چکا، و ہرا نواب صاحب نا ڈھکوکا
جاگہ اس ہموڑے بھاز آ ہیلی کاپٹر و توپ آتیان گوله بارود بٹیرہ نيم نیم گھنٹہ نا سلنگ
آن پد ولدا ہندا وڑ برجاء ئس، مچ دے تہارمئی اسکان گوله بٹیرہ پدا ایلو دے دے مچ تہارمئی
اسکان ہندا ڈول برجاء اس، ہمو جاگہ نا ہیب کیب ئٹ بهاز بھلو کچ ئسے ٹی فوجیک دڑنگاسر،
و دا ہند ءِ چار پنچ ٹولی نا دروشم ئٹ گھیرہ ٹی ہلکسر تو دا وخت سنگت آتا حال احوال
اسٹ ایلو آن پننا ہر اسٹ تینا جنگ ئٹی گٹ اس ہچ سما تمتو کہ دیر زندہ ءِ دیر خلنگانے
اخس سنگت اسر جنگ ترسا کریر و شہید مرسا کرییر، ولے کس ئنا تا نرنگ و لغوری نا احوال
مونا بتو دا جنگ ہندن چلینگا ایلو دے ہراتم اخبار ٹی دا ہیت بس۔ دا ہیت
ءِ ای پانِنگ خواہوہ کہ نواب صاحب تون ہرا سنگت آک اوار اسر اونا رکھ ئكن، اوفتیتون
حال احوال مس او ہم جنگ ئٹی اسر ہرا منہ سنگت اوڑتون اوار اسر و گڈیکو وخت اسکان
اوڑتون اوار اسر و اینو اسکان نواب صاحب تون اوار اوفتا ہم ہچ ءُ درک ئس اف، تو دا
رد ءِ کہ نواب صاحب نا سما اف کہ او غار ئٹی
ڈھکوک اس یا اوکان پیش تمنگ نا کوشست ئٹی اس۔
ای مہالو ہم پارینٹ کہ اونا ہند بھاز تنک و سخت ءِ اوکان پیش تمنگ و اوٹی ہِننگ نا کسَک بھاز کم ءُ و نواب
صاحب ناجوڑی نا دو آن جوان ہِننگ کتوکہ دا اونا نزوری ئس ای پاننگ افٹ ولے داکان مست او
سنگت آتے پاريسس کہ اگہ دنو وخت ئس بس تو کنا اوکان پیش تمنگ نا سوچ ءِ خلپیرے بلکہ
ای اوڑے دژمن تون جنگ ئٹی شہید مننگ خواہوٹ دا جوان اف کہ ای ہند ءِ و سنگت آتے ہِلّو، ہراتم دا جیڑہ مس تو سنگتاک جتا جتا مسر ہر اسٹ
تينا گیرہ ٹی ہراڑے پاسینگاسس ہموڑے اسک، ایلو دے رياستی ادارہ غاتا كنڈان پاننگا کہ
نواب صاحب ہندا جیڑہ ٹی شہید مسنے تو دا کل دروغ ءُ ولے دا ہند ہنداخس دافتا گھیرہ
ٹی بس ہر اسہ سنگت تينا دستہ غان جتا مس پیش تما ہمو دے آن اینو اسکان ننے نواب صاحب
نا ہچ سما تمتو کہ ہراڑکے،جوان ارے یا اف؟ ولے رياست نا کنڈ آن دا ہرا ہیت تالان
کننگا کہ نن خلکنن تا ولے نواب صاحب نا جون ءِ اینو اسکان خنتون و نئیکہ ہمو سنگت آتا ہرا نواب تون اوار اسر اینو
اسکان گم ءُ ننے سما اف زندہ ءُ یا کہ آخہ، تو گڑا امر نن دا ہیت آ باور کین کہ نواب
صاحب دا جہان ئٹی اف ؟ نواب صاحب درو ہم ننتون
اوار اس اینو نا دے ہم نن تون اوار
ءِ و پگہ ہم نن تون اوار مرو تانکہ نن اونا بے ساہ غا جون ءِ خنتنُن ننے باور بفک یا کہ ہرا وخت اسکان کس بلوچ ئس دا ہیت ئنا پک پائے یا
نن تینا خنتے ئٹ خنتنن یا اونا مسخت آجوئی بلوچستان نا آزاتی دو بتنے نن امر جارات
ئٹ تولنگ کينہ ۔
اسہ پین ہیت ئس ہرا کنا ملی ٹی تولپک کہ نن انتے اشراف اُن ؟ نواب صاحب
نا کھڈ کننگ نا وخت آ جون ننے ملتنے اونا جون ءِ کس خنتنے و نن زو زو کھڈ کننگ نا کوشست
ئٹی ان، دن گڑا نن نواب صاحب نا کڑد، جند و
مسخت ءِ ڈغار ئٹ شت کننگ ان ہرا بندغ تینا زند ئٹی کس ئنا مونا کاٹم ءِ شیف کتو بہا
متو ہچ دم درینگتو نن اونا جند آن بیدس انتئے
دن زو اشتافی کین و اودے کس ئنا مونا شیف کین دا کنا ملی ٹی تولپک کہ دا نا پد آن انت
مسخت ئسے ہرا نا سوب آن نن بهاز زو دا جیڑہ ءِ چٹفنگ خواہنہ، دا اسہ پاش ءُ ٹپ ئسے
کہ اسہ بندغ ئس دا جہان آن رخصت کیک تو نن اودے کھڈ کینہ منوہ کہ دن انگا بندغ آتا
مسخت اوفتا زند ئنا ہمو کاریمک کھڈ مفسہ ولے دڑد مدان مدان آ ایسر مرسا کیک ۔
اگہ اسہ بندغ ئس گم مرے دن کہ نواب صاحب تون و ایلو سنگت آتون مس اينو
بلوچستان نا چار ہزار آن زیات بلوچ گم ءُ دا کل ئنا دڑد ننا است ئٹ ملوکا ٹپ آنبارءِ
و دا ٹپ آتے نن پر کننگ خواپنه بلکہ دا ٹپ آتے دے پدے کونڈسا تازہ تخنگ المی ءِ،تانکہ
نن دا ٹپ آتا خڷ آن آسودئی ئٹ خاچپن بھاز مف مچٹ آن مچٹ اوفتا ہمو مسخت ہراڑکن او ساہ
ءِ تینا ندر کریر ہراڑکن او بیگواہ كَنّنگار اوفتے اوفتا مزل آ سر کین نن زوت آن زوت
ہندا کوشست ئٹی اُن دادے چٹفِن تو دا سوچنگ و فکر کنننگ نا ہیت ئسے کہ دن زو انت ئسے
نا اشتافی؟ ایلو سوج ئٹی ای نے آنبار انگا تیان ارّفنگ خواوہ کہ کنا گامگیج آک انت
اسر و کنا انت کہ گامگیج آکو دافتا بھاز آ سوب آک ہریر دا وخت آ سیکورٹی نا سوب آن
مستی نا عملی کاریم تا بارو ئٹ پاننگ کپرہ انشاءﷲ بروکا وخت ئٹ زند وفا کرے تو مچ بلوچ
راج ئنا مونا جوان وڑ ئٹ بیان کروٹ تا۔
سوج:
دا ہیت اخس راست ءِ کہ بگٹی قبيله ٹی فوجی تا بندغ ارے یا مسنے ہرافتا دو آن دا آپریشن مس؟
ورندی :
دن کہ ای وختی پارینٹ کہ دا اسہ فردی و اسٹ انگا و اولیکو جیڑہ اف دا
جلہو تا لڑ گدرینگوکا نو 9 تو آن برجاء ءِ ہرافتا مسخت ہندا اس کہ بلوچ مزاحمتی راہشون
آتے خلنگے و ایسر كننگے، اسہ پین ہیت ئس پاننگ خواہوہ کہ نواب صاحب یا پین مزاحمت
کروکو بلوچ ئس پنجاپ آ ہننگ و قوضہ كننگ کن دا جنگ ءِ کننگ اف بلکہ او تینا ڈیہہ آن
بدر تا قوضہ ءِ ایسر کننگ و اوفتے نرفنگ کن بش مسنو۔
ہرا مش تیکن مون کرینو دا جنگ ءِ كننگ ئٹی ءُ اوفتا ایسری کن قوضہ گیر
آ ریاست زوراکی و بیدادی کننگ ءِ، ہر کس کہ دا بلوچ راج دوستی نا نظریہ ءِ ہرفے ہرادے
سما مس کہ غلامی آن آزات مننگ نا بس ہندا اسہ کسر ءِ گڑا او دا گِڑا کن تیار مرے کہ
قوضہ گیر نا کنڈ آن اودے قید و بند و بیگواہ و کہسفنگ یا زندہ کھڈ كننگک۔ دا کہ ہرا ریاستی مکر و چم آکو ہرا بلوچ نا
برخلاف ءُ دافتے ڈھکنگ کن نیمون کننگک کہ وختس اسہ پنجاپی ئس اوفتا قوضہ ٹی مرو یا
فوجی تا بندغ ئس۔داسہ کل آن مست دا سوج بش مریک کہ فوجیک انت کیرہ و ارٹمی ہیت بلوچ
آتا خلاف مروکا ظلم و زوراکی ءِ ڈھکنگ کن ہرا چم آتے کننگ ءُ دافتا لڑ بھاز مست آن
برجا ءِ ہرافتے ٹی منہ پِن ننا مونا پاش ءُ۔
شھید اسد اصغر بنگلزئی ، حاجی جان محمد مری ، و دا لڑ ئٹ اينو "ڈاڈائے
بلوچ" نواب اکبر بگٹی ہم ارے۔ اينو اسکان
سما تمتو کہ او حیات ہریر یا آخہ؟ ہرافتا جون و لاش آتے اینو اسکان کس خنتنو دا کل
چم تے ہندا گندہ غا کاریم تا ڈھکنگ کن کیرہ،
دا پنجاپی مخلوق ءِ دروغ آتا زی آ باور کرفنگ خوائرہ، ولے ہرا لمه نا دوٹی اونا مار
ئنا دتری آ جون مرے ہرا جون آ اسٹ آخہ ہزار آ ٹپ آک مریر گڑا اودے امر نواریفوس؟اوفتے نی امر نواریفوس کہ ہرافتا
ڈیہہ ئنا سینہ غا نی بے کچ ظلم کرینس ولدا ہم نی دافتے آن دا اومیت ءِ تخسہ کہ او چُپ
مریر تولِر دا وخت ای انت کہ ہیت كننگ ئٹی اُٹ دا ای پنجاپی ءِ آخہ تینا بلوچ راج ئتون
كننگ اُٹ اوفتے پاننگ اُٹ دو تفوک کہ نم تینا جون آتیا ہربو کہ ننے آ انت انت
بیدادی کننگتنے؟ ننا جونک ٹپ آتیان بروے ءُ
پدا ہم ننے دروغ نا آسرہ ہیتِرہ نم بس اسہ وار ئس تينا جون آ مچٹ ہربو نمے آ ہر
گڑا پاش مریک کہ گواچن انت ءِ؟
سوج : نما و ریاستی فوج ئنا کہوکا بندغ آتا گواچنی کچ اخس ءِ؟
ورندی :
دن کہ ای وختی پاریٹ کہ دا جنگ 23 اگست نا نن آن بنا مس و اسہ کش آ
مسہ دے برجاء سلیس - یانزدہ بجہ 23اگست 26 آن ہلیس شام 27 اگست اسکان گوس ئنا جنگ ئس
مرسا کرے فوجی و جہد کار آتا نيام ئٹ بھلو کچ ئسے ٹی سركاری فوجیک کسکر۔
انتئے کہ ہرا وخت بلوچ آک ٹولی تیٹی بشخنگار گڑا سركار کوشست کرے کہ علاقہ غاتے قوضہ کین گڑا علاقہ نا ہر کنڈ آ جنگ بناء مس ہراتم کہ فوجیک مونی ہِننگ ءِ بناء کریر و جنگی آ جاگہ غاتے قوضہ کننگ نا کوشست کریر تو او وخت آ صد آن زیات نا کچ ئٹ فوجی مرگ ئنا گواچی مسر ہرافتے جہد کار آک تینا خن تیٹی خنار داڑے بھاز آ ننا سنگت آک ہم گُم مسر ہرافتا زند و مرگ ئنا ننے سما اف ہرا ٹپی مسر اوفتا لاشاک ننے دو بسر گم مروکا سنگت آتا کچ 18 غان خڑک اس ۔
سوج :-
مگہ دا راست ءِ کہ دا جنگ ئٹی کیمیائی سلاہ کاریم ئٹ ہتنگانے؟
ورندی :
داڑے دا سوج بش مریک کہ بلوچ آتے آ ہرا ہرا سلاہک چلیفنگتنو کنا ملی ٹی
دا سوج بش مریک کہ بلوچ آتے آ ہرا سِلا ءِ کہ چلیفگتنے؟ بھینگنی نا سِلاہ
,غریبی نا سِلاہ ،ناجوڑی نا ، لالچ نا , زور تننگ نا ، ریاستی ادارہ غاتا دو آن گم كننگ
نا سِلاہ, خلنگ بٹنگ نا سلاہ ،دا کُل سلاہ تا لڑ بھاز بھلن ءِ ای دا نا کڑمبی ٹی ہننگ خوائپرہ ۔
اگہ کس ئس خلنگک تو دا ہچ ءُ ہیت ئس اف کہ او ہرا سلاہ ئٹ خلنگانے ، ہراتم او خلنگِک
اونا تو زند ایسر مریک ہرا سِلاہ مرے کل تا مرگ ئنا سامان ءُ ولے گڑاس روایتی و گڑاس
رغیر روایتی ءُ وا ہم جوان انگا بندغ آتیٹی اسہ روایت ئس ارے کہ او ہُرِرہ کہ او امر
ءُ دژمن ئسے تون جنگ کرے و ایسر مس ولے بلوچ آتا دا بدبختی ءِ کہ پنجاپی ٹی نہ ظرف
ارے نئیکہ او جنگی اصول اتیان ولد ءِ، کنا خیال جيرت و بہادری نا پن آن واخب افس بس
دا تو اسہ خرما ئسے ہرا تینا بھينگنی ءِ چٹفنگ کن ہر گڑا كننگ کیک۔ کیمیائی سِلاہ انت
ئسے دا ایٹمی سِلاہ ہم کاریم ئٹ ہتنگ کیک بلوچستان نا زی آ، دا تو ننا لمه وطن بلوچستان
نا اُست ءِ کہ او شست سال آن دا ظلم و زوراکی ءِ سگنگ آن پد ہم چُپ ءِ ولے داڈے منہ
ہندن ءُ مڷ ہریر ہرا دا ظلم و زوراکی ءِ چُپی
ئٹ سگنگ کپسہ نی کيمیائی آخہ بلکہ ہرا سلاہ ءِ چلیفس دا نہ کہور نئیکہ چُٹّور دا مدام
روان مرور تینا حق ئکِن، دا مڷ آتا کچ قربانی تننگ آن کم مفَرو بلکہ قربانی آن دا مڷ
آتا کچ پین زیات مرسا کرو ۔ بلوچی
ٹی اسہ متل ئسے کہ " کوماں پہ ءَ مرگ گار نہ بنت ءَ پہ ءَ گرگ ءَ گار بنت
" یعنی " راج آک کہنگ آن چٹپسہ بلکہ راج آک زوراک آتا مونا کاٹم ءِ شیف کننگ
آن چٹرہ۔"
ڈاڈائے بلوچ نواب اکبر بگٹی نا قربانی و دڑد آک ہرافتے او ہرفے داڑان
کنا خیال پاپک کہ بلوچ ئس یا غیرتی ءُ بلوچ ئس بھیم ئنا گواچی مرو ولے داڑان اوفتا
قربانی نا نظریہ پین زیات بھلُن وسوگو مرو پدا دا کسرٹی پین زیات ورناک اوار مرور انتئے
کہ قربانی آن بندغ آک چُٹیپسہ پین سوگو مریرہ اسہ بندغ نا قربانی بلوچ قوم ئٹی اخس
بھلو فکر ئس بش کیک اسہ بندغ نا قربانی مچ راج ئٹی فکر شاغنگ و راجی آجوئی نا مسخت
جوڑ مریک گڑا ای اِرا لوز ئٹ نا دا سوج نا ورندی ءِ ہیتوہ کہ نہ بیرہ کیمیائی ولے کلسٹر بمب آتون اوار ایلو ہر وڑ ئنا عیر روایتی سلاہ ہرافتے نن بلوچی ئٹ پانہ
"بے غيرتی " نا سلاہ ہم دا وخت آ کاریم ئٹ ہتنگار۔
کل آن مُست دا پاننگ خواہوہ کہ
ہرا بندغ آک تینا راج ئکن قربانی ہیترہ او کہسپسہ اوفتا مرگ آن راجی جنگ آک سلپسہ ایلو
نا ہرا سوج نا ورندی سلوک ءِ او دادے کہ کس
ئس نے ہندا پارینے کہ "بلوچ راجی جہد " ايسر مسنے ایلو دا کہ اواری کن بھاز
ہُرے تمانے تو راج آک تینا مزل یا مسخت
" راجی آزاتی " کن صد آ آخہ بلکہ ہزار آ سال آتے اسکان جہد کیرہ ولے
دم درينگپسہ پدا ہم راج آک سر سہب مریرہ ہرا تینا مزل آ سر مریرہ ہرا تینا جہد ءِ برجا
تخرہ و قربانی تروکا راج آتا کچ بلوچ راج ئنا قربانی داسکان سر متنے ای دا پاپرہ کہ
بلوچ راج قربانی تتنے داسکان ولے مونی بھاز قربانی تروئی تمو بلوچ راج ءِ ننا ہرا مزل
ءِ او اسہ مفاد یا پاکستان آن بار پارلیمانی
نظام تون تفوک اف بلوچ آتا لمه وطن بلوچستان نا راجی آجوئی ءِ اگہ داڑکن نن
تينا ساہ ،مال و مڈی و کاٹم ءِ ندر کین وا ہم ہچ ئس اف، و ہرا بندغ آک ڈاڈائے بلوچ
نواب اکبر بگٹی نا دا قربانی ءِ ہندن بجازی ءُ جوش و جوزہ سے ٹی وہیفِر گڑا ای دادے
بھاز بھلو گناہ ئس سمجھوہ انتے کہ دن انگا قربانی تے چیدہ نا بستار ئٹ چاہنگے، ننے
بلوچ راجی جہد ئٹ سیوت ئٹ مننگ کن اسہ پلیٹفارم ئس ملّے، نہ کہ منہ پن ئنا راجدوست
گل آک دادے تینا سواد آتیکن کاریم ئٹ ہتیر ای کس ئنا پن ءِ ہلنگ خوائپره انتئے کہ ای
کس ئنا کنڈ آ ہور ہرفنگ خواہپرہ انتئے کہ کنا خیال ئٹ بلوچ راج داسہ تینٹ بھلو کچ
ئسے اسکان سرپند و باشعور مسنے او تینا دوست و دژمن ءِ جوان درست کیک۔
دن انگا قربانی تے چیہدہ غاتا مثیل ئٹ سرپند مرسا اگہ دافتیان پنت ہلنگے
گڑا قوم آک تینا جہد ئٹی مستی گام خنگ کیرہ، اگہ دا گڑا ءِ ہرن کہ اسہ بندغ نا قربانی
آن راج اخس پہہ مریک و تینا مزل آن خُڑک مریک، پدا اگہ ہر بلوچ ہندن قربانی کن مخ
ءِ تفے راہی مرے گڑا نی اُر کہ دا راجی جہد ہراڑے سر مریک ایلو ہراڑے اسکان ہیت اواری
نا ءِ تو ہمو کل راج آک ننا مون آ بریرہ ہرا راج آک جہد كننگ ئٹی ءُ تینا راجی مسخت
کن ولے ننے دا ہیت ءِ ہم است آن دروئی اف کہ
اواری دیر تون مرے و انت ئکن؟ اواری نا مسخت انت مرے ؟ اگہ کس ئس اسہ جاگہ ئس اُرا
تفنگ نا بنا ءِ کیک تو اوڑکن اسہ نقشہ ئس جوڑ کرفک پدا دانا کاریم ءِ اسٹ ءِ ہیتک پدا
داڑکن او گِڑا ہتیک ہرافتیان جاگہ تفنگک پدا دانا تفنگ کن ہندنو بندغ پٹنگک ہرا دا
کاریم ءِ جوان چار و پہہ مریر ہرافتے دا سما مرے کہ ہرا جاگہ غا دا اُرا تفنگک دا جاگہ
غا امر ءُ گڑا درکار مریک ہراڑان دا اُرا نا دیوال آک جوان سوگو مریر۔ ہندا سوب آن ای دا پاننگ خوائسٹہ کہ اگہ کل
بلوچ آتے اسہ جاگہ غا مُچ کیو تو گڑا او بھازآ ليكہ غاتا بندغ آک مرور دن کہ ن لیگ
آن ہلیس میم لیگ اسکان ہر وڑ ئنا ليكہ نا بلوچ
ارے کل اسہ جاگہ اوار مننگ کپسہ ولے اسہ ہیت
ئس ارے کہ آشوبی فکر ہرافتا اولی مسخت مرے و مزل اسٹ مرے او اسہ مزل و مسخت ئسے کن
قربانی تننگ کن بیدار مرور پدا اگہ دافک اواری نا بنیات آ اسہ آشوبی تحریک ئس جوڑ کننگ
خواہر تو او بندغ آک سرسہب مننگ کیرہ و تینا مزل و مسخت اسکان سر مننگ کن اسہ کسر ئس ہم جوڑ كننگ کیرہ ۔ ہرا شعور انفرادی مرے اودے راجی حساب آ اگہ
جاگہ مِلپ گڑا اودے فلسفہ یا فکر پاننگ کیسہ، ہرادے قومی پڑ آ تالان کننگ کن دیر و
خاخر آن گدرینگوئی تمک یعنی دتر نا ہولی گوازی كروئی تمک گڑا دا فکر راج اسکان سر مریک
و مسخت نا سرسہبی جوڑ مننگ کیک، و دا پاننگ نا سرپندی ئس مرو کہ اواری کن ہُرے مسنے۔
سوج: قلات جرگہ ءِ نی ہرا نظر ئٹ ہُرسہ ؟
ورندی:
گڑاس ہندن ءُ سوج مریرہ ہرافتا ورندی تننگ تینا پُچ آتا کشنگ نا مثیل
ءِ، دا ہم ہمو سوج آتیان اسٹ ئسے ای کس ئسے
نا کاریم ءِ یا اسہ بلوچ ئس بد پاو گڑا ای تینے بد پاننگ اُٹ ولے دا سوج نا ورندی ٹی ای منہ سوج بلوچ قوم آن کیوہ کہ کل آن مُست دا
کہ مگہ بندغ اسہ دترخور ءُ خرما ئس دلیل ئٹ
منفنگ کننگ کیک؟ اودے دا ہیت ئنا زی آ منفنگ کننگ کیسہ کہ او نے كُنپ یا تینا ليكہ
غان ٹلینگے؟ اِرٹمیکو
ہیت مگہ دن مننگ کیک کہ اسہ بدر ڈیہی ادارہ ئس بش مرے و بلوچ راج ءِ اونا آجوئی ءِ
ہیتے ؟ دا ہیت راست ءِ ہراڑان ای پدی مننگ كپرہ امَر ءُ ہم کمک ئس دو برے اوڑان ای
پدی مننگ کپرہ امر ءُ ہم پلیٹ فارم ئس ملے یا موقع و کمک ئس مرے اودے کاریم ئٹی ہتوئی
ءِ راجی شعور و بیداری ءِ مونی ہتنگ کن دا
گچین ءُ کاریم ئسے، دا گڑا ءِ ہم ہُننگ لازم
ءِ کہ آیا اسہ پشہ سے نا خلنگ کن توپ ئس کاريم ئٹ ہتنگ المی ءِ؟ پاننگ نا مسخت دادے کہ دا کل عمل آتا حاصل انت پیش
تما ؟ گڑا داٹی سوچنگ المی ءِ کہ کوٹ کچہری ٹی کیس كننگ کِن داخس بھلو قبائلی دیوان
ئسے نا خوائفنگ جوان ءِ مگہ ؟ یا دادے پین مسخت ئسے کن کاریم ئٹی ہتنگ اوفتا مسخت
ءِ؟ اسہ ہیت ئسے آ سوچنگ بکار ءِ کہ اينو بلوچستان ئٹی ہرا شعور بیدار مسنے ہرانا سوب
آن اينو دا راجی جہد دا جاگہ غا سر مسنے اونا عملی مثیل انت ءِ؟
تو دا کاریم آن چپ ہننگ آن کنا خیال پائک کہ گڑا دیہاڑ ننے اسل بشخپرو
گڑاس پارلیمانی نظام، گڑاس اسمبلیک، گڑاس فنڈ
آتا دو بننگ ہندا شعور نا بیداری نا سوب آن
ءِ ؟ بلکہ سلاہبند آ جہد کہ ہراٹی بلوچ آک تینا ساہ و مڈی کُل ءِ قربان کیر، ہرانا نتیجہ ٹی اینو بلوچ راج بش مسنے سلوک ءِ و پہہ مننگ ئٹی ءِ تینا راج , راجی
شرف و راجی سواد آتے ترجیح تننگے دادے ہُروئی ءِ دادے ہِلنگ گناہ ئس مرو ہرادے دیہاڑ
اسل بشخپرو ديوان اخس زیبا مرے گڑاک اخس جرکّر ولے بندغ ءِ تینا جند و تینا کچ ءِ است
آن دروئی اف پاننگ نا مسخت دادے کہ ہرا کاریم اینو بلوچ آتے ہیسُنے داڑے سر کرینے بلوچ
نا راجی شعورءِ بش کرینے دا راجی شعور آن چپ مرسا پین کنڈ ئسے آ مون کپس انتئے کہ اگہ
دن مس گڑا کنا خیال پائک دیہاڑ ئٹ پدا بھاز بے زیب ءُ مثیل ئس مرو ۔
ایلو سلیس دا ہیت کہ اینو سیاسی آ کاریمک خننگرہ ہرا سیاسی گل آکو بلوچ
آتیٹی بھاز جوان ءُ عمل ئسے ولے پدا تینا است
آ دا ہیت ءِ شاغوئی تمک کہ دا کل ءِ نن انت ئسے کن کیننگ اُن، دافتے ٹی مگہ ننا زاتی مسخت ارے؟ مگہ داٹی ننا زاتی سواد
آک ہریر یا راجی سواد آک ہریر، ہرافتے دوئی کننگگ کن دا کل کاریمک مننگ ءُ، ننے یات
تخوئی ءِ کہ ننا بھلا مسخت انت ءِ پارلیمانی اسمبلیکو یا راجی آجوئی ءِ اگہ نن چنکو ساعت ئسے کن ہم تینا راجی
مسخت آن چپ ہڑسینگن و بجازی و زاتی آ سواد آتے کن بلوچ راج ءِ رد ہیتن گڑا ای پاوہ
وخت ءُ دیہاڑ ننے بشخپرور ننے گام ہرفنگ آن
مست تینا سد وار دا ہیت ءِ است آ ہتوئی ءِ کہ ننا بھلا مسخت انت ءِ ؟ ای اسہ وار پدا
بلوچ راج آن خواست کیوہ کہ تینا اُست آ ہتبو تینا است آ دو ءِ تخبو ہرّفبو کہ ننا مزل
ومسخت و کاریم انت ءِ؟ داسا سلیس ہیت سرکاری جرگہ(قبائلی سڑدار تا جرگہ) نا تو مننگ
کیک کہ اوفتا اودیم ءُ مسخت مریر ؟ انتئے کہ شکار ءِ گٹ كننگ کن ایلو کنڈ آن توار توار
کیرہ پدا ہرا کنڈ آن شکار پیش تمِک ہمو کنڈ آ وختی آن منہ شکاری تاڑ ئٹ تولوک مریرہ ۔تو ہرا ہیت کنے لگک
او دادے کہ بلوچ آک راجی حساب آ شکار تو جوڑ مننگ افس ؟ ننے "سركاری جرگه
" آن مركننگ و پین عمل ئسے نا الائنس ئس تننگ ئٹی تو افس پاننگ نا مسخت دادے کہ
ننے تینا جند ئنا راست انگا مزل(مزاحمتی تحریک)
آن مر كرسا پین کنڈ ئسے آ مون کپس؟ دا ہیت ئنا ننے جوان پام ءِ تخوئی ءِ کہ اگہ
نن دنو رد ءُ کاریم ئس کرين تو بلوچ دیہاڑ ننے اسُل بشخپرو، ہرا ہیت نا کنے گڑتی مریک
او ہندادے کہ بلوچ قوم بے سدی نا گواچی مف ہندا سوب آن ای پدا دوتفوک پاروٹ کہ ہرا
کاریم تیان بلوچ راجی تحریک ہرا شعوری اد آ سر مننگ ءِ
۔ داڑان
نن تینا خن تے ہڑسپن انتئے کہ دا ہمو کسر ءِ ہراڑان ننے عزتی ءُ زند ئس یا بخت
والا تے شرف والو مرگ ئس رسینگو ۔
سوج:۔
نی انت پہہ مریسہ کہ بے خوانندہ یا ہنر آن نیست انگا بلوچ راج بیدس کس ئنا سلاہ و
ایلو وڑ ئنا کمک آن تینا حق ئنا جنگ ءِ کننگ کیک؟ یا نی انت سرپند مریسہ کہ بلوچ
چنکو راج ئسے نا مننگ نا سوب آن پنجاپی و پاکستانی سرکار نا مونا سلنگ کننگ کیک یا
آخہ ؟
ورندی :
دا ہیت کنا پہہ مننگ یا مفننگ نا
اف، دیہاڑ ننے انت پائک ہرا راج آک اگہ ظالم و زوراک ئسے نا مونا کاٹم ءِ شيف کرینو
مگہ بچانو ۔ مگہ تینا دود و بولی و پجار ءِ بچفنگ ئٹی سرسہب
مسنو؟ ای پاوہ دا کل سوج آتا ورندی آخہ نا
دروشم ئٹ مِلک, بیدس کہ ہمو راج آتیان ہرافک تينا مچٹ آ وسائل و مچٹ آ بندغی کچ و
طاغت آن پد ہم تینا ڈغار ئکن جنگ کریر و مرگ ئنا گواچی مرسا کریر ولے گڈسر تینا جند
و پجار ءِ ایسری آن رکھار و ہمو راج آک اينو
ہم جہان نا ایلو سرسہب آ راج آتا لڑ ئٹ اوڑدہ ءُ ۔
داسہ سوج دادے کہ نن تون اخس کمک ارے نن تون اخس سلاہ ارے سوج دا ودی
مریک کہ نن تینا ہیت آ اخس سوگو سلوک اُن ، نن تینا راج ئکن اخس قربانی تننگ کن تیار
اُن۔ ہراتم بلوچ قوم اسہ سوگو ءُ قول ئس کے گڑا اودے ہچ ءُ بھلو و سوگو ءُ طاغت ئس
ایسر كننگ کپک اسہ مثیل ئس ہیترہ کہ "پٹنگ آن خدا ہم ملِک" گڑا اگہ نن ہیت
آ تینا سوگو سلن تو دا اسہ راج ئسے نا آزاتی نا ہیت ئسے ،ہرا ہیت ولدا داخس سخت و نا
ممکن لگپک ہرا وڑ پاننگک، دا اسہ بندغ ئسے نا جنگ اف بلکہ اسہ راج ئسے نا شرف و ساندہ
سلامتی نا جنگ ءِ۔
مننگ کیک گڑاس بندغ ءِ کنا ہیت آک رومانوی ہم لگر ولے راج و ڈیہہ ئکن
رومان ہم تخوئی تمک۔ نن اگہ کچ كننگ ئٹی لگن پدا دا نگاہ ئٹ ہُرن کہ نن دا ٹی انت تسنن
و ننے انت دو بسنے گڑا کنا خیال پائک دا تُول اسل بریبر تمپرو دا ناپ تول ءِ بریبر
كننگ کن رومان نا گڑاس ہرادے رومانٹک پارہ شاغوئی تمک دا خاطر آن کہ اسہ جوزہ ئس اسہ
عشق و مہر ئس تخوئی تمِک "لمہ ڈغار بلوچستان" کن ہم ہمو رومان ، جوزہ و مہر
آتے است ئٹی تخوئی تمک اگہ ننے آن دا گڑا مف نن دن کننگ کپن و حساب کتاب ئٹی لگان گڑا
کنا خیال پائک دا قربانی ءِ نن ہیتنگ کپَرون ایلو سلیس دا ہیت کہ بلوچ پنجاپی یا پاکستانی
فوجی تا بوٹ آتا شیف آن لتاڑ ئٹی مرو یا ايسر مرو تو دا بلوچ راج ئنا زی آٹے کہ آخبت
کن اونا فیصلہ و عمل انت مرو؟ اگہ نن پھل ئنا وڑ اوفتا کسر آ شاغوک مرین گڑا کنا خیال
ءِ ننے لتاڑنگ ئٹی اوفتا است ئٹ ہچ ءُ دڑد ئس ودی مفرو ولے بلوچ ہمو پِت جوڑ مرے کہ
ہرا پنجاپی نا بوٹ آن لگے ایمون مرے پدا نت آن تا است اسکان سر مرے و ٹپ کے اوڑکن دڑد
ئس جوڑ مرے پدا کنا خیال کہ گڑا بلوچ ءِ لتاڑنگ اوفتیکن سُتھرا مفرو و ہراتم دا دڑد
اوفتا مرگ ئنا سامان جوڑ مس گڑا بلوچ راج ءِ
پنجاپی قوضہ گیر آن آزاتی و آسراتی ملو
اگہ اسہ پنجاپی ئسے دا لگک کہ
او اسہ بلوچ چُنا , لمه ، ایڑ یا پیر ءُ بندغ ئس خلنگ آن پد آسرات ءُ تغ ئس کشنگ کیک
گڑا اگہ دنو سختی و سوری پنجاپی آ بس تو او گڑا کس آ دو ہرفنگ آن مُست سد وار تينا سوچ ءِ خلو پاننگ نا مسخت دادے کہ اگہ
نن گام خلپنہ کاریم کپنہ تینکے کسر پٹپنہ بس بیرہ ہندا سوچ ءِ خلینہ کہ نن نزور اُن
ننا کچ مچٹ ءِ ننا کمک آک مچٹ ءُ گڑا دا غلامی ننا بخت جوڑ مرو ولے ایلو کُنڈ آ اگہ
نن ہمو خرین آ باخو جوڑ مرين ہرادے کنوکا ہم جوان ءُ تغ ئسے ٹی خاچنگ کپ گڑا کنا خیال
پائک ننے کیدنگ داخس سُتھرا مفرو تو نا سوج نا ورندی کنا خیال نے مِلک کہ پھل جوڑ مسن
ننے لتاڑنگ بھاز سُتھرا مرو پت جوڑ مسن گڑا ننے كننگ و کیدنگ نا وس کس ئٹی مفرو بلوچ
اگہ ہندن ءُ پِتی ءُ یا ڈنگی ءُ ساہدار ئس جوڑ مرے کہ او نا کُدو ٹی دو شاغوک آتے صد
وار سوچ خلوئی تمے کہ اودے گڑا مننگ کیک اودے ہم ننِکان آسودہ ءُ تغ ئسے نا بخت مفرو۔
گدرينگوکا فوجی آپریشن آک ہرا بلوچستان ئٹی مسر او زندہ ءُ ثبوت ءُ جنرل یحییٰ ،جناب ایوب ، مسٹر بھٹو ہراکہ بھاز زیم تخوکو و طاغتور ءُ حاکم گوندنگارہ ۔او ہم بلوچستان ٹی فوجی کاروائی کریر ہزار آتا کچ ئٹ بلوچ آتے شھید کریر، ولے دا شہادت آتیان راجی جوزہ و جہد ایسر متو بلکہ دا خاخر آ تیل شاغنگ نا مثیل ئس مس۔ ہرا نا سوب آن اینو ہم دا آجوئی نا جوزہ، جہد ئنا جوزہ و قربانی نا جوزہ زندہ ءِ۔ تو پاننگ نا مسخت دادے کہ مچٹ آ کچ ، مچٹ آ کمک نا سوب آن اگہ نن سوچن کہ نن غلامی ءِ تینا لخ نا طوق جوڑ کين تو کنا خیال پائک دا بھاز بھلو نا سرپندی ئس مرو، و اگہ نن بیرہ کشکول ئس ہرفن و بشخنگ نا اومیت ظالم آن کين تو کنا خیال پائک دا جوان مفرو و پدا پاکستانی جمہوریت آن چنکو ہم اومیت ئس تخنگ تو کنا خیال ئٹ آزاتی آخہ ایسری نا کسر ءِ۔ و ہرا سال آتیٹی بلوچ راج اسمبلی تیتون تفوک مننگ یا اومیت ئس تخانے۔ دا سال آتیٹی ہم ننا مونا دا کہ بلوچ راجی تحریک و بلوچ راجی شعور نا اسہ جاگہ ئس مسنے و ہرا سال آتیٹی بلوچستان ئٹ فوج کشی مننگ ئٹی اس تو ہمو وخت آ ہم شعور نا اسہ جاگہ ئس اس تو دا کل ہیت آتیان دا ہیت مون آ بریک کہ راجی آزاتی و راجی شعور کن ننے ہرا کسر ءِ ہلوئی تمِک و ہرا کسر ننے ننا بھلا مسخت آ سر کیک تینا کوپہ و جوزہ غاتے یخين تخنگ و جوان ءُ جوزہ است ئٹ تخنگے گڑا مزل مُر افک ۔
سوج:
بلوچستان و پاکستان نا آخبت ءِ نی امر خنسہ؟ہراڑے کہ امریکہ نا خنک ہم بلوچستان نا مڈی تے آ خلوکو تو او داڑے قوضہ کننگ نا کوشست ئٹ مرو یا ارے دنکہ مڈل ایسٹ ئٹ؟
ورندی:
بلوچستان ہم دا جِہان نا اسہ بشخ ئسے ، بلوچستان پين ہچ ءُ ڈغار ئسے آن جتا اف دافتیتون تفوک ءِ تو گڑا ننا جیڑہ غاک ہم اوفتیتون تفوک ءُ دن کہ اینو جہان کل اسہ خلق ئسے نا دروشم ءِ ہلکنے ہرادے انگریزی ئٹ گلوبل ولیج پارہ ، تو دا خلق ئنا اسہ گلی یا ہُرا سے نا پن بلوچستان ہم ارے دا خلق ئٹی بھاز آ بندغ آکو، و ہیت سلیس امریکہ نا تو خلق ئنا اسہ سروک ئس ہم مریک تو خلق نا سروک تون سلام دعا تخوئی تمک اسہ گڑا ئس دا کہ خلق ئنا سروک کس ئنا اُرا نا خواجہ مننگ کپک ہر ہُرا نا تینا اسہ پن اسہ شرف و اسہ ننگ و ناموس ئس مریک خلق ئنا سختی و سوری نا وخت آ اُرا والاک خلق ئنا کمک ءِ كننگ کیرہ ولے تینا شرف ءِ اوڑکن بٹنگ كپسہ، اُرا نا اسہ تينا جند ئنا چاگڑد ئس مریک سنگت اخس سنگت مرے ولے ايلم ايلم ءِ ۔ سلیس ہیت پنجاپستان نا تو دا خلق ئٹی دُز و لوفر ہم مریک تو دز و لوفر آک ہرا وخت اسکان جشو کننگ کیرہ کیر ولے گڈسر اوفتیتون ہم اندن مرو دن کہ ہر دز و لوفر تون مریک ۔
سوج:
پاکستان و امریکہ نا سرکار کن نا انت کلہو ءِ؟
ورندی:
اينو بلوچ راج بيداری نا ہمو سیم آ سلوکے ہراڑے وخت ئتون اوار بھاز آ
راج آک سلوک مریرہ داڑے دا راست ءِ کہ بھلا
زوراک آتا مون آ بلوچ بیوس و تنیا خننگک ولے دا ہیت ءِ ہم یات تخوئی ءِ کہ بلوچ ہمو
راج ءِ ہرا نا ڈیہہ بھلن و شابیت و وسائل آن
پُر ءِ ہرا ںا جہانی سياست نا نہاد ءِ بلوچ آن زیات بدر آک چارہ ہندا سوب
آن ای چاوه کہ بھاز آ بھلا گوازی گر آک داڑٹی استخوائی تخور ولے
پہہ مروک و دیہاڑے خوانوکا راج آک تینا مسخت و مفاد آتون اوار اوار ہندی راج آتا مسخت
آتے ہم نگاہ ٹی تخرہ ولے بلوچ راجی مفاد آتے نگاہ ٹی شاغنگ آن بیدس بھلا سوگو آ راج
آک کل سواد آتے ہلنگ کیرہ داٹی ہچ ءُ شک ئس اف ۔
سلیس ہیت پاکستان نا مفاد آتا تو دا مفاد آتے سرسہب كننگ کن بلوچ راج ہچ پابند اف پنجاپی ہرا وخت اسکان بلوچ
راج ءِ پُھلنگ کیک پُھلے ،عیش کے ولے ہرا دے بلوچ تینا نت تے آ سلیس گڑا ہمو دے اينو
تون اوار گدرينگوکا دے تا ہم حساب ءِ ہلون پدا ہم ایلوفتا چورک آتیا چلينگوکا پاکستان
اٹ وخت پین مستی دن کرسا کرو ؟ اینو راجدوستی نا اسہ پیمانہ ئس اسمبلی ءِ ہلنگ
گوندنگک، دا ہم بلوچ آتا بھلو بد بختی ئسے کہ بیرہ پن ئنا اسمبلی تیان یا پاکستان نا
جمہوریت ءِ ہلنگ ءِ بلوچ راجدوستی نا آخیر گوندرہ، ای سمجھوه کہ دا اولی گام ءِ ہرا
راجدوستی نا کنڈ آ اشارہ ئس ہیتک، منِوہ کہ اسمبلی تے ہلنگ راج دوستی و بلوچ راج کن
قربانی تننگ نا کنڈ آ اشارہ ئسے ولے راج ئنا مسخت آتیکن ساہ تننگ ہم کم ءِ گڑا اسمبلی نا ہلنگ ہرا بھلا ہیت
ءِ دا ہیت ءِ اگہ سمجھرہ کہ دا راجدوستی نا آخیر ءِ گڑا دا بندغ آک تینا جند ءِ تینٹ
نا بے سار جوڑ كننگ ءُ، راجدوستی کن داسکان راج آتے بھلو کچ ئسے اسکان سار والو مروئی
و بھلو قربانی تروئی تمو۔
وخت وخت بننگ ئٹی بریک کہ گڑاس بندغ آک سوج ہرفرہ کہ بالاچ مری ہم پارلیمان نا بشخ ئسے
اسمبلی نا ہم کنا خیال پائک کہ ای دا ہیت
ءِ اولیکو دے آن صفا کريسٹ کس اگہ پہہ متنے تو ای داسہ پاوہ او گند سفا کروکو اسہ ٹشو
پیپر ئس اسک ہرادے ای کاریم ئٹ ہتنگ آن پد بھاز مست گند ئنا ڈبہ ٹی خساٹ نہ دا اسمبلی
آن کنا اومیت ئس تخوک مسنے و نئیکہ داڑان کنے اومیت ئس ارے دا سوب آن کہ اسہ پلیٹ فارم
ئس اسک بندغ آتے نشان تروئی و پاروئی اسک کہ ننے علاقہ ٹی ہم بلوچ راج نا کمک دوئی
ءِ دا سوب آن کہ ریاست نا مِشن تا با ءُ بھلو دافتے بند كننگ کپنہ ہرا پارہ کہ دافتیتون
تینا خلقی مخلوق نا کمک اف فلان فلان نہ کہ داڑان ای اومیت تخوه نہ کہ کس ئس داڑتون
اوار کنا پن ءِ ہلے کہ بالاچ مری ہم تو اسمبلی نا بشخ ئسے نہ ای دادے اسمبلی ئس سمجھوه
نئیکہ کنے ناز ئس مسنے دانا بشخ مننگ نا زی آ ای ولدا پاوہ کہ او گند سفا کروک ءُ ٹشو پیپر ئس اسک ہرادے کاریم آن پد ای خساٹ ۔
اسہ پین ہیت ئس دا کہ دا گندہ ءُ کاریم ئس پنجاپی، پاکستان و اونا چمچہ غاتا ہرافک بلوچستان ٹی ءُ دادے کہ بلوچ ءِ بلوچ تون جنگ ہیت بلوچ ءِ اوغان تون جنگ ہیت ہرادے پاک فوج پارہ دا تو پاک نا معنی غان چپ ءِ کہ ہراٹی بلوچ آتے بلوچ آتون جنگ ہیترہ استعمال کیرہ و اوغان آتے اوغان ايلم تیتون جنگ ہیترہ پدا ہندادے پاک فوج نا پن تسنو ہرا کاریم کہ جوڑ مسنے او کاریم ءِ تو داسکان کتنے دیہاڑ نا کنڈ آ ای ہننگ خوائپرہ، ننا ہرا کسرشون آک ءُ او دیہاڑ ئٹی پاکستانی فوج نا کڑد ءِ مونا ہیسنو کہ انت ئسے دا تو بس پڈ ئنا فوج ئسے اسٹیٹ ایجنٹ فوج ئسے ایلو مفاد ہروکو فوج ئسے دا مچ آ زند اسلام نا پن آ مسلمان آتا پن آ بلوچ آتے شیف ہتیسا و غلام کریسا کرے ۔ بلوچ، اوغان و سندھی تے ای دو تفوک پاوہ و کل آن زیات بلوچ ايلم تے کہ نمے اينو نما دو آن پاک فوج نا پن آ بلوچ آتے تین پہ تین خلفنگ وکہسفنگ ئٹی ءِ، پاننگ نا مسخت دادے کہ اول داڑان دا تو ہرّفنگے کہ نا مسخت انت ءِ اسہ راج ئسے تینا دو تا کیرنگ آن كنِنگ اوفتے خلیفنگ کن تينا وسائل و گوله بارود آتے کاریم ئٹی ہتنگ ءِ اُرا نا چوکیدار کائے درگہ نا با غا تولے اُرا نا رکھ ءِ کے نہ کہ ہُرا نا تیٹی دزی کے۔
بھاز آ بندغ آک بلوچ سنگل پارٹی نا ہیت ءِ کیرہ کنا خیال پائک کہ بلوچ ءِ اسہ پارٹی سے نا درکار ءِ ہرا سنگل نا ہیت ءِ سما اف ہراڑسکان جوان مرو ولے پارٹی سے نا درکار ارے ہرا کہ سنگل آخہ بلکہ انقلابی سنگل پارٹی ئس مرے، ہرافتا سواد آک،مسخت آک ، ہرافتا مزل راجی آزاتی مرے ہندن انگا بندغ آتیان جوڑ مرے ہرا بلوچ راجی آجوئی کن اوار یکجا مریر۔ نی اگہ اسہ بس ئسے ٹی وڑ وڑ نا بندغ تولف ہرافتا مزل آک جتا جتا مریر کس کوئٹہ غا کس مستنگ آ کس سبی آ ہننگ ئٹی مرے گڑاس نیام کسر آ دڑنگور تو کل ئنا مزل امر اسٹ مریک، اگہ کل ئنا مزل اسٹ ءِ گڑا اودے پٹوئی تمک، ننے داسکان مزل نا سما اف ننا مزل انت ءِ و مزل آ سر مننگ نا کسر امر ءِ گڑا امر پاننگ کینہ کہ نن اوار مننگ کینہ ہرا وخت اوار مسن تو ننا خواست آک انت مرور۔
ننے دا ہروئی تمو کہ دیوان ٹی دِننا کنڈ آ خیال آک زیات مرور راجی آزاتی
والا نا یا صوبائی آزاتی والا نا یا کل آن زیات منافقی نا ہیت دیر ءِ كننگ بریک ۔ جوانی
ہندادے کہ مزل وختی آن گچین کننگے، بلوچ راجی آجوئی و مزل آ سر مننگ کن سلاہبند آ جہد
مرے گڑا داڑکن دیر مخ تفوک ءِ او بندغ آتے کل ءِ اوار کروئی و اسہ کنڈ آ راوان کننگے، اگہ نن دا اولی کاریمک ہرافتے
انگریزی ٹی "کرائیٹیریا یا بنداوی ٹک" پاننگک تیا سوچتون و داڑا عمل کتون
تو دا نا پد ہم ہمو وڑ مرو دن کہ وختی آن بلوچستان ٹی مرسا بننگ ءِ۔ پارٹیک جوڑ مریسا
کیرہ و پنیسا کیرہ دن انگا پارٹی تا کاریم پننگ ءِ دا سوب آن کہ داتا کاریم، مزل و
مسخت کن مفک دافتا سوچ آک پختہ مفسہ ہرا وخت اسکان کل کاریم تے تسلی سوچ فکر ئٹ کتنو
او تم اسکان بےسہبی نا کچڑی ئس مرو ہرا نا پد بیرہ بے سہبی ءِ دن انگا پارٹیک اگہ آشوبی
لیکہ غان جوڑ مفس تو دا پارٹی تا ہچ ءُ مسخت ئس مفک و دا پارٹی تا ہچ ءُ جوان ءُ نتیبجہ
ئس ہم خننگ ئٹ بتنے۔
