آشوبی جُنزانی تہ ءَ لبزانک ءِ بُندپتری کرد
نبشتکار: ھیرجان بلوچ
پجار:
آشوبی جُنزانی
ھچبر یک سنگرے نہ بیت آ مُدام ملٹی فرنٹ بُنیات ءَ جُنز اَنت ، آشوبانی
سوبمندی ءِ ھاتر ءَ روزیگی ءُ سیاسی یا جنگی فرنٹ ءِ ھمبرائی ءَ ربیدگی فرنٹ مزنیں
ارزشتے داریت۔ اے فرنٹ ءِ وسیلگ ءَ راج سما ءُ
راجی بزانتءَ رکینگءِ جنگءَ کن اَنت ۔پہ آشوبی تحریک ءَ ہرچ جُھدکار سرمچارے تُوری آ کوہ ءَ سلاہ بند اِنت یا گوں ند ءُ ازم ءَ دژمن ءِ تاکت ءَ پروش دیگ
ءَ انت۔ یک لبزانتے بگندئے گون وتی لبزاں بمبانی
دیم ءَ داشت مہ کنت بلے ھمے بمب ءُ
زوراکی ءِ پُژدر ءِ جوازاں وتی کلم ءِ کمک
ءَ وتی مھلوک ءُ ایندگہ جھان ءِ دیم ءَ پدر کُت کنت۔ لبزانت ءُ دانشور سکیں حساسیں مردم
بنت ءُ وتی چپ ءُ چاگرد ءِ جاورانی چارگ ءُ تپاسگ ءَ رند آیانی درانگازی ءَ کُن
اَنت ءُ وتی سرزمین ءِ سر ءَ بوؤکیں ھمک چستءُ
ایرانی سر ءَ نگاھے دار اَنت ءُ پدا ھما لوٹانی
بنیات ءَ ساچشت ساچ اَنت دانکہ آ راج ءِ راھدربری ءَ کُت بکن اَنت۔ پمیشکا چوش گُشگ رد نہ بیت کہ لبزانک مردمانی پگری ھیلکاری کنگ ءِ وسیلگ ءُ
لس مھلوکءَوتی کلوہ ءَ سر کنگ ءِ اولاکے۔اے نبشتانک ءِ تہ ءَ ما لبزانک ءِ بندپتری کرد ءُ ارزشت ءَ ماں جتائیں
زانتکارانی ھیال ءُ آشوبی جنزانی بنیاد ءَ گیشینگ ءِ جھد کنیں۔
ولادمئیر
لینن :
لینن وتی نامداریں
ریزمانک "پارٹی آرگنائزیشن ءُپارٹی لٹریچر" ءِتہ ءَ لبزانک ءِ ھوالہ
ءَ آزات ھیالیں لیکہ ءَ رد کناناں گُشیت
کہ اِزم یا لبزانک نپری لوٹ ءُ واھشتانی
بنیات ءَ مانا دیگ مہ بیت بلکیں مچانکی جھد ءِ اژدری ئیں بھرے ءُ ھما نگاہ ءَ چارگ
بہ بیت چی ءَ کہ نبشتکار یا ازمکار اے جاورانی سیلی نہ اَنت بگندئے آ اے جنز ءِ
گردانک ءِ تہ ءَ لیکھی باسک اَنت ءُ ھمے
بنیات ءَ وتی ازم ءَ پہ آشوب ءِ دیمروئی ءَ کار بہ بند اَنت۔ یک شریں ساچستے ھما
وھد ءَ ارزشت دار بیت کہ آئی ءِ تہ ءَ
تبکی (یا راجی) سما ودی کنگ ءِ بودناکی ءَ ھوار ءَ یک سیاسی ءُ مچانکی مکسدے بہ
بیت۔ ایشی ءِ مراد ایش نہ اِنت کہ لبزانک
المی اِنت تھنا پروپگینڈا ٹولے ءِ رنگ ءَ کاربندگ بہ بیت بلے اے
المی اِنت کہ ھمک ساچشت ایردستیں تبک ءِ لوٹانی پدا بہ بیت۔ لبزانک ءِ
باروا ءَ لینن ءِ سرجمیں باوست ءَ اگاں لھتیں گالبندانی تہ ءَ بہ گیشین ئے گُڑا آ چو اے ڈول
ءَ بیت کہ لبزانک لیکھی زاشت (Ideological Education) ءِ مھکمیں اوزارے کہ آ زانتکار ءُ لس مھلوک ءِ میان ءَ ھیالانی
ھمسنتی ءُ ھیلکاری ءِ وسیلگے کہ لبزانک زوراکی ءِ ھلاپ ءُ آشوب ءِ ھمراھداری
ءِ مارشت ودی کنت ءُ اے مارشت ستک ءُ کمٹمنٹ ءِ تہ ءَ بدل بنت ، پدا ستک ءُ کمٹمنٹ ءِ بنیات ءَ مردم گل ءِ درشم ءَ ھوار بنت ءُ
اے ھواری سیاسی تاکت جوڈ کنت۔
ماؤزئے تنگ اینان فورم ءَ لبزانک
ءُ ازم ءِ سر ءَ گُشتانک:
ماؤ زئے تنگ وتی اینان فورم ءِ گُشتانک ءِ تہ ءَ لینن ءِ ھمے
ھیال ءِ تہءَ کمو گیشی کاریت ءُ لبزانک ءَ راجمانی ءُ مارشتی تاکتے لیک ایت
ءُ گُشیت لبزانک مردمانی سنچ سما ءِ درانگازی ءَ ھوار ایشاں بدل اوں کت کنت۔ ماؤ ءِ نگاھاں لبزانک تھنا سیاسی مارشت ودی نہ کنت بلکیں مردمانی سما
ءِ تہ ءَ آشوبی جوزگ پیداک کنت ءُ جنز ءِ تہ ءَ چو تُپنگ ءِ داب ءَ آشوبی سلاھے ءِ
جاہ ءَ کار کنت۔ آ اے چیز ءِ سر ءَ گیش دلگوش دنت کہ آشوبی لبزانت ایردستیں تبک ءِ
میان ءَ ساڈی بہ بیت دانکہ آیانی جاوراں پھم اِت بکنت ءُ اشاں راستیں درشم ءَ دیم ءَ آؤرت بکنت۔
ماؤزے
تنگ اینان فورم ءَ لبزانک ءُ ازم ءِ سرا تران کنت گُشیت کہ "آجوئی جُھد ءِ بازیں فرنٹ بنت کہ ایشانی تہ ءَ ربیدگی یا لٹریری فرنٹ اوں ھوار اَنت۔ تہنا توپکی لشکر اوں ھچ ءِ کار ءَ
نئیت اِنت وھدے کہ ربیدگی لشکرے گون مہ بیت"ماؤ ربیدگی لشکر لبزانت ءُ
ازمکاراں گُشیت کہ آ وتی زبان، ربیدگ، راجدپتر ءُ وتی پجار ءَ بہ رکینت اَنت ۔آجوئی
جُھد ءَ ایندگہ فرنٹاں ھوار مارا ربیدگی
لشکر اُوں پکار اِنت کہ آ ند ءِ سرا جنگ کنت۔مئے سلاہ بندیں لشکر ءِ کار اِش اِنت
کہ دژمن ءِ دست ءِ سلاھاں پچ بہ گیپت ءُ دژمن ءَ پروش بہ دنت ۔ھمے وڈءَ ربیدگی لشکر ءِ
ڈُبہ اِنت کہ دژمن ءِ دوتل ءُ دوپوستی ءُ آشوب ءِ ھلاپ ءَ سازاِتگیں پندلاں پدر بکنت ءُ دژمن ءِ دیم ءَ داروکیں لشکر ءَ سکین ءُ دلبڈی بہ دنت۔
ماؤ ءِ
گُشگ اِنت کہ مارا وتی روشت چارگی اِنت کہ مئے
روشت چی پیم بہ بیت، مارا زانگی
اِنت کہ ما گوں کے دیم پہ دیم ایں ءُ کُجا
مارا توسیپ کنگی اِنت ءُ کُجا مارا ایر جنگی اِنت۔ دژمن ءِ توسیپ ءُ ستا ءَ کُت نہ کنیں آ توری سامراج
ءِ جند بہ بیت۔ اے لس مہلوک ءِ ایدگہ دژمناں گوں مئے جندءِروشت سرجم ءَ ایر جنگ بہ بیت بلے مارا ھما
گل ءُ مردمانی سرا اُوں نگد کنگی اِنت کہ آ مئے لیکہ ءُ مئے لس مہلوک ءِ ھلاپ اَنت
ءُ روچ پہ روچ گنتر بوان اَنت۔ بلے وھدے لس مہلوک ءِ گپ بیت آ ساڈایگ بہ بیت۔ آیانی جُھد ءُ کُربانیانی توسیپ کنگی اِنت۔ لس مردومانی اُوں
نزوری ءُ کوتائی ھست اَنت کہ آ جتائیں لیکہانی منوگر اَنت بلے مارا آ اوپار کنگی اَنت مئے لبزانکار ءُ ازمکاراں آ ھیل دیگی اَنت نئیکہ آ
کلاگ زورگی اَنت ءُ دژمن لیکگی اَنت بلکیں اَنچیں رھبندے ٹھینگءُ دیگی اَنت کہ آ
وتی تہءَ بدلی آرت کُت بکن اَنت۔ مئے نبشتگیں نکان آیاں سرپد بوھگ ،یکمشت ءُتپاکیءَگوں
دیم ءَ جُنزگ ءِ سکین ءَ بہ دینت ءُ آیاں آشوبی جوڈ بکن اَنت۔
ماؤ
دیمتر ءَ گُشیت وانوکانی جیڑہ ھما مردمانی
جیڑہ اِنت کہ آیانی ھاتر اما نبشتہ کن ایں۔ ازمکار ءُ لبزانکارانی بُنکی کار ھمیش
اِنت کہ آ چہ لس مردمانی تب ءَ شریں دابے ءَ آژناگ بہ بنت ۔اگاں لبزانکارءُ ازمکار
چہ لس مھلوک ءُوتی وانوکاں چہ نہ آژناگ اَنت ءُ زمینی راستیاں چہ دُور اَنت۔ گُڑا
اِشانی درور چو ھما بامردانی ءَ اِنت کہ آیاں جنگجاھے نیست ءُ چہ زمینی راستیاں
دور ءُ نا بلد اَنت۔ اِے وڈیں لبزانکار نہ پہمیدگ اَنت، نہ پہمیدگی ءِ بزانت منی
کرّا ءَ چہ لس زُبان ءَ نہ آژناگی اِنت۔ ما چوں لبزانک ءُ ازم ساچیں کہ وھدے ما اُلسی
زُبان ءَ گپ کُت مہ کنیں۔ بازیں نبشتکار شاھزانتانی زبان ءَ کارمرز کن اَنت بلے وانوکانی
جند لس مھلوکی زبان ءَ سر پد بنت۔ وھدے ماؤ چہ جنگجاہ ءَ گستائیں بامرد ءِ گپ ءَ
کنت گُڑا آئی ءِمول ءُ مراد ھمیش اِنت کہ (لبزانکار ءُ ازمکار) مھلوک ءِ راستیاں
چہ دور بوھگ ءَ اَنت۔
فرانز
فینن ءِ Literature of Combat :
ھمے ڈول ءَ فینن اوں وتی کتاب “The Wretched
of The Earth”ءِ تہ ءَ لبزانکی گھگیری (Literature of
Combat)ءِ باوست ءَ کاریت۔ آئی ءِ رد ءَ
نوک آباتکاری سرجمیں ترامے کہ ایردست ءِ
زمین ءِ ھمرائی ءَ آئی ھیالانی سر
ءَ اوں کبزہ کنت۔پمیشکا ایردست مدام وت
ءَ ،وتی زند گْوزینگ ءِ داب ءُ وتی دود ءُ
ربیدگاں چہ زورگیرءَ کمتر سرپد بیت۔ ھمے
ھیال کنت کہ منی ھستی نوں بس گوں زوراک ءِ گلام بوگ ءَ گوں بندوک اِنت ءُ اے چہ ھُدا ءِ نیمگ ءَ منی بھتءَ
کپتگ۔ فینن اے جاور ءَ لبزانک ءَ
ڈیکالونائزیشن ءِ ٹولے سرپد بیت۔ آئی ءِ رد ءَ لبزانک وتی پجار ،
بیانیہ ءُ ھستانک ءَ دوبر درجنگ ءِ راہ اِنتءُ آ اے کاریچ ءَ سئے بھرانی
تہ ءَ گیشین ایت ؛اولی بھر ءِ اےتہ ءَ ھندی زانوگر یا نبشتہ کار زوراک ءِ ربیدگ ءُ
بیانیہ ءِ رندگیری کن اَنت، دومی بھر ءِ تہ ءَ آ ری ایکشنری بنت ءُ آباتکار
ءِ ربیدگ ءُ زانشت ءَ بد گُش اَنت ءُ ایشی
ءِ ھلاپ ءَ زھرشانی کن اَنت ءُ سیمی بھر ءَ آ گھگیری ءِ نام دنت کہ ایشی ءِ تہ ءَ لبزانک
وت ءَ آجوئی جنز ءَ گوں پیوست کنت ءُ اد
ءَ نبشتہ کار تھنا گھگیری ءَ لبزانی تہ ءَ بیان نہ کن اَنت۔بگندئے وت عملی دروشم
ءَ ڈی کالونیل زرمبشت ءِ بھر بیت۔ فینن ءِ اے دیدانک لبزانک ءَ گوں مُچانکی جھد ءَ ھمدپ کنت ءُ نپری ساچشتکاریءَ
آشوبی جنز ءُسیاسی عمل''Political praxis ''ءَ بندوک کنت ءُ گُشیت کہ اَبید
وتی دودءُ ربیدگ ءِ پد جنگ ءَ سیاسی آجوئی ھوادگ بیت۔
گوگی وتیاگو:
گوگی
گُشیت “ لبزانک بندیں کوٹی ءُ ھالیگیں درپے ءِ اندر ءَ رُدوم زُرت نہ کنت بلکیں اشی
ءَ سیاسی، چاگردی ءُ روزیگی تاکتانی مُھکمیں
سانے زُورگءُ وتی رُدوم برجاہ دارگ کپیت۔” گوگی ءِ رد ءَ لبزانک تھنا وتی مَدتءَ
تاکتور بوت نہ کنت بلکیں لبزانک وتی چپ ءُ چاگردءَ چہ سان زورایت ءُ ردوم گیِپت۔انسان
ءِ جند یک راجمانی ءُ سیاسی دلوتے ءُ لبزانک ھمے دلوت ءِ پیداوار اِنت۔ آ ھچبر
راجمان ءُ سیاست ءَ چہ گستا بوت نہ کنت۔ مروچگیں روچاں باز بلوچ لبزانکی سرکلانی
میان ءَ “لبزانک پہ لبزانک” والا
تبے گندگءَ کئیت۔ اِشانی ردءَ لبزانک وتواجہ اِنت گوں ھچ ءَ بندوک نہ
انت ءُوتی وڈءَ انت، تھنا مارشت ، زیبائی ءُ لزّت ھمیشاں گوں بندوک اَنت۔ جاھے زُلپے نازین ایتءُ جاھے موسمے۔ بلے اِے گپ ءَ من سرجم
ءَ رَد گُشاں کہ لبزانک تھنا لزت ءَ گوں
بندوک نہ اِنت۔ لبزانک انسان ءِ چپ ءُ چاگردءِ راستیانی نمائندگیءِ بستارے دارایت۔ گُلامیں راجے کہ آئی
چپءُ چاگرد ءَ بس جنگ اِنت۔گُڑا آئی ءِگْورءَ لزت ءِ جاہ ءَ درد، زیبائی ءِ جاہ ءَ
ویرانگی ءُ زوراکی اِنت ۔آ چوں اے چیزاں گستا بکنت ءُ بس “لبزانک پہ لبزانک” ءَ بہ
رکین ایت۔
لبزانک ءِ باروا
لھتیں بندپتری مسال:
دنیا ءِ
مزن نامیں نبشتکار آشوب (سیاسی لیکہ ءُ چاگردی جاورانی پیداوار اَنت)۔ جون رسکن ءِ
گُشگ اِنت کہ پلگاریں ءُ یکتائیں ازم/آرٹ جنگ ءِ پیداوار اِنت۔ راجانی میانءَ ھچ
چوشیں شاھکاریں اِزم ءُ ساچشت ودی نہ بوتگ کہ آ چہ جنگ ءَ گستا بہ بیت۔ دنیا ءِ
مزن نامیں نبشتہ کار چوشکہ میکسم گورکی کہ “ مات “ وڈیں گدار نبشتہ کنت کہ بزگی،
گُلامی پوریاگرانی جدءُ جُھدءِ کسہءَ
دنیاءِ دیمءَ پدر کنت یا فنن ءِ کتاب بہ بنت کہ وتی زمین ءِ سرءِ زورآورءِ داتگیں نفسیاتی سان ءُ گھگیری ءِ دروشماں
گشینان ءَ میان اُستمانی لبزانک ءِ بُندپتر ءِ بھرے جوڑ کنت۔لبزانک ہر ھما کسھاں دیم ءَ کارایت کہ جنگ ءَ پیداک کتگ اَنت۔انچوشکہ
لَنگڑی،بزگی،بے زمینی،درتہ پُچی ءُ در پہ
دری دُنیا ءِ شاہکاریں ناولانی بُنجائی کسہ اَنت کہ اے ناول جنگانی میان ءَ نبشتہ
کنگ بوتگ اَنت۔
دنیا ءِ بُندپتر ءَ بچار ئے گُڑا ھزاراں
درور دست کپیت کہ آیاں پہ وتی راجی پجارءُ آجوئی ءِ ھاتر ا لبزانک چوں وتی سلاہ
کُتگ۔ چین ءِ آشوبی لبزانت رائیسون ءِ باروا ماؤزے تنگ گُشیت کہ” چین ءِ دودمانی
آشوب ءَ کسے ءَ دردستاں چہ گیشتر بھر زُرتگ ءُ آئی ءَ آشوب ءِ سپردیمءَ بُرتگ ءُ
توکل ءِ مزن مردی ءِ چیدگے جوڑ کُتگ گڑا آ رائیسون اِنت”۔آ آشوبی لبزانتے بوتگ کہ وتی ساچشتءِ کارمرز کنگ زانتگ ئے۔ چیِک راجءِ ودی بوتگیں جولیس فیوچک کہ
آ چیکو سلواکیہ جنز ءِ آشوبی یے بوتگ۔آ یک
لبزانتے بوگ ءِ ھمرائیءَ یک سیاسی جُھدکارے ھم بوتگءُ گوں وتی ساچشتاں جنز ءِ رھشونی
ءَ کنان بوتگ۔آ روتاکانی شونکار بیت، کتاب نبشتہ کنتءُ تنظیم ءَ لٹریچر دنت۔
دژمن
مدام گُلامیں راج ءَ چہ وانگ ءُ زانگ ءَ دُور
دارگ لوٹیت ءُ علم ءُ زانت ءَ چہ دور بارت ئے ۔پرچاکہ آ ھچبر نہ لوٹیت کہ
ھمے داتگیں علم آئیءِ شعور ءَ پاد بکن اَنت۔ گُلامیں راجانی مزنیں کچے ءَ مردم بے
وانندگی ءِ زندگی یے گوازینگ ءَاَنت۔ماؤ گشیت پہ مئے بے وانندگانی
آشوبی سنچ ءُ سما ءِ پیداک کنگ ءَ اِزم ءِ مزنیں ارزشتے۔ یک ماتے اگاں کتاب
وانت نہ کنت بلے تامُر ءُ کسمانک چار اِت
کُت کنت ۔نکش ءُ اکسکاری یے چار اِت کُت
کنت۔ کُربانیانی داستانے گوش داشت کُت کنت۔ اے ھما مردم اَنت کہ اِشانی ھاتر ا پہ
لبزانک ءُ ازم ساچگ بہ بنت۔ ماؤ ءِ رد ءَ
ازمی کجام اوں تھرے بہ بیت آ لبزانک بہ بیت ، آرٹ ءُ نکش بہ بیت یا سوت ءُ زیمل اے
درست پہ آشوب ءَ بہ بنت۔
انچو شکہ
وتواجھی ءِ گرگ تھنا دژمن ءِ دیمءَ سلاہ بند بوھگ ءُ آ را چہ وتی زمین ءَ کشگ ءِ کوشست نہ اِنت بلکیں یکیں
گام ءَ لبزانکار ءُ ربیدگی لشکر ءِ وسیلگ
ءَ ربیدگی ءُ پگری سانکلاں چہ آجو کنگ اِنت۔ یک نیمگے اگاں دژمن ءِ دیم جنگی سنگرءَ پہ تیر داشتگ گُڑس دومی نیمگ ءَ لبزانکی
سنگر اوں دژمن ءِ ڈسکورس آئی داتگیں تب ءُ
ربیدگانی ھلاپ ءَ بہ داریت چی ءَ کہ لبزانک جنگ ءَ گار بوھگ نئیل ایت ءُ
آشوبی جُنزءِیک ارزشتداریں فرنٹے کہ ابیدے آئیءِ
بھرشت ءَ مُھکم بوت نہ کنت۔
آسر:
کمبر
چاکر گُشیت مئے لٹریچر مئے شہیدانی رتکگیں
ھون اَنت۔ دراسل مئے واست ءَ لبزانک ھمے اُوپار ءُ کربانیانی درانگازگ ءِ نام
اِنت کہ مئے مردم ٹارچرسیلانی تہءَ بند ءُ
ازیت سکگ ءَ اَنت، ھمک سکی اُوپار کنگ ءَ اَنت ۔ مئے گوستانک ءِ زیبائی مئے مردمانی کُربانی
اَنت ءُ اگاں ما لبزانک ءَ وتی مردمانی کُربانی ،سگ ءُ اوپاراں چہ گستابکنیں نہ مئے لبزانک پشت کپیت نئیکہ
مئے پجار۔ لبزانک راج ءِ یاداشت اِنت، آئیءِ دود، گوستانک، کُربانی ءُ راجدپتر ءِ پھازوک
اِنت۔ واجہ صباء گُشیت ساچشتکار،نبشتکارءُ شائر حساسیں مردم بنت، ھمک چیزءَ
باسما ء بنت۔ اگاں جاھے زلم بوھگ ءَ اِنت گڑا آ زلم ءُ زوراکی ءِ ھلاپ ءَ
نبشتہ کن اَنت ، توار چست کن اَنت۔ پمیشکا بلوچ
نبشتکار ءُ ازمی جتائیں تھراں گون بندوکیں مردم مرچی وتی ازم ءِ تاریخی زمہ
واری ءَ بزان اَنت ءُ عملی درشم ءَ وتی ازم ءَ گون راجی لوٹاں بندوک بکن اَنت چی
ءَ کہ اے ھستانکی جنگ ءِ میان ءَ بلوچ ءِ جند ءِ رکینگ گیش ارزشت داریت اگاں بلوچ
منت گُڑا لبزانک ءُ ایدگہ چیز مان اَنت بلے اے وھد ءَ بلوچ ءِ راجی ھستانک بیم ءِ
آماچ اِنت ءُ پدا اے پیمیں جاورے ءَ کسے بہ گُشیت کہ من تھنا لبزانک ءِ ترجمان آں ءُ من ءَ دگے ھچ ءَ گون
دست ءُ داوا نیست گُڑا آ لبزانک یا ازم ءِ
جند ءِ تاریخی کرد ءَ رد کنگ ءَ اِنت ءُ وتی راجی جنز ءَ چہ دستبرداری ءِ اظہار
کنگ ءَ اِنت۔ اے وھد ءِ لوٹ ھمیش اِنت کہ ازمی پڑاں گون سیادی داروکیں بلوچ وتی
ازم ءَ راجی جنز ءِ تہ ءَ سنگرے ءِ داب ءَ کارمرز بکن اَنت ، راجی جیڑھاں پدر کنگ
ءِ ھمرائی اشاں علمی بنیاد ءَ گیش ءُ گیوار کنگ ءِ راہ ءُ در دیم ءَ بیار اَنت۔
