نوشتوک: شمس سحر بلوچ
ہشت مارچ نیاڑی تا جہانی دے نا رد ئٹ و تیوئی جہان ئٹ سرجمی ئٹ اڈ تننگک۔ دا دے آ نیاڑی تا حق آتے کن سیمینار، کانفرنس، ڈیبیٹ، برانزی ریلیک کشنگرہ۔ ہشت مارچ نا پدندارہ ءِ اُرن تو ننے نیاڑی تا پارہ غان اسہ بھلو کڑد و کوشست ئس خننگ ئٹ بریک۔ دیہاڑ نا نوشتوک و زانتکار آک پارہ کہ ہرا وخت آ بندغ نا ڈغار نا زی آ زند ئنا بناء مس ہمو وخت آ بندغ آتا پوریا شکار اس۔ شکار کننگ نا زمواری نرینہ نا اس و اُرا نا رکھ و ہنکین آتا آباد کننگ و شکار آتے بشخ و چانٹ کننگ نا زمواری نیاڑی نا کوپہ غاتیا اس۔ ولے ہرا وخت آ جہان ئٹ صنعتی دور ئنا بناء مس تو اوکان گُڈ کاریم تے بشخ کننگ نا زی آ جنجال آک بناء مسر۔ نرینہ غاک زیات ارزشت تننگار و بھلا کاریمک نرینہ غاتے رسینگار۔ نیاڑی تا کاریمک محدود مسر و چنکا کاریمک اوفتا بشخ ئٹی بسر۔ دا کاریم تا بے بریبری، ووٹ ئنا حق نا تفننگ، نیاڑی تا کاریم تا وخت ئنا مرغنی نا برخلاف نیاڑیک برانز کشار۔ نیاڑی تا تینا حق آتے کن تحریک آتا بناء قطبی امریکہ و یورپ آن مس۔ 1908 ئٹی نیویارک ٹی 15000 نیاڑی برانز کشار۔ امریکہ ٹی اولیکو وار نیاڑی تا راجی دے ءِ سوشلسٹ پارٹی آف امریکہ 28 فروری 1909 نا دے آ اڈ تس۔ 1910 کوپن پیگن ٹی نیاڑی تا ارٹمیکو جہانی سوشلسٹ کانفرنس ئٹی جرمن سوشلسٹ ئس نیاڑی تا دے ءِ تیوئی جہان نا تلہ غا یات کننگ کن صلاح تس کہ نیاڑیک تینا تحریک و خواہوکا حق آتے کن اسہ دے ئس گچین کیر۔ جرمن سوشلسٹ نا صلاح غان گڈ جرمنی، سوئیٹزر لینڈ و ڈینمارک ئٹی نیاڑیک اولیکو نیاڑی تا جہانی دے ءِ اڈ تسر ۔1913 ٹی روس ئٹی نیاڑی تا برانز ایلو اولیکو جہانی جنگ نا وخت آ نیاڑی تا جہد آن گڈ 1917 ٹی روس ئٹی نیاڑیک اسہ گچینو برانز ئس کشار۔ ہرا نا سرحال " اِرغ و امن" اس۔ دا برانز انداخس ترند مس کہ زار شاہی نا تخت تما۔ دا برانز نا بناء مارچ نا توہ آن مس۔ اندا رد ئٹ ہشت مارچ ءِ نیاڑی تا جہانی دے نا رد ئٹ یات کننگک۔ 1977 ٹی United Nations ہشت مارچ ءِ نیاڑی تا جہانی دے منا۔
جہان نا ایلو نیاڑی تا زند آنبار بلوچ نا نیاڑیک ہم بے کچ آ سربالئی و موشیفی تیان گدرینگانو۔ بلوچ قوم 11 ہزار سال مست ئنا تہذیب ئسے نا خواجہ ءِ، مہر گڑھ ٹی یانزدہ ہزار سال مست ہنکین ئسے نا بنداو تخنگا۔ متکن انگا مڈی تا زانت، بندغی زانت و دیہاڑ نا خوانندہ غاک دا ہیت ءِ چارہ کہ ہنکین ئسے نا آبادی نیاڑی تا بے مٹ آ کڑد ئنا کمک ئٹ دو بریک۔مہرگڑھ نا آبادی ہم بلوچ نیاڑی تا مہر و مابت نا چیدہ ئسے۔۔مہر گڑھ تون اوار بلوچستان نا متکن آ مڈیک بلوچ نیاڑی ءِ کشت و کشار نا بناء کروکا، حکومت کروکا، جنگ کروکا، چاگڑدی زند ہیل تروکا و شون تروکا ، بندغ نا تہذیب و تمدن نا شونداری ءِ کروکا پارہ۔
اینو بیست و یکمیکو کرن نا بلوچ نیاڑیک ہم تینا راج ئنا ویل و ڈھک آتے ایسر کننگ کن کوشست کننگ ءُ ۔ ہمو دور کہ ہراٹی بلوچ نرینہ غاتا زی آ سیاسی رکھ زیات ءِ، بیگواہی، اسٹ انگا بھلا قبر آتیان چندی مسخ آ لاش آتا دو بننگ، زبان و بیان آ رکھ خلوک ءِ ہمو دور ئٹی شہید لمہ بانک کریمہ بلوچ، شکر بی بی، بانک فرزانہ بلوچ، ڈاکٹر ماہ رنگ ،سمی دین ،ڈاکٹر صبیحہ ،بانک مہر جان ،بیبو بلوچ و ایلو ایڑ و لمہ غاک چراغ نا مثیال ئٹ بلوچ و جہان ئکن چیدہ جوڑ ءُ ہرا زوراک نا مون آ سلیسر۔ بلوچستان نا سیاست ءِ اسہ گچینو مہہ ئس تسر، بلوچ راجی تحریک ءِ جہان ئٹ درشان کریر و سر کریر۔ ہندی و جہانی سیاست ئٹی بلوچ راج ءِ اسہ جتا ءُ دروشم ئس رسینگا۔
بلوچ نیاڑی تا زی آ ظلم و جبر نا قصہ غاک ہم بے پایان ءُ۔ دا لڑ زرینہ مری نا بیگواہی آن بناء مریک ہرا نا کیہی سال آتیان پد اینو ہم ہچ ءُ ڈس ئس اف، ہندن ماہجبین بلوچ 29 مٸی 2025 نا دے آ کوٸٹہ سول ہسپتال آن بے سوب دزگیر کننگا، ہرا بلوچستان یونیورسٹی ٹی لائبریری ساٸنس نا خوانندہ و پولیو نا مریض ئس اسکہ۔ نسرین بلوچ 15 سال نا چنک سنی ٹی حب آن بے گواہ مس۔ 1 دسمبر 2025 نا دے فرزانہ زہری خضدار آن بے گواہ کننگا، اندا ڈول رحیمہ بلوچ، ہانی دلواش، حیرالنساء بلوچ ظلم و جبر و بیگواہی نا گواچی مسنو۔ماوراٸے عدالت کسفنگ ئنا ہم بلوچ نیاڑی تا بھلو کچ ئس گواچی مسنے۔ 28 اکتوبر 2025 نا دے نازیہ شافی تینا پیر انگا لمہ تون اوار پنجگور آن بیگواہ کننگا، و ٹپی آ حالیت ئٹی پنجگور نا ہسپتال ئٹی دم تس۔ حوری بلوچ 27 مٸی 2025 نا دے آواران ٹی شہید کننگا۔ داڈان بیدس پین کیہی بلوچ نیاڑیک ظلم و زوراکی تا گواچی مسنو، ہزار آتا کچ ئٹ ایڑ، لمہ، زائیفہ و چناک تینا سیال آتا بیگواہی کن درپدر ءُ۔ لمہ حوری نا مثیال ئٹ کیہی لمہ غاک تینا تیوئی زند ءِ تینا چنا تا رند ئٹ تیر کریر ولے ایسری وخت آ بیرہ وداری آ چہرہ تون او جہان آن موکل کریر
بلوچ نیاڑی تا دا جہد داسکان برجا ءِ۔ اینو بلوچ نا نیاڑیک ہر تادی و زوراکی نا مونا مَش آنبار سلوک ءُ ہرافتا کڑد آ بلوچ راج ناز کیک
