براہوئی بولی نا بدحالی، نغد و گامگیج آک۔
نوشتہ کار : امیر جان بلوچ
بولی ہموتم گدر و گار مفک ہراتم اونا ہیت کروکاک کہِر و ہمو بولی ٹی ہیت کروکو اسہ بندغ ئس ہم زندہ سلپ بلکہ بولیک ہموتم گدر مریرہ، ساہ ہیترہ ہراتم اونا ہیت کروکاک اونا قدر ءِ و ازرشت ءِ است آن دیر۔ بولی نا مثیل اسہ نہال ئسے نا وڑ ئٹی ءِ ہرادے اگہ وخت آ دیر و کد تننگتو گڑا او بارک و ساہ ہیتک، اگہ بولی ہمو نہال ءِ گڑا دیر و کد آک اونا بندغ آکو ہرا اودے مدام تازہ و سوگو تخنگ کن تینا کڑد ءِ سر ہیترہ ہندن مدان مدان آ او نہال اسہ سوگو ءُ درخت ئسے نا دروشم ءِ ہلیک ہرا تینا سیخا ٹی چندی تے آسراتی تننگ کیک، ہندن اگہ بولی ءِ اونا بندغ آک غور کتور گڑا بولی بارک و ساہ ہیتک، ولدا نن چانہ بارن آ پاٹ نا مقدر ٹی ہشنگ ءِ پین بھرم ئسے نا اومیت مفک اوڑان۔ دیہاڑ ئٹ ننے خننگ ئٹی بریک کہ چندی بولیک اونا ہیت کروکا تا بےدرکی آن ایسر مسنو و چندی بولیک تینا ہیت کروکا تا کمک آن و استخواہی آن سوگوی خنانو، ننا مونا اسہ درور ئس عبرانی بولی نا ءِ کہ تینا گڈیکو ساہ تیٹی اس مرگ آن اسہ گام ئس مر اس، ہراتم دا گڑتی اونا ہیت کروکاتے پلویڑ کرے گڑا او پہہ مسر کہ اگہ ننا بولی ایسر مس گڑا ننا جند ئنا وجود ہم معنہ تخپک۔ گڑا او نت و دو خلکر و تینا بولی ءِ پوسکنو زند ئس بشخار ہرا اینو اسہ شابیت ءُ بولی ئس جوڑ مسنے۔ ہندن ننا تینا جند ئنا بولی براہوئی ہم ہمو تلہ غا سلوکے کہ ننا اسہ چنکو ساعت ئسے نا بےدرکی و بےچکاری اونا تابوت ئٹی گڈیکو میخ ءِ خلنگ نا مثیل مرو۔ یونیسکو نا 2009 نا رپورٹ نن پُر ءُ تغ ئسے ٹی تنگان آتیکن اسہ ٹوہنگ ئس اس، اگہ داسہ نن دریہو کپنہ گڑا دا وسائت ہم نامدار ءِ کہ خاچوک آ بندغ نا ہُچ نر کیک۔ داسہ نن دا ہُرن کہ اوکان گڈ دا شانزدہ سال ئٹ نن انت عملی کاریم کرینن تینا بولی ءِ زدہ تخنگ کن گڑا نن پاننگ کینہ کہ نن بیرہ اسہ پالو آن ایلو پالو آ تینے ہڑسانن ولے سماء کتنن۔
ابرم ئٹ انت کہ گڑا ئس مرے او اسہ ارتقائی ءُ عمل ئسے آن گدرینگک، اسہ چنا ئس ہم مرے او ودی کہ مریک گڑا او اسہ وار تون چرینگ ءِ بناء کپک بلکہ اسہ جار او گوکلا کیک ولدا بش مریک و تمک، مدان مدان آ او چرینگ ءِ ہیل کیک و اسہ ہندنو وخت ئس بریک کہ او رمب کننگ ءِ ہیل کیک۔ داسہ نن دا ہُرن کہ نن انت کننگ اُن، نن گوکلا کروکا بولی ءِ ہلی تیان بار رمب کرنفنگ ئٹ اختہ اُن۔ داسکان ننا بولی ٹی نن لوظ آتا ترتیب ئس جوڑ کتنن، ہرا لوظ ہرا وڑ ئٹ نوشتہ کننگک اونا املا امر مریک دنو ہچو راہبند ئس جوڑ کتنن ہرکس تینا مون امر کہ است تا خواہس ہمو وڑ لوظ آتا بُھسکاری ءِ کیک، نن شاعری کینہ یا افسانہ و ناول نوشتہ کینہ ولے خوانوکا بندغ سرگڑدان ءِ کہ ہرا لوظ ءِ امر ای تینا نوشتہ غا تیٹی ہتیو ہر پوسکن آ نوشت ئٹ لوظ آک جتا ءُ دروشم ئسے ٹی ننا مونا بریرہ، نن دا گڑا غان نن تینا خن تے چپ کننگ کپنہ، نن اولی خشت آتا جاگہ ءِ خورک ہلنگ کپنہ نہ تو ننا تفوکا ماڑی بے بنداو آن دے ئس الم دڑو۔ ننا اولی کاریم نا جند ہندا مروئی اس کہ بائد ءِ نن براہوئی نا اسہ متفقہ ءُ لوظ آتا راہبند ئس جوڑ کروسن ولے نن تین پہ تین ٹہینگپنہ۔
نن اینو نوشتہ کننگ اُن ولے ننے دا درک اف کہ نن تینا نوشتہ غاتیٹی براہوئی نا ہمو مسخ انگا دروشم نا زی آ پین تیزاپ شاغنگ اُن، ننا نوشتہ غاک ہمو لوظ آتیان سرریچ ءُ ہرا ننا جند ئنا بولی نا بن آن ہچ لوظ آک افس بلکہ بدر بولی تا وامدار کننگ اُن بولی ءِ، دا اسہ گواچن ئسے کہ بولی ءِ وختس لوظ متو گڑا او تینا خڑک ئنا بولی آن لوظ وام کیک ولے دن ہم مف کہ نا لوظ آک نیتون ساڑی مریر و نی جت پت کپہ و تینے ہمو لوظ آتا پٹنگ کن خوار کپہ دا گڑا اسہ جانبڈی ئس پاننگک۔ ننا اولیکو کاریم تیٹی اسہ کاریم ئس ہندا اس کہ نن تینا لوظ آتے پٹن و ہموفتے غرض کین، دا رد ئٹ ننتون منہ لوظ گنج ساڑی ءُ ہرافتیٹی حمید عزیز آبادی نا "براہوئی بلوچی زبان ءِ کنا" یا عبدالغفور محمدشہی نا "اسپیدہ رنگ" نامدار ءُ۔ نن مدام دا ہیت ءِ کینہ کہ اینو نا دور ڈیجیٹل دور ءِ، جہان نا خواست آتیتون اوار ہنوئی تمک نہ تو پدی سلون، ننے تینا لوظ گنج آتے ڈیجیٹل ءُ دروشم ئس تروئی اس تاکہ ہر نوشتہ کروک ئکن اڑزان مروس کہ او تینا جند ئنا بولی نا لوظ آتے غرض کروس۔ دا آسراتیک ہموتم دو بریرہ ہراتم نن اسہ چنکو خواری ئس کین ولدا نن کل دا چانہ کہ ہر خواری آن پد آسراتی ءِ۔ وخت ئس کہ بنداو ءِ سوگو تخن گڑا ماڑی نا دیوال آک ہم سوگو مرور۔ بیدس بنداو آن ننا کوشست آک بلکہ بھرم تفس۔ و دا شانزدہ سال ٹی ننے بیدس دم درنگ آن دے و نن نت و دو خلوئی اس تینا بولی ءِ ہمو گدر مروکا بولی تا لڑ آن کشوئی اس ولے نن بلکہ ہندا گُمان ئٹی اُن کہ کنا زمواری اف ایلو نا ءِ یا پین کس کرو دا کاریم ءِ ولے پین کس اف بیرہ ای و نی اُن، و ننے کل ءِ مدام نت و دو خلوئی ءِ تاکہ بولی ءِ سوگو کرسا اسہ سرسہب و شرفمند ءُ راج ئس پاننگن نئیکہ اسہ بےسہب ءُ درور ئس مرین جہان ئکن کہ دا ہمو راج اس ہرا تینا بولی نا رکھ ءِ کننگ کتو گڑا تینا جند ءِ امر رکھنگ کریکہ؟
داسہ نن مچٹ تینا زنچخ ئٹ ہلسا ہُرنگ نا کوشست کین کہ نن انت کننگ اُن، نغد ءِ اگہ بیرہ اسٹ ایلو نا زی آ ہور ءِ بڑز کننگ و تینا لخ ءِ خلاس کننگ نا پن ءِ ہیتن گڑا دا ناانصافی ئس مرو۔ ننے دا درک مرے کہ نغد ہمو عمل ءِ ہرا گڑا تے شون ہیتک ننا نزوری تے ننا مونا پاش کیک کہ ہرا ہرا جاگہ غا انت انت کَنڈ ارے۔ ولدا بندغ نا شان ہم ہندا گڑا ٹی ءِ کہ بندغ ئٹ وڈائی مف، تینا نزوری تیتون امنا کننگ و اوفتیکن اسہ توجیل ئس کشنگ و عملی دروشم ئٹ او نزوری و کَنڈ آتے پُر کننگ بندغ نا شان ءِ بڑز کیک۔
اینو ننا علاقہ غاتیٹی چندی ادبی گل و سوسائٹیک ساڑی ءُ پن تا ہلنگ نا گرج اف ہمو کلہو نا جند اگہ سر مریک گڑا نن کل ہندا آدینک ئٹ تینا جاچ ءِ ہلین و تینا کڑد آ پام کین، نن بائدے اشتماعی آ زمواری تے اسٹ ایلو نا زی آ شاغپن کہ املاء تے شون تننگ ننا کاریم اف، لوظ گنج آتے شون تننگ یا نظریاتی و سیاسی ءُ نوشتہ کاری ننا کاریم اف گڑا نن ہرا باریم ءِ ہرفون؟ اگہ نن راج ئنا پن آ یا بولی نا پن آ اسہ پلیٹفارم ئس مَلنہ ولے نن ہمو راجی یا بولی نا زمواری تا باریم ءِ ہرفنگ آن نمن کین یا تینے پانادی کین گڑا نن اگہ گڑاس کننگ ئٹی اُن او بیرہ تینا ذات ئنا یا تینا گل و سوسائٹی نا نمائش و سواد ئکن مرو نئیکہ راجی و بولی نا زمواری تے سر تننگ ئس مرو۔ اگہ اسہ ادارہ ئس یا فرد ئس گڑاس راہبند و خیال ہتیک گڑا ایلو ادارہ اوتیان نمن کیک گڑا دا وڑ ئٹ بھاز کبین ءِ ننا بولی شون ہلے۔
نن اگہ بیرہ تینا نامداری کن شاعری کینہ، نثر نگاری کینہ، کتاب نوشتہ کینہ شینک کینہ، نوشتانک نوشتہ کینہ، ناول یا آزمانک نوشتہ کینہ گڑا مننگ کیک دافتیٹی جتا جتا انگا املاء تا سوب آن یا بدر بولی تا لوظ آتے غرض کننگ آن بلکہ فائدہ غان زیات تاوان تا گواچی کننگ اُن بولی ءِ، گڑا تینا صف آتے سدھا کننگ نا بکار ءِ اگہ نن راج ئنا و بولی نا خذمت گار پانہ تینے گڑا نن ہمو کاریم تے کین ہرا گوچن ئٹ بولی ءِ بھرم ئس تننگ کیر اگہ دا ناسرپندی ئسے گڑا نن بائدے تینا کاریم تا جاچ ئس ہلین و تینا کسر ئس جوڑ کین اگہ آخہ نن بیرہ پن ئکن، ذاتی سواد آتیکن گڑاس کننگ اُن گڑا راج ئنا یا بولی نا خِزم خواجہ نا پن ءِ تِفن تینے۔ ہمو راج آک ہچ خیر خنپسہ ہرا شونداری نا کاریم ئسے ٹی ہم اسٹ ایلو نا نت ءِ چکر۔
دا شرح غاتیان پد نن اگہ سنگینی ئٹ پام کین گڑا تینا نزوری تا و خورک انگا کنڈ آتا درک مننگ اولی گڑا ءِ ہرا ننا ہر کاریم نا شونداری کن کمککار مننگ کیک، داڑان پد نن ہمو نزوری تیکن اسہ توجیل ئس کشن و عملی دروشم ئٹ ہمو کنڈ آ گام خلین ننا کسر تینٹ شون ہلو، و کسر نا نیام ئٹ ہم نزوری و کنڈ آتے ہندا طرزکار نا کمک ئٹ ایسر کننگ کینہ۔ غٹ آن مست ننے تینا ذاتی انگا سواد، کست و وڈائی آن پیش تمسا اسہ ہندنو چاگڑد ئس ودی کروئی ءِ ہراڑے اولسر ئٹ عمل نا جند بناء مرے ولدا اوڑے نغد ئکن ہم گنجائش مرے انتئے کہ عمل نا جند ءِ شون تروکا گڑا نغد ءِ، گڑا باقاعدہ نغد ئنا گنجائش مرے و نغد مدام اسیکہ تینا جند ئنا زنچخ آن بناء مریک ولدا ایلو تا پارہ غا کائک۔ نرگسیت آن پیش تمسا ننا ادیب آتے ادارہ غاتے اسہ پنہ سے آ مچ مروئی تمک، کاریم تا طرزکار آتا نیام ئٹ اختلاف مننگ کیک و اختلاف گڑا تے زیبائی ہم بشخک جتا جتا ءُ توجیل و خیال بشخک، اختلاف نا جند ابرمی ءُ گڑا ئسے، جہان نا ہر رنگ و گند ئٹ پرخ ارے گڑا خیال و طرزکار آتا پرخ آن نمن کروکا آمخ ئس پاننگک، ولے اشتماعی مسخت نا جند بائد ءِ اسٹ مرے ہرا تینا بولی نا رکھنگ ءِ۔ ہراتم ننا مسخت نا جند ذاتی و تپئی سواد و پن کٹنگ نا جاگہ غا بولی نا جند ئنا شونداری مس گڑا ننا کاریم و کوشست آک بھرم ہم ہیتور و بیدس خواست آن ہم شرف دو برو۔
بائد ءِ ننا سنجیدہ غا ادیب و بولی ءِ دوست تخوکا بندغ آک اسہ گچینو بنداو ئس تخر، بناء ہنداکان مرے کہ ذاتی و تپئی سوچ آتیان پیش تمسا اسہ ہندنو کمیٹی ئس جوڑ مرے ہرا براہوئی نا لوظ آتا املاء و براہوئی بولی ٹی لوظ آتا اسٹ ایلو تون خُلّنگ نا اسلوب نا زی آ کاریم کے و اسہ متفقہ و اشمتاعی ءُ راہبند ئس مرے ہرا نا ہر فرد و ہر ادارہ پائبند مرے۔
ہمو بولیک بختاور پاننگرہ ہرافتے تون اسٹ آن زیات لہجہ ساڑی مریر، دا ننکن اسہ بختاوری ئسے کہ براہوئی نا بھاز آ لہجہ غاکو ہرافتیٹی بھاز آ گڑا تے جتا جتا انگا پن تے ئٹ چاہنگک، اسہ گڑا ئسے کن اسٹ آن زیات لوظ ننتون ساڑی ءُ دا کل آتے نن اسٹ ایلو نا مترادف پاننگ کینہ، و اگہ اسہ لوظ ئس اسہ لہجہ ئسے ٹی ساڑی اف ایلو لہجہ غان ہرفنگ مریک، دا وڑ ئٹ بولی بدر بولی تیان لوظ وام کننگ آ بے وس مفک۔ داڑکن ننے تینا لوظ گنج آتے شون تروئی ءِ دا کل لہجہ غاتا لوظ آتے مچ کروئی ءِ تاکہ ننا بولی نا مڈیک بھاز مریر۔
ننے داسہ نا دور ئنا خواست آتیتون اوار ہنوئی ءِ و لوظ گنج آتے ڈیجیٹل ایپلیکیشن آتا دروشم ءِ تروئی ءِ تاکہ ایپلیکیشن نا کمک ئٹ ہر لوظ ننے زو دو بننگ کے و نن تینا ہڑدے نا نوشتہ کاری تیٹی ہمو لوظ آتے اڑزانی ئٹ غرض کننگ کین۔
اگہ ہندنو لوظ ہرا ننا بولی ٹی ساڑی افس نن بدر بولی تیان وام ہلنگ نا جاگہ غا ہندا کمیٹی نا وسیلہ ئٹ براہوئی بولی نا اسلوب و راہبند آتے مونا تخسا پوسکنو لوظ جوڑ کین ہرانا ہر فرد و ادارہ پائبند مرے۔
ڈیجیٹل دروشم ئٹ بولی نا رکھ ئکن اسہ کوشست ئس Brahui.dev نا دروشم ئٹ داسہ زو تیٹی ننا مونا بس ہراڑٹی ہرکس تینا پارہ غان جملہ اوار کے تاکہ نیٹ آ ہم ننے براہوئی بولی نا آسراتی دو برے، داڑکن سی ہزار جملہ بکار ءِ ولے بھلو وختس مس کہ داسکان دہ ہزار جملہ ہم ننا پارہ غان اوار کننگتنے دا ننا بے حسی و بےچکاری نا آدینک ءِ کہ ننا شار ئٹ بیرہ پن ئنا ادیب آک حساب ئٹ ہم بفسہ ولے المی انگا کاریم تا وخت آ مر ولائت آتے اسکان کس نظر ئٹ بفک۔
گڈسر ئٹ تینا ہیت آتے دا لوظ آتیتون اوار تر شاغوہ کہ اگہ نن تینٹ سار کتون دریہو کتون گڑا کس ئس آسمان آن بفرو و ننا جاور ءِ مٹ کپرو دنکہ خدا جان ہم پائک کہ ای ہمو راج آتا جاور ءِ ہچ مٹ کپرہ ہرا تینا جاور ءِ مٹ کننگ کن تینٹ نت و دو خلپس۔ اسٹ ایلو آ ہُرپن تینا زمواری تے ایلو تا زی آ ترپ کپن بلکہ ہر فرد تینا راجی و اشتماعی زمواری تا درک ءِ کرسا تینا زمواری تا باریم ءِ کوپہ غاتے آ ہرفے و گام خلے، بولی تا بنداوی راہبند و گرج آک کہ شون ہلکر گڑا ہر پڑ و شعبہ نا ماہر انگا بندغ آک یا مُچیک تینا زمواری تے تینا بولی ٹی سر تننگ کرور پانے او خوانندہ غاتا گل آک مریر، سیاسی و مزاحمتی گل آک مریر یا ادبی گل و سوسائٹیک یا ایلو پڑ آک مریر، ہر کس ءِ و ہر ادارہ ءِ تینا زمواری تے تینا جند ئنا بولی ٹی سر تروئی ءِ تاکہ ننا کاریمک ننا راج اسکان سر مریر انتئے کہ اگہ نن گڑاس کننگ اُن گڑا راج ئکن کننگ اُن گڑا راج اسکان تینا عمل و کاریم تے سر کننگ کن دا المی ءِ کہ ننا کاریمک راج ئنا بولی ٹی مریر، و داڑکن راج ئنا بولی ءِ شون تننگ المی ءِ۔
شراب آک زمزم دِتک پھل مریرہ
نی تینے بدل کر بدل کل مریرہ
