اِستانی زور گار ءُ بیگواھیں مردمانی لڑ ءَ چہ یکے زبیر بلوچ اِنت۔ 15 اپریل 2026 ءَ استانی پئوج زبیر بلوچ ءِ گِس بُٹّا کالونی ڈیرہ گازی ھان ءَ بیڑ بارت زبیر ءَ زورانسری بیگواہ کنت۔ داں روچے مروچی زانگ نہ بیت کہ آ کجا ءُ کجام ھال ءِ تہ ءَ اِنت۔ زبیر بلوچ وتی بنداتی وانگ ءَ وتی ھند ءَ دربارت۔ پہ وانگ ءِ ھاترا اسلامیہ مزن شاھدربرجاہ باولپور ءَ سر کشیت ءُ پولیٹیکل سائنس ڈپارمنٹ ءِ باسک بیت۔ زبیر بلوچ نودربری ءِ باریگ ءَ سیاسی بود ءِ ردا 2021 داں 2022 ءَ بلوچ اسٹوڑنس کونسل باولپور ءِ کماش گچین کنگ بیت۔ زبیر ءِ جھد مدامی ھمے بوتگ کہ بلوچ نودربر یکجاہ ءُ یکمشت بہ بنت ءُ وتی بودناکی آں پہ بلوچ راج ءِ دیمروئی ءِ ھاترا کارمرز بہ کن اَنت۔ 2023 ءَ وتی پولیٹیکل سائنس ءِ ڈگری ءَ سرجم کنت ءُ وتی بنّکی ھند ءَ رھادگ بیت۔زبیر ءَ چہ اُوشت آماچیں راجمان ءَ بیم کیت۔ ھمے واھگ کُشیں شوربندی کہ استان ءَ بندات کُتگ اَنت چراھاں سوھو بیت ءُ وتی زند ءَ تیلانک دنت۔ وتی وانگی سپر ءَ بندات کنگے واستہ یکبرے پدا سنگت اسلامیہ مزن شاھدربرجاہ ءَ پولیٹیکل سائنس ءِ پڑ ءَ Mphil ءَ داکلہ زوریت۔ وتی وانگ ءَ دیم ءَ بارت۔ اے وھداں کہ زورانسری بیگواہ بیت آ ایم فل ءِ گڈی سمسٹر ءِ نودربر بیت۔ زبیر بلوچ ءِ بیگواھی ءِ ھال ءَ آئی کماش واجہ گلام پرید رسانکدر ءَ شنگ کنت ءُ پہ سلامتی آجوئی ءِ لوٹ کنت۔ بلے ھیپ کہ
چمّے بہ پہ گندگ ءَ
گوشے بہ بیت پہ اِشکنگ
مروچی کساس دو ماہ ءَ گیش اِنت کہ زندانی اِنت۔
مدامی کہ ما گوں سنگت ءَ دوچار بوت ایں گڑا آ ھر وھدا برشکندگ ءَ اَت۔ سنگتاناں گوں مھر دیوان کُت۔ آئی ءَ گوں مردماں مھر اَت بلکیں آئی ءَ گوں بلوچ راج، زمین ءُ بلوچ راجدپتر ءَ مھر اَت۔ زبیر ءَ پہ بلوچ نودربرانی سیاسی مارشت ءِ سمارگ ءَ روچ ءُ شپ نہ چار اِت۔ پہ سنگتانی یکجاہ کنگ ءُ آھانی کونسلنگ ءَ مدام ساجو اَت۔ ما بہ گندے ھمے جیڑاِتگ کہ بلوچ تھنا پاکستانی زوریں کبزہ ءِ بلوچستان ءَ زلم ءُ زوراکیانی آماچ اَنت۔ بلے اِنّا، بلوچ ھرجاہ بہ بیت پراھاں استانی زلم ءُ زوراکی ءِ شوربندی ھمے یکیں اِنت۔ زورگیر ءَ گوں بلوچ بوھگ ءَ کنّت اِنت آئی ءَ را ھندی سیمسر نہ داریت۔ زبیر بلوچ ءِ زورانسری بیگواہ کنگ ھمے شوربندی ءِ لڑ اِنت کہ دھکّاں چہ برجاہ ءُ برجاہ مانیت اگاں ما استان ءِ زوراکیانی دیم ءَ چو کوہ ءَ مھکم، یکمشت ءُ یکجا نہ بوت ایں۔
پہ نشانی پشت نہ کپتگ جوری ناکامیں برے
دھل زندے درد ءِ ھار ءَ گوتکگ آں واتر بکں
زبیر یک مھکمیں ءُ باسمائیں نودربرے اَت۔ آئی ءَ وتی راج ءِ ایردستی ءُ بزّگی ماراتگ اَت پمشکہ آ گوں ھر کس ءَ مھروان اَت۔ مدام تو دیست بلوچ نودربرانی ھاترا جھد کنگ ءَ انت۔کونسل ءِ چست ءُ ایراں بگر داں دگہ جیڑہ ءُ جنجالاں زبیر مدام ساجو ات۔ یکشل ءَ تگ ءُ تاچ ءِ تہ ءَ اَت تو وت ھیران اِتے کہ اے چونیں جزبگے یک ساھتے ھم آئی ءَ ساکم بوھگ ءَ نیل ایت۔ اے ھما نودربراں کہ وتا چو کندیل ءِ وٹ ءَ سوچ اَنت ءُ چاگرد ءَ رژن بکشاینت۔ زبیر ءَ وتی زات ءَ چہ گیشتر وتی راج ءِ گم پر اَت پمشکہ آئی ءَ جھد کت کہ بلوچ ءِ ھمک نودربر یک مھکمیں پگرے ءِ واھند بہ بیت ءُ آئی ءِ تہ ءَ یک سیاسی لیکہ یے ردوم بزوریت داں کہ باندات ءَ آ وھد ءِ دنز ءُ گبارانی تہ ءَ گار ءُ بیگواہ مہ بیت بلکہ یک باسمائیں مردمے ءِ بستار ءَ وتی منزل ءَ پہ جنزاں بہ کنت۔
مئے چاگرد ءِ تہا نودربر و باز انت بلے زبیر ءِ وڈیں لیکھی مردم ترا باز کم دست کپیت کہ یک مھکمیں پگرے ءِ ساھگ ءَ نہ تھنا وتا جاگہ بہ دنت بلکیں آئی ءِ وشبوھاں ھمک گور ءَ شنگ ءُ تالان بہ کنت داں کہ باندات ءِ پدریچ چہ ھمے وشبوھاں زبھر مہ بیت۔
