بلوچ راجی سیاست نا گؤربام ۔ میر یوسف عزیز مگسی
یوسف عزیز مگسی پوسکنا بلوچ راجی سیاست نا سرخیل ہم پاننگک ، او ہندا سوب آن کہ یوسف عزیز مگسی اسہ ہندنو وخت ئسے ٹی بلوچ راجی جہد ءِ سیاسی و سائنسی بنداو آ مونا ہیس کہ ہرا وخت بلوچستان نا واگ فرنگی نا دوٹی سخت توروک ئس ہراڑے بلوچ راجی پجار نا ہیت ءِ کننگ اسہ بھاز بھلو گناہ ئس اسک ہرانا پد بیرہ زندان و مرگ ئس۔
درستی راستی!
میر یوسف عزیز مگسی 1908ء نا سال ، جنوری نا تو ئٹی نواب قیصر خان نا اُراٹی ودی مس ۔ لمہ گودی سردار پسند خان زہری نا مسڑ ئس ۔ یوسف صاحب تینا خواننگ نا بنا ءِ 1913 ٹی کرے ۔ بنداوی خواننگ خلق آن کرے پدا مُستی نا خواننگ ءِ ملتان آن ۔ فارسی ،اردو ،عربی و انگریزی نا تعلیم تون اوار او مزہبی تعلیم نا ئم خواننگے کریسُس ۔اونا استاد آتیٹی پنی آ استاد نا پن لال کنیہا لال اسک ہرا اودے انگریزی و ایلو جہانی علم آن سرپند کرے۔
نوزدہمی کرن ئٹ 1839 ٹی قلات آ انگریز آتا جلہو و میر محراب خان نا مزاحمت آن پد اودے شہید کننگ آن پد قلات نا ریاست ءِ فرنگی دوئی کریسُس ۔ ولے میر محراب خان نا شہیدی آن پد ہم فرنگی بلوچستان نا ڈغار ءِ خوشی ئٹ دوئی کننگ کتو۔ فرنگی ءِ بلوچ تمن آتا کُنڈ آن بھاز مزاحمت ئتون مون تروئی مسکہ ہندا سوب آن او تینا مفاد آتا رکھ ئکن ریاست قلات تون (1854) ئٹی معائدہ ئس کرے ہرا ٹی انگریز بلوچستان نا آجوئی ءِ منا و خانِ قلات ءِ ریاست نا سروکی نا حق تِس - ولے 1876 ئٹ فرنگی بلوچستان نا سڑدار تے زر و تاغت نا لالچ تریسہ تینا کُنڈ آ کیک و پدا ہندا معاہدہ آ سلپک ۔ ریاست قلات نا واک ءِ تینا دوٹی کیک ہرانا سوب آن قلات دے پہ دے آن بدحالی نا گواچی مریسہ کاہک -
ہندن اگہ یوسف عزیز نا وخت ءِ ہُرن تو 1920 نا وخت ئٹ بلوچستان تیوہ انگریز نا لٹ و پل و بادشاہی ٹی اسک و خان قلات انگریز نا تخوکو پن ئنا خان ئس اسک ۔ ہرانا سوب آن فرنگی قلات ئٹ تینا اسہ وزیر اعظم ئس تخاسُس ہرانا پن شمس شاہ اسک ۔ شمس شاہ اسہ بھاز زالم ءُ بندغ ئس اس ہرا بلوچ آتا زی آ ہر وڑ ئنا زلم کریکہ ۔ نہ بلوچستان ئٹ خواننگ ئس اس نہ پوریا نا نظام ئس نہ کہ سیاست کننگ نا آزاتی۔ہندا زمانہ ٹی ہندوستان ئٹ فرنگی سامراج نا برخلاف انڈین نیشنل کانگریس نا جہد برجا اسک -ہندن بلوچستان ئٹ مستونگ آن میر عبدلعزیز کرد نا کماشی ٹی اوڑتون اوار اونا سنگت آک “انجمن اتحاد بلوچاں “ نا پن اٹ انگریز کوزہ گیر نا برخلاف جہد ئٹ اختہ ئسر -
یوسف عزیز مگسی بلوچ راج ئنا بزگی و شمس شاہ نا دا زلم و زوراکی ءِ خننگ آن پد لاہور آ اِنا ہراڑے اسہ اخبار ئس شینک مسَکہ “مساوات “نا پن ئٹ ۔ گُڑا ہمو اخبار ٹی یوسف عزیز مگسی “فریاد ءِ بلوچستان “ نا پن اٹ اسہ نوشت ئس شینک کرے- ہرانا سوب آن او دزگیر کننگا و قبائلی جرگہ ءِ اونا فیصلہ نا واک تننگا و جرگہ نا فیصلہ مس ہرا یوسف عزیز ءِ اسہ سال ئسے کن زندان ئٹ بند کننگ نا سزا تِس ۔ پدا اودے مستونگ نا جیل ئٹ بند کننگا ۔ پارہ جیل سیاسی آ بندغ آتا ارٹمیکو اُرا ءِ ، ہندن دا جیل یوسف کن اسے جوان ءُ سزا ئس مس انتئے کہ ہندا جیل ئنا سوب آن یوسف عزیز مگسی نا درستی راستی عبد العزیز کرد ئتون مس ہراڑے او انجمن اتحاد بلوچاں نا بشخ ئس جوڑ مس ۔ داکان پد منہ توہ او زہری گٹ ئٹی بند کننگا و پدا آجو کننگا۔
آجو کننگ آن پد 20 نومبر 1929 ئٹی یوسف عزیز مگسی و میر عبدلعزیز کرد شمس شاہ نا زلم و زوراکی و بلوچ راج نا بزگی نا زی آ “شمس گردی” نا پن ئٹ اسہ پنتاک ئس شینک کریر و ہندا ہیت ءِ مونا تخار کہ شمس شاہ آن وزیری نا واک پدا ہلنگے ۔
ہندا نوشت نا سوب آن لس خوانوک و ایلوفتا مونا ریاست نا چم و زوراکیک پاش مسر ہرانا سوب آن چندی بندغ آک بغاوت کریسہ بش مسر ۔ اکتوبر1931 ٹی شمس نا زلم آتا سوب آن یوسف عزیز تینا مگسی قبائل ء “مگسی ایجی ٹیشن “نا پن ئٹ سندھ آ ہمپفے ۔
پدا مُستی شمس شاہ تخت آن دڑفنگا ہرا انجمن اتحاد نا اولیکو بھلا سرسوبی اسک۔
اندا زمانہ ٹی باقائدہ انجمن اتحاد بلوچاں نا کابینہ نا پڑو مس ہراڑے یوسف عزیز مگسی پارٹی نا صدر و عبدلعزیز کرد سیکریٹری جنرل گچین کننگار۔
دسمبر 1932 ئٹ انجمن اتحاد بلوچاں نا کنڈان آل انڈیا بلوچ کانفرنس جیکب آباد اٹی اڈ تننگا ہراڑے ایران ،افغانستان و عرب ملک آتے تون اوار ہر کُنڈ آن بھاز بھلو کچ ئسے ٹی بلوچ آک بشخ ہلکر ۔ کانفرنس نا مسخت ہندا اس کہ بلوچ راج ءِ انگریز نا زلم و چم آتے آن پہہ کننگے و اوفتا ملی ٹی سامراج نا برخلاف راجی شعور ودی کننگے۔ ہندا وڑ سال ئسے آن پد دسمبر 1933 ٹی ارٹمیکو کانفرنس حیدر آباد ئٹی اڈ تننگا۔دا وختا قلات نا خان محمد اعظم اس ہرادے تینٹ انجمن نا سنگت آک خانی کن گچین کریسُر ولے پارٹی نا منشور آن پد خان محمد اعظم فرنگی نا مخ تفی ء کرے ہرانا سوب آن انجمن کن بھاز ویل ودی مس ولے اوفتا جوزہ غاک پدا ہم بّڑز اسر۔
یوسف عزیز مگسی نا ادبی آ کاریمک
یوسف عزیز اسہ بھاز جوان ءُ شاعر ئس مننگ تون اوار نوشتکار ئس ہم ئسک ۔ بھاز آ اخبار تیٹی نوشتانک شینک کننگ و تینا کُنڈ آن ہم اخبار آتا بنداؤ ءِ تخا ہرافتے ٹی البلوچ، بلوچستان جدید ، الحنیفہ،ینگ بلوچستان و آزات اوار ءُ۔داکان بیدس جامع یوسف نا پن ئٹ اسہ بھلو خواننگ نا جاگہ ئس جوڑ کرے۔او ادب آن بیدس مخلوق نا آسراتی کن چاگڑدی کاریم ہم بھاز کریسُس ۔
خان محمد اعظم نا کہنگ آن گُڈ خان میر احمد یار
خان تخت آ توس ۔ میر احمد یار خان بلوچ انجمن اتحاد نا مختفوک ئس اس و بھاز آ کاریم تے ئٹ تنظیم ءِ کمک کریکہ۔ ہندا زمانہ ٹی سیاسی کاریم تے آ پائبندی خلنگا و بھاز آ سختی تے آن عبدلعزیز کرد ہم جیل مس ۔ وخت ئنا خواست آتا رد ئٹ خان یوسف عزیز ءِ برطانیہ غا رائی کرے ۔ راہی کننگ نا مسخت دا اس کہ او انگریز تون بلوچستان آجوئی و 1854-1876 نا معاہدہ نا بابت ئٹ ہیت و گپ کے ولے یوسف صاحب نا اُمیت مس و پدا بلوچستان کن مون کرے ۔ بلوچستان ئٹ سر مننگ آن پد اونا ہندا مسخت اس کہ داسہ سلاہبند جہد ئنا وصیلہ ٹی تینا راجی آجوئی ءِ النگ نا بنا ءِ کروئی ءِ ۔ ولے ملخموت نیام ئٹ بس و شال ئٹ 31 مئی 1935 نا زِمی جُم ئٹ میر یوسف عزیز مگسی شہید مس و آخوبت کن مہردار نا سینہ ٹی جہی مس ۔
